Genesis 36

Ashaa Esau

1Na mɛa te lɔga bere Esau. Nɔng Esau sara gɛnyɛ gena keli Edom.

2Na dha bere gam sedhdhea Kanani. Na kona keli Ngaadha. Nɔng a sedhdheya hira kènno Elon ku hira bhora Hitani. Na kona keli Ngaholima. Nɔng a sedhdheya hira kènno Anna ku hira bhora Hiwa. Na a ashaya hira kèe Zibiyon. 3Na kona a sedhdheya Ismayeli kèleo Ngabesemo. Nɔng Ngabesemo gɔynɛ keli Nɛbiyo.

4Na Ngaadha koo hudhugo Elibhaz. Na nɔng Ngabesemo hudhugo Rayuel. 5Na Ngaholima nɔng hudhugo Usha ko Yalam ko Kore. Yɔk ngaerroya kumulɔng agga bere irrittono :Esau Kananɔ.

6Na Esau ibha tɛrroa gɛnyɛ ko erroa gɛnyɛ maya ko ga ngaha ko zuga gɛnyɛ ko gettoa gɛnyɛ ko ahaa gɛnyɛ iwoo ko ahaa bere mukkana bɛrgua ihɛa Kananɔ kumulɔng na dhɔyu gɔynɛ Yaykob na bana na zɛgu rɛna. 7Nɔng bhee bere mesɛ ngangaye, a ngaya lɔmmɛ ahaa bo mɛra na bhɛa bhagɛa ngabaonu kari ngahɛtinɛnɛoye. 8Na Esau (oo Edom) nɔng zɛgu Seherɔ baa lɔmma kutulo na bhagu ngonu.

9Na hunaa zɛgga ngonuye, ashaa gɛnyɛ bhɛldɛ na te mɛri na te bhorre kèe Edom.

Na mɛa te lɔga bere ashaa gɛnyɛ.

10Tɛriya Esau kènno Ngaadha bere hudhukkono erite kèe Elibhaz. Na na kèe Ngabesemo nɔng bere hudhukkono inde kèe Rayuel.

11Na yɔk erroa Elibhazi maya keli Teman, Omar, Sebho, Gatam ko Kenaz.

12Nɔng Elibhaz dha bere lɔ tɛrite chinyi keli Ngatimana. Na Ngatimana hudhugo erite may kèe Amalek.

Ngagiya a ashaa bere tɛriya Esau ku karbay kènno Ngaadha.

13Na yɔk erroa Rayueli maya keli Nahata, Zara, Shama ko Miza.

Ngagiya a ashaa bere tɛriya Esau kènno Ngabesemo.

14Na tɛriya Esau kèe Ngaholima ku sedhdheya hira kèe Anna ku ashaya Zibiyoni koo hudhugo erroye may ku sizzi. Na ngaerroonu keli Usha, Yalam ko Kore.

15Mɛa te lɔga ashaa Esau bere ku komortɛn.
Eriya Esau ku aw kènno Elibhaz dha bere erroa gɛnyɛ ku komortɛn keli Teman, Omar, Sebho, Kenaz, 16Kore, Gatam ko Amalek.

Ngagiya a ashaa Ngaadha ku komortɛn bere irrittono :eriya nɛnɛ Elibhazi Edomɔ.
17Nɔng eriya Esau kènno Rayuel dha bere erroa gɛnyɛ ku komortɛn keli Nahata, Zara, Shama ko Miza.

Ngagiya a ashaa Ngabesemo ku komortɛn bere irrittono :eriya nɛnɛ Rayueli Edomɔ.
18Na erroa Esau ku komortɛn bere hudhukkono :tɛriya nɛnɛ kèe Ngaholima keli Usha, Yalam ko Kore.

Ngagiya a erroa sedhdheya Anna kènno Ngaholima.

19Yɔk erroa Esau (oo Edomi) bere ku komortɛn a ngagiya.

20– 21Mɛa te lɔga ashaa hira bhakka Edom kènno Seher ku hira bhora Hori. Yɔk erroa gɛnyɛ bere ku komortɛn keli Lotan, Shobal, Zibiyon, Anna, Dishon, Eser ko Dishan.

22Nɔng Lotan erroa gɛnyɛ keli Hori ko Hamam. Na ngɔnɛ keli Ngatimana.

23Na yɔk erroa Shobali keli Aliwan, Manaha, Ebal, Shebho ko Onam.

24Na ga Zibiyoni keli Ayana ko Anna. Na Anna dha bere iwo sigiriyaa chɔgɔnɛ korugiye na jɔana maa awurno.

25Na yɔk erroa Anna keli Dishon ko Ngaholima.

26Na erroa Dishoni yɔk keli Hemidan, Eshiban, Yitiran ko Kiran.

27Na ga Eseri keli Bilihan, Zawan ko Akan.

28Na ga Dishani keli Uzu ko Aran.

29– 30Yɔk Lotan, Shobal, Zibiyon, Ana, Dishon, Eser ko Dishan a komortɛna zuga bhora kèe Hori bere bhakkɛa Seher na allinɛnɛa baa nɛ bhiy bhiy.

Komortɛna Edomi

31Mɛa te lɔga komortɛna bere allinɛnɛa Edom huna komortɛna Isirayeli ba ngani kalliyɛyɛayo.

32Nɔng dha bere sabbɔ komoruya Edomuny a :eriya Bihori kèe Bala. Na ɔra allinɛnɛa keli Dinaba.

33Na koo ere. Na hunaa rɛsaye, komorumo sɛrɛu :hira bere irrittinyana ɔra kèe Bosora ku eriya Zara kèleo Yobab.

34Na Yobab koo ere sɛgɛn na sɛrɛu :hira bere irrittinyana baa kèe Teman kèleo Husham.

35Na Husham ko nɔng ere na sɛrɛu :eriya Beda kèe Hadad. Nɔng a hira bere mɔgga zuga Midhiyami kamana kèe Mɔab. Na ɔra bere allinɛnɛa keli Awi.

36Na Hadad ko nɔng ere na sɛrɛu :hira bere irrittinyana Meserikagiye kèe Samala.

37Na Samala koo ere na sɛrɛu :Shawoli, hira bere irrittinyana ɔra iho kidho tugɔ kèe Robot.

38Na Shawol koo ere na sɛrɛu :eriya Akibhori kèe Balanan.

39Na Balanan hunaa ko nɔng rɛsaye, komorumo sɛrɛu :Hadhari. Nɔng dha bere ɔra allinɛnɛa :nɛa keli Baw. Na tɛriya nɛnɛ keli Ngametabel. Nɔng a sedhdheya Meteredi ku ashaya Mezabi.

40Yɔk ashaa Esau bere ku komortɛn ko sara gɛ ko gettoa bere allinɛnɛa :yɔkku keli Timina, Aliwa, Yote, 41Oholibima, Ela, Binon, 42Kenaz, Teman, Mibisar, 43Magadiyel ko Iram.

Ngakomortɛnda agga bere allinɛnɛa oriya ɛlla Edomɔ bhiy bhiy. Na nɔng Esau a kokonga bhora Edomi kumulɔng.