Gen 41 | SuqSC | STEP | Na tɛldi oynya ramman na kali kona komoruya Gibsi kunau. Na aru rɛa nɛnɛ hunde chil kidhoa kèe Abay tugɔye.

Genesis 41

Lɔga Kunasɛa :Komoruya Gibsi Na Dhugunɛsɛna :Yosebi Hologun

1 Na tɛldi oynya ramman na kali kona komoruya Gibsi kunau. Na aru rɛa nɛnɛ hunde chil kidhoa kèe Abay tugɔye. 2 Na hunaa chillo kidho tugɔye, bea bo challa idhibennɛa gee ku issabbay bhonda ma toye na ghɛyɛ balyaye toye. 3 Na gee ku issabbay rɛhi ku bhɔchɛn bhonda sɛgɛn na chili kidho tugɔ ko gaa idhibennɛa kari. 4 Na koo bea rɛhi ku bhɔchɛna gɔyɔ ngagiya idhibennɛye. Na komoru dharachiyaa unge.

5 Na koo ngeɛ :ungu sɛgɛn na kunau na aru liwayte dhɔnɛ kɔdhdhana sabbite bu challi bibi ku issabbay. 6 Na wurtɔ aru kona inde kɔdhdhana sabbite ku issabbay gɛttɛɛ kawarɛ chichi hɛ ko ga dhakka :ngɔya lay hɔliny. 7 Na koo gaa kawarɛ gɛttɛyɛa gɔyɔ ngagiya bu chal sabbi bibiye. Na hunaa komoruya Gibsi dharachinyana unge sɛgɛnde, tagu hunde dhaa a kunaye.

8 Na bhorroyɔ hunaa bansana ungeye, shurɛ lɔga bare kunasɛa. Na eliu zuga Gibsi gayɛa bho ko ga ku kaynya kumulɔng. Na yogɛsɛ lɔga bare kunasɛa na hirre dhugunɛsɛn hologun garu.

9 Na koo gulsaa marakka gimaya woynuny sɛɛsɛ komoru, “Lɔga gɛrsa bere kɛddɛi wa kagadhau. 10 Annaa bere wolokkiy :komoruyɔ na attiey ko gulsaa bere marakka amissɛ na chibbey doraa bhɛkka :gulsaa bholisuny. 11 Na hunaa kɛllo ngonuye, kali kona barɔ kugunayo kari. Na lɔga korro kunaɔ hologuno tɛldi bhiy bhiy. 12 Na bere kɛllo ko tɛgaya bhora Hibiru ku gaymaya gulsaa bholisa bhɛkkɛa zuga kìchibbo kari. Na koyoktɛsɛo kunaa kugunasɛo na dhugunnogiy hologuno bhiy bhiy. 13 Na lɔgaa dhugunnogiy kumulɔng ago na te dhere. Na anye kawagɛsɛu gulsamoa bere nanu, na nɔng gulsaa marakka amissɛ kilagayɛ.”

14 Na koo komoruya Gibsi aynɛ zugo lɔgɔ na kidhiganda Yoseb. Na yɔk obhonisiyo doraa chibinuny shaw hung. Na nɔng yɛsa sabba na malugu ruma bo challa na koo dhiganda bhɛa komoruyny.

15 Na komoru ghinu Yoseb na sɛɛsɛ, “Anye bɔɔ kugunasi na hirre dhugunnogony ngalɔkta hologun garra. Na nɔng wa kishikka hunde se ani hira dhugunɛsɛni zugo lɔgɔ hologunde.”

16 Na Yoseb yagɛsɛ na sɛɛsɛ, “Komorue, anye bhɛa kudhugunɛsɛni kuna hologun ngakaggayo. Nɔng inde dhugunnogung ngalɔkta hologun shɛɛye a Tumu.”

17 Na koo komoru yogɛsɛ Yoseb lɔga orro kunaɔ na sɛɛsɛ, “Anye se kichili Abayɔ tugɔ. 18 Na hunaa kichili kidho tugɔye, karra bea bo challa idhibennɛa gee ku issabbay hunde bhonsanɛ ma toye na ghɛnɛ balyaye toyeye. 19 Na koo gee ku issabbay rɛhi ku bhɔchɛn bhonda sɛgɛn. Yɔk agga rɛhi gɛrsa dhogoy chɔɔ anye Gibsigiye ngaya bere sabbɔ ngani kàrrao dhul. 20 Na yɔk ngabea bu rɛhi gɛrɛse gɔyɔ gaa idhibennɛa bhonsanɛa sabbɔ ku issabbay. 21 Na hunaa gɔyta na tewa ushaye, yɔk ngani a bhɔchɛn huna nɛ chi. Na hirre anda iyosono ngabea wa guchchɛ lalugɛye garu ke ngaya guyɛ na chɔɔ kɛngi ngadhɔnginyanɛoye. Na anye kadharachiyau unge.

22 “Na koo ngeany :ungu sɛgɛn na karra liwayte dhɔnɛ kɔdhdhana sabbiya bo challa bibiyo gee ku issabbay. 23 Na wurtɔ karra gee ku issabbay gɛttɛɛ kawarɛ chichi hɛ ko ga dhakka :ngɔya lay hɔliny. 24 Na koo gaa gɛttɛyɛa kawarɛ dhɔrɔgɔsa gɔyɔ ngagiya bu chal sabbi bibiye. Na ngakunaya koo koyogɛsɛu zuga ku kaynya na hologun ngani ngadhugunnogonyeo.” 25 Na sɛɛsɛ :Yosebi, “Ngalɔkta kunasɛo kɛngi rammande, hologuna nɛ a dhɔnɛ. Tumu wa dhɔlɛsɛa komoru lɔga ale senno keme. 26 Na ngabea ku issabbay idhibennɛye ɛlɛhɛnnɛ oynya issabbay. Na ngaliwaya ku issabbay eggissonɛ shɛɛye ko yɔk ɛlɛhɛnnɛ oynya issabbay. Yɔk ngalɔkta hologun a dhɔnɛ. 27 Na ngabea ku bhɔchɛn bu rɛhi gɛrɛs ku issabbay kɔbhbhinyaye ko yɔk ɛlɛhɛnnɛ oynya issabbay. Na ngaliwaya gɛttɛɛ hɛ ko ga dhakka :ngɔya lay hɔlinyde ko yɔk ɛlɛhɛnnɛ oynya issabbay. Yɔk ngalɔkta rammane ɛlɛhɛnnɛ bhɛa oynya issabbay ale ba anɛa hozzo.

28 “Na damiyaa kòyokkogɛunggu, Tumu lɔga ale senno keme a ngagiya wa dhugunogungɔ igge sabbɔye. 29 Gibsigiye kumulɔng oynya issabbay ba ale a chasey. 30 Na oynyaye ku issabbay kɔbhinya wurtɔye ba ale a hozzo. Na zuga Gibsi kumulɔng hunde bere ba a chaseyte ale ngakadhdhanɛo. 31 Na ngaoynyaonu ba ale a hozzoa bo goore chɔɔ bere sabbɔ ngani kàrtao. Na hunde dha bere ba a chaseyte ngakadhdhanɛo. 32 Na bhee kunasɛo jajaye, a ngaya lɔgɔ wa kedhdhɛ :Tumu na ale bhugnyɛsɛnɛ shawye.

33 “Na mɛa ga bɛra hirre ghurghur ga bhoye na aynɛ buyn na kete gulsaa bo na kalliyɛy baa Gibsi. 34 Na bɛra gulsachinaa chicho mukkanɛa liwa bhɛa zugony. Na ngaoynyaya ku issabbay ba anɛ chaseyte kamaraga zugo hunde sunɛɛ liwaye. Na hunde liwaa gɛ ilongngɛ na ngɛrranɛ gaminya haynaye gambe dhɔnɛ kete na ojjɛa bay. 35 Na ngaoynyaya ale ba ngani anɛ chaseyte kumugu liwa buyna komoruya Gibsi oree oree na kojjigi balanggichinne. 36 Na kete gee ammɛ :zuga Gibsi oynyaye ale wurtune ku issabbay ba anɛ hozzoye na aynde ngachɔllanɛoye.”

Lɔga Kàjjɛa Yoseb Gulsamo Gibsigiye

37 Na komoruya Gibsi ko gulsachinaa gɛnyɛ tɛhɛnɛ lɔga yokkono :Yosebi. 38 Na komoru sɛɛsɛ gulsachina gɛnyɛ, “Hirre lɔ Kuloya Tumu hunde ngahirraye, kona ninggɛ.”

39 Na sɛɛsɛ Yoseb, “Hirre ga bho na ungusɛsɛn lɔgɔ hunde nunde, kona ninggɛ dhul ke ngaya ngalɔkta kumulɔng dhugunnogɛiny :Tumuye. 40 Na mɛa kajjiny buyn na te gulsa ngadoriya nande na alliyɛy zuga Gibsi kumulɔng na yɔk kigomboginy inye. Na nɔng bhɛa anɛi gulsa, inde bu bhɛa nunuye kani anye sɔng.

41 “Mɛa wa kainyɔ ngabaya kèe Gibsiye kumulɔng na alliyɛy :inyo.” 42 Na komoru hɔrɔa siggiya lɔmma hallagiyɔ hɛtta ko archumay kàggayɛa nɔng bhɛa anɛa komoru na ojjɛsɛ hallagiya Yosebi. Na ibha ruminyaa bo dɛldɛla bhadhdhɛa na bhuruyɛsɛ. Na koo ibha nyerekoya ku worgi na bhuruyɛsɛ kɔrrɔng. ^{▼▼Hunde komoruya Gibsi ajjɛ Yoseb buynde, heo damiya Suri hunde ibhbhanɛ lalanga komorumo na ngagɛsɛnɛ hira kìbhbho ke komoruye.} 43 Na aynɛ kɛga ghurtɛa :harteyau woyɛa :gulsaa kɔbhbha komoru na irrɔgu. Na zug gena jɛmmɛ sabbɔ na se, “Tɔgɔndɛsɛ kɔmma! Tɔgɔndɛsɛ kɔmma!” Nɔng damiya bere Yoseb ajjɛa :komoruyɔ buyn na kenno kalliyɛy baa Gibsi a nganga.

44 Na komoru sɛɛsɛ Yoseb, “Anye ko hunde kète komoru bhɛa ngazukta Gibsiye, inye hunde ngani seyaoye, hirre chɔɔ dhɔngngana siyɔ oo buchchono jagari ninggɛ.” ^{▼▼Buyna kàjjɛa Yoseb, heo bhɛa kìbhɛa hira ku bara arsuny bhɛa Suri na anɛa hira kɔbhbha komoru.} 45 Na tɔgɔdhɛsɛ Yoseb sarre kèe Sɛhan Bhehina na gamɛsɛ sedhdheya Bitibhari kèe Ngaasinati. Nɔng Bitibhar dha bere a gɔldang ɔrre kèe On. Na nɔng Yoseb tɔɛ Gibsi kumulɔng.

46 Yoseb huna kachcha komoruya Gibsi, oynyaa gɛnyɛ dha bere a 30. Na bana na tɔɛ baa Gibsi kumulɔng. 47 Na oynya issabbay liwa eggi goore na ba te chasey. 48 Na zuga Gibsi hunaa suniyɛa liwaa ngaoynyaonu ku issabbay ba anɛ chaseyte, nɔng Yoseb muga ga suniyonɛa gunyaa ɛlla ori dheyyɔ na chɔdhɛsɛ hana ku ori. 49 Na mugɛɛ liwa ba dhik na tɛhɛyɛ ko kassaya yirisiny. Na hunaa makkeo na ngani ngaɔanaoye, dhɔyu ke ngaya anɛ mɛriye.

50 Na hunaa ba ngani hozzo keteyaoye, tɛriya Yosebi ^{▼▼Tuga Hibiru se, “...kèe Ngaasinati, chɔgɔnɛ kèleo Bitibhar ku gɔldanga ɔra kèe On,...”} hudhugo erroye may ku ramman. 51 Na Yoseb eriya nɛnɛ ku aw tɔgɔdhɛsɛ sarre kèe Minase ^{▼▼Tuga Hibiru “Minase” a bhɛa kèsenɛa “dhinyaganyɔ.”} na seu, “Tumu dhiony sabba na lɔga bere kɔchɔllanɛnɛi kumulɔng ko lɔga zuga bere babaa nanu dhinyagany sabba.” 52 Na eriya kɔbhbhana Minase tɔgɔdhɛsɛ sarre kèe Ebhiron ^{▼▼Tuga Hibiru “Ebhiron” a bhɛa kèsenɛa “kawarte mɛri.”} na seu, “Tumu wa aanyɔ erro baa bere kɔchɔllanɛnɛi.”

53 Na oynyaa bere ba anɛa chasey Gibsigiye ku issabbay dheytiyaa 54 na oynya issabbay ba te hozzo damiya bere yokkonɛa :Yosebi. Na oriya ɛlla Gibsigiye dheyyɔ dheyyɔ kumulɔng ba te hozzo na nɔng Gibsigiye dha bere liwaa ammɛa :zugu ɛllɛ. 55 Na hunaa hozzo Gibsigiye mɛdhaye, zugo turtɛsɛ komoruya Gibsi na kaynɛ amissɛ. Na koo komoru sɛɛsɛ, “Ago bhɛa Yosebi na mesigi lɔkte yokkogung :nɛaye.” 56 Na hunaa Gibsiye kumulɔng ba tewa hozzo gooreye, Yoseb owo balanggichina na zugo tala liwa. ^{▼▼Tuga Hibiru se, “...liwa ke ngaya hozzo anɛ buye.”} 57 Na bhorinya kumulɔng hoya na tala liwa Gibsigiye bhɛa Yosebi ke ngaya ba kumulɔng hozzo anɛ buye.