Gen 39 | SuqSC | STEP | Na yɔk ngagaynyaa bhora Ismayeli aytɛ Yoseb Gibsigiye. Na koo talu :hira ku gulsaa chinynyo bholisa komoruya Gibsi kèe Bitibhara.

Genesis 39

Lɔga Yosebi Ko Ga Tɛriya Bitibhara

1 Na yɔk ngagaynyaa bhora Ismayeli aytɛ Yoseb Gibsigiye. Na koo talu :hira ku gulsaa chinynyo bholisa komoruya Gibsi kèe Bitibhara. 2 Na Yoseb bhagu doraa gulsaa nɛnɛ ku hira bhora Gibsi. Na dha bere ɛl ko Tumu kari na ɛana lɔkke kumulɔng. 3 Na hunaa gulsaa nɛnɛ orro bhɛa Tumu lɔmɛa Yoseb na mesɛa lɔgɔ kumulɔng shɛɛye, 4 maragu na bhɛa nɛnɛ te hira challa ibhinɛna hinisi. Na aynɛ gulsamo na kalliyɛy ahaa doraa nɛnɛ ko gaymanyaye kumulɔng. 5 Na ahaa doraa nɛnɛ ko ga gu toyne kumulɔng koo tuhu :Tumu ke ngaya ajjɛ Yoseb gulsamoye. 6 Na hunaa tewa ngangaye, Bitibhara dhɔyɛsɛ Yoseb aha kumulɔng na kalliyɛytɔ na nɔng ussɛ bay hung.

Na Yoseb te tɛgaya bo challa lɔmma ɛs. 7 Na koo tɛriya Bitibhara chirkanu nɔng na sɛɛsɛ, “Wo, kùtunggi kari!”

8 Na nɔng Yoseb tamaru na sɛɛsɛ, “Anye kamari! Gulsaa nanu annaa bere yɛbhbhanyi anye na dhɔttaganyi aha kumulɔng na kɛ̀bhɛk shɛɛ. Ahite ngani kamadhaganyo ninggɛ. 9 Hirre lɔ gulsamo ngadoriya hunde nande kona ninggɛ. Na galite kanyɛany :gulsaa nanu ngadoriya toyeye, ani inye sɔng, ke ngaya anɛ tɛriya nɛnɛye. Na seni kème ngalɔkta bu gɛrɛs mar :Tumuye kɛ ɔng?” 10 Na tii tii Yoseb hunde me zinggo na eli :tɛriyɔ na kutunggi kariye, tamaru bhɛa ungussɛa kari ko bhɛa chɔɔ senno kɛtɛldɛ jaa jaa.

11 Na kali kona Yoseb bana na keme zinggo dorigiye. Na hunaa kɔaye, zuga mesinɛna dorigiye dha bere ninggɛ. 12 Na tɛriyaa ginani ibhu ruma Yosebi gidhdhingɔ gig na sɛɛsɛ, “Kùtunggi kari!” Na nɔng tamaru na dhɔyɛsɛ ruma nɛnɛ na ngeu bhɔ. 13 Na hunaa tɛri orro Yoseb hunde dhɔyɛsɛn rum siyɔ na ngesse, 14 eleo zuga mesinɛna doraa nɛnɛ na sɛɛsɛ, “Ga gɔnyigiyɛ! Ngahirra ku bhora Hibiru mesinɛ ngaya bere kunɛ :hira nanuye se kitiranyɛiytɔ. Wa tunnugogonyɔ dorigiye na seaganyɔ, ‘Keni kùtunggi kari’ na anye karra wuy goore. 15 Na hunaa kari wuyte, dhɔyagany ruma nɛnɛ na bhonu na ngeu.”

16 Na ruma nɛnɛ tɔlɔmu :tɛriyɔ ko bhee kunɛ :gulsaa Yosebi. 17 Na hunaa gulsa kunnoye, kɔbhɛsɛ :tɛriyɔ ngalɔkta na sɛɛsɛ, “Ngagaymayta ku bhora Hibiru bere kunɛye wa tunnugogonyɔ bhɛa kùngusɛa na ajjo ngani kaany liya. 18 Na karra wuy goore na dhɔyagany rum na bhukiya na bhonu bhɔ.”

19 Na hunaa gulsa shikko lɔga tɛriya nɛnɛ hunde senɛsɛn, “Gaymaya nunu wa mesonyi ngangaye,” dɛbu goore. 20 Na koo ibha Yoseb na ɔgɛ doraa kìchibɛa zuga chibbo :komoruyɔ na chɛbu ngonu.

Na hunaa kìchibboye, 21 nɔng dha bere ɛl ko Tumu kari na chirbhisiu na ojju ke hira bo challa bhɛa gulsaa doraa chibinuny. 22 Na aynɛ :gulsaɔ buyn na kalliyɛy zuga kìchibbo kumulɔng. 23 Na dhɔyɛsɛ lɔga doraa chibinuny kumulɔng. Na lɔga doraa chibinuny ngani ngaɛsɛdhdho, ke ngaya Tumu ɛlɛ ko Yoseb kari na ɛanɛ lɔkke kumulɔngge.