Gen 38 | SuqSC | STEP | Na ngabɛrguonu Yuhudha kendɛ ko gɔynggɛ na shidhɛ na assa hira bhora Adola kèe Hera na tɛldi kari.

Genesis 38

Lɔga Yuhudha Ko Ga Ngatimari

1 Na ngabɛrguonu Yuhudha kendɛ ko gɔynggɛ na shidhɛ na assa hira bhora Adola kèe Hera na tɛldi kari. 2 Na koo tɛhɛndɛ ko sedhdheya hira kèe Shuwa ku bhora Kanani na ɔgɛ ^{▼▼Tuga Hibiru se, “...na tunggi kari...”} 3 na tɔlɔma eri. Na hudhugo ke may na tɔgɔdhɛsɛ sarre kèe Er. 4 Na koo tɔlɔma eri sɛgɛn na hudhugo ke may na tɔgɔdhɛsɛ sarre kèe Onan. 5 Na hudhugo inde may sɛgɛn na tɔgɔdhɛsɛ sarre kèe Sela. Nɔng ngaeritonu dha bere kùhudhukkono bɛrgua bere bhagɛa baa kènno Kizib.

6 Na eriya Yuhudha ku aw kèe Er hunaa tewa buye, koo gamɛsɛ :chɔgɔnɛ sedhdheyte kèe Ngatimar. 7 Nɔng dha bere Er a hira messo lɔga bo gɛrsa bhɛa Tumu. Na chɔru :Tumu na ere.

8 Na Yuhudha sɛɛsɛ Onan, “Ok na sɛrɛ tɛriya bare dhɔtta :goonu damiya na, na irriyɛsɛ erro na keliyɛy :nɛa.” 9 Nɔng Onan dha bere gayɔ hunde ale irrittono erro na ga gɛnyɛ ngayoye. Na hunde ungussɛ kariye, kɛng bhɛa senno ngakaynɛ eri na dugu oddɛsɛn ba. 10 Na hunaa messo ngangaye, munyuɛsɛ :Tumu ke ngaya anɛ lɔga gɛrsaye. Na ko nɔng chɔru :Tumu sɛgɛn na ere.

11 Na Yuhudha sɛɛsɛ mɛrɛya nɛnɛ Ngatimar, “Ko bhee eriya nanu Sela anɛ bu, ga wak na te ninginɛsi bhɛa nu.” Nɔng dha bere bhee senɛsɛn ngangaye, a ngaya se Sela ngakerɛ huna gɔynggɛunyde. Na Ngatimar nɔng wagu bhɛa nɛ.

12 Na tɛldi oynyaa bo mɛra na tɛriya Yuhudha ^{▼▼Tuga Hibiru se, “...ku sedhdheya Shuwa...”} ere. Na Yuhudha hunaa ibhbha duhu na tewa ushaye, ogu Timinagiye bhɛa zuga kedhdhɛa mɛdɛrniya gɛnyɛ chɔrɛ na dhi ko dehunya nɛnɛ ku hira bhora Adola kèe Hera.

13 Na nɔng Ngatimar seyɛsɛ :zugu, “Kɔa nunu wa okka Timinagiye bhɛa zuga kedhdhɛa mɛdɛrni chɔrɛ.” 14 Na nɔng bhuruya ruminyaa anɛa ninginɛsi na malugu gena na koo ulubo sabba kukubhagiye. Na ogo na koo tɛu warana ɔra kènno Aynam iho ganggua kɔa Timinagiye dheyyɔ. Nɔng bhee mesɛ ngangaye, a ngaya dha bere Sela teɛ bu na chɔgɔnɛ bhɛa senno kɛsɛrɛɛ nɔng heo ngahinɛsɛnnoye. 15 Na hunaa Yuhudha kunno na orro nɔng hunde ulub sabba kukubhagiyeye, se a sedhdheyte ku hummey. nɔng se a sedhdheyte ku hummey. 16 Nɔng hunde a mɛrɛya nɛnɛye, dha imagtɔ. Na hɔyu bhɛa ihɛa :Ngatimari ganggu dheyyɔ na sɛɛsɛ, “Kalda kùtunggi kari.”

Na nɔng mɛrɛya nɛnɛ seu, “Na hunde kigommoginy na kùngu kariye, ale ajjany ɔng?”

17 Na nɔng seu, “Kɔtɔkkaginy ro kona.”

Na nɔng sɛɛsɛ, “Ko bhee tɔkkagɛany royɔ, maya kibhi ahi kona.” 18 Na nɔng ghinu na sɛɛsɛ, “Na ahite seni kàiny na ibhte a ɔng?”

Na mɛrɛya nɛnɛ seu, “Any ngagalita malugi kɔrrɔngɔ na kàgayɛinyde ko ngabhirɛya lɔmiye.” Na Yuhudha aynɛ mɛrɛya nɛnɛ ahaa ghinno kumulɔng na koo tunggi kari na tɔlɔma eri. 19 Na nɔng Ngatimar ogo na koo bhelego kukubhaa ulubɛa sabba na malugu ruma anɛa ninginɛsi sɛgɛn.

20 Na nɔng Yuhudha dhuma royɔ na aynɛ dehunya nɛnɛ ku hira bhora Adola na kɔtɔgɛsɛ hummeya bɔɔ ibhbho ahaa gɛnyɛ na kangagaytɔ. Na dehunya nɛnɛ tɔgu na koo lamiu hummeyaa gina na ngani ngaorro. 21 Na ghinu zuga bhakkɛa ngonu na sɛɛsɛ, “Ngangaye hummeya taa iho ganggua kɔa Timinagiye rataa Aynami bɔɔ ogu ori?”

Na yɔk zugo yaktɛsɛ na seyɛsɛ, “Agge sedhdheyte ku hummey taa i ngaya ninggɛ.”

22 Na nɔng hiri wagu chɔɔ bhɛa ihɛa Yuhudha na sɛɛsɛ, “Anye wa kokka na ngani ngakoriyo. Na hunde kighini zugoye, timakta na seyaganyɔ, ‘Agge sedhdheyte ku hummey taa i ngaya ninggɛ.’”

23 Na Yuhudha seu, “Annaa wa keni kɔ̀tɔgɛsɛ royɔ. Na hunde wa ngani ngaoriyoye, ngaahaonu bɔɔ kɔɛye any kɔtɔlɔ :nɛa, ngakɛchɛktɛiy :zugu.”

24 Na hunaa taginya senno kete sizziye, hir kona ko na sɛɛsɛ Yuhudha, “Dha bɔɔ mɛrɛya nunu mesu lollumo na tɔlɔma eri.”

Na nɔng Yuhudha seu, “Obhonisiyo bho na shɔktɛ go na kere!”

25 Na hunaa kobhoniseono bhoye, nɔng Ngatimar egu hir kona na koyogɛsɛ mogoya nɛnɛ na kesɛɛsɛ, “Ngaahaya kɔlɔmiye agga hirre ajjany eriye. Ga taga ngagalita kàmaluk kɔrrɔngɔ na kàgaɛyte ko bhirɛgiye hunde agga gigiye.”

26 Na Yuhudha tagu hunde aha agga gɛnyɛye, na seu, “Nɔng bhɛa nanu Ngatimar a hira ridhing ningginɛna ke ngaya eriya nanu Sela nɔng ngani kìgomɛsɛo na kɛsɛrɛyɛoye.” Na wurtɔ nɔng ngani ngaassanao.

27 Na kala senno kuhudhukkɛy :Ngatimari hunaa tewa jaye, taga hunde erroa ɛlla kɛngɔ a shɔaye. 28 Na hunaa ngani hudhuginɛnaye, erroa ku shɔa kona ijimiseo siyɔ. Na nɔng tɛriya ibhbho chɛbɛsɛ kirreya gɔlɔnya na seu, “Erite hudhukkinya sabbɔye a nganda.” 29 Na nɔng koo yagu siyɔ na sabbɔ hudhukkiyaa gɔynɛ. Na tɛriya ibhbho seu, “Na inye wa dhulau sabbɔ ɛnɛng sɛgɛn!” Na kɔ̀tɔgɔndɛsɛ sarre kèe Bhares. ^{▼▼Tuga Hibiru “Bhares” a bhɛa kèsenɛa “Dhulu.”} 30 Na gɔynɛaa kìchibɛsɛna kirreya gɔlɔnya siyɔ ko nɔng kɔbhiya na kɔ̀tɔgɔndɛsɛ sarre kèe Zara. ^{▼▼Tuga Hibiru “Zara” a bhɛa kèsenɛa “Gɔlɔny tull.”}