Gen 40 | SuqSC | STEP

Genesis 40

Lɔga Kunassɛa :Zuga Messɛa Zinggo Doraa Komoruya Gibsi Na Dhugunɛsɛna :Yosebi Hologun

1 – 2 Na kali kona zuga messɛa zinggo doraa komoruya Gibsi gee ku ramman ɛddɛya lɔgɔ. Ngazuktonu kona a gulsaa marakka gimaya woynuny matta :komoruyɔ. Kona a gulsaa marakka amissɛa komoruyny. Na hunaa ɛddɛa lɔgɔye, komoru dɛbu goore. 3 Na aynɛ bholi lɔgɔ na kaytɛ bhɛa bɔɔ kìchibɛa Yoseb doraa bhɛkka :gulsaa bholisa komoruya Gibsi. 4 Na gulsaa bholisuny ibha yɔk na aynɛ Yoseb na kɛa na kaynɛ ahaye hinnɛye.

Na hunaa tɛldaa doraa chibinuny ungge muchugiye, 5 kali kona barɔ yɔk kuna kari. Na lɔga kunassɛa tɔlɔmɔ hologuno bhiy bhiy.

6 Na bhorroyɔ hunde Yoseb kɔ na assanaye, aru hunde dusennɛye. 7 Na ghinu ^{▼▼Tuga Hibiru se, “...ghinu gulsachinaa bɔɔ messɛa zinggo doraa komoruyny kìchibbo doraa bhɛkka :gulsaa nɛnɛ...”} na sɛɛsɛ, “Wa usong ɔnɔng dusendo ngangaye?”

8 Na yɔk se, “Agge wa kugunayo na hirre dhugunnogiy hologun garra.”

Na nɔng sɛɛsɛ, “Inde dhugunnogiy hologunoa lɔga kùgunasɛaye a Tumu. Ga yoktogonyu lɔkte wa orro kunaɔye!” 9 Na gulsaa marakka gimaya komoruyny kɔbhɛsɛ Yoseb lɔgaa kunasɛa na sɛɛsɛ, “Anye wa kori kɛya ku woyn hunde chillana huna gindiyny bhɛa nanu jaaye. 10 Na gindiy chalgaya gaminya sizzi. Na labu na hulu ke tiri na eggeo kawarɛa woynuny. 11 Na se siyɔ kɔlɔmi kombiya maynɛnɛa :komoruya Gibsi. Na koo kibhau woyn kawarɛ na kuchudhɛsɛu kombi toye na kaynɛu komoru.” 12 Na sɛɛsɛ :Yosebi, “Ga kùdhugunoginy ngalɔkta hologun. Ngagindiyta chalgatana gaminya sizziye ɛlɛhɛn ungge ku sizzi. 13 Na ale sani ungge ku sizzi na komoru ɔkkaniny na ajjiny hini hɔldin na sennaginy, ‘Lɔga bɔɔ ɛddɛi any kagarayɛ!’ Na iyikkaginy bhɛa bere nunu mesinɛnɛi. Na inye ale ajjɛ komoru kombiya maynɛnɛa damiya taa ajjɛiy. 14 Na hunde kɔ na dokkon bhee challiye, chirbhiseony na kadhaany na yogɛsɛ komoru lɔga ganyu na kɔgaany ngadoriya. 15 Anye bere kàtallananyi baa bhora nayo Hibiru na kòhonyɛanyi ngaya gidhdhingɔ. Lɔkte bere kɛddɛi ninggɛ na chɔɔ mɛa kani nganda kihi doraa chibinuny hɔlɔng hungge.”

16 Na gulsaa marakka amissɛa komoruyny hunaa shikko Yoseb hunde dhugunɛsɛn lallɛn lɔga challaye, ko nɔng sɛɛsɛ Yoseb, “Anye lɔgaa kori a ɛnɛnggeo. Se kiti tilɛna gɛlachinde ku sizzi. 17 Na gɛlaa ihono tundɔ lɔ amissɛa bo kanyanganiseo kènno kus :komoruya Gibsi. Na yɔk shɔa gena hoya na usigi amissɛa iho gɛlagiye hunde kitiye.”

18 Na sɛɛsɛ :Yosebi, “Ngakunaya nunde hologun a ɛnɛnggeo, ngagɛlachinda ku sizziye ɛlɛhɛnnɛ ungge ku sizzi. 19 Na inye ale sani ungge ku sizzi na komoruya Gibsi kun na ɔkkaniny na kedhdhaniny sabba na ilakkiny na aminynyɛ :dhonggau.”

20 Na hunaa ungo tewa sizziye, komoruya Gibsi muga gulsachina gɛnyɛ na dhaga kɛrɛngiya unga bere kùhudhukkonɛa nɔng. Na komoru koo ɔga gulsaa bɔɔ marakka gimaya woynuny ko gulsaa bɔɔ marakka amissɛa nɛnɛ doraa chibinuny na tɛldi ko gulsachina gɛnyɛ ɛlla ngonu. 21 Na ibha gulsaa bɔɔ marakka gimaya woynuny na yagɛsɛ bhɛa bere nɛnɛ. 22 Na gulsaa bɔɔ marakka amissɛ, nɔng kilaga damiya bɔɔ kɔbhɛsɛna :Yosebi. 23 Na nɔng gulsaa marakka gimaya woynuny dhinyɛsɛ sabba na Yoseb ngani ngakadhdhanao.