Gen 43 | SuqSC | STEP | Na Kananɔ hozzo mɛdha na te gɛrsi.

Genesis 43

Lɔga Kìdhiganɛa Biniyam Gibsigiye

1 Na Kananɔ hozzo mɛdha na te gɛrsi. 2 Na hunaa Yaykob ko zuga gɛnyɛ dheytaa liwaa bɔɔ honynyɛa Gibsigiyeye, Yaykob sɛɛsɛ erroa gɛnyɛ, “Banda waga Gibsigiye na talda liwa sɛgɛn.”

3 Na Yuhudha nɔng yagɛsɛ chɔgɔnɛ na sɛɛsɛ, “Ngahirronu ku gulsaye annaa bɔɔ ibbashshiy goore na sennagiy, ‘Hunde gochonga nu chinynyo ngadhigannanooye, sɛgɛn ngakitinynyannɛo.’ 4 Nɔng hunde igommogiyɔ na Biniyam kìdhiyo kariye, kɛhɛo na liwa kàtallaginydɔ. 5 Na nɔng hunde mari na eri kari ngakidhiyooye, ngagɔrronu ngakɛhɛoyo. Nɔng ngahirronu anna bɔɔ sennagiy, ‘Hunde gochonga nu chinynyo ngadhigannanooye, sɛgɛn ngakitinynyannɛo.’”

6 Na Isirayel nɔng ghinu na sɛɛsɛ, “Bɔɔ gulsa senɛsɛno, ‘Goonaa nayo chinynyo bare kɔdhɔtto ɔrɔ,’ kɛ ɔng na mɛa kɔchɔllayɛ ngangaye?” 7 Na yɔk seyɛsɛ, “Ay, ngahirronu bɔɔ ngaghinneyyo agge ko zuga ga kumulɔng? Na chɔɔ sennagiyo, ‘Chogonu bere ere oo ngani i basseyɔ? Na gochonga nu kona ihe oo ninggɛ?’ Na agge koyoktɛsɛo ke ngaya ghinnɛiyte. Na hunde dha bɔɔ nɔng anda se keseagiy, ‘Ago dhiganda gochonga nu chinynyoye,’ agge kaggao ori?”

8 Na Yuhudha sɛɛsɛ chɔgɔnɛ, “Eri any kidhiyo ko anye na kayto mɛarrɛ na kibbaysi rɛhiya ga ko erroa ga ngahozzoya bu gɛrɛse. 9 Na eri kɛtɛ siya nanu na kɛ̀bhɛk ꞉anyo shɛɛ. Na hunde ngakidhigannaginyoye, any kète hira kɛddɛi lɔgɔ na gigey kɔ̀tɔlɔ :anyo ko bhee kɛrɛsɛ. 10 Hunde lɔgɔ dirr ngakùgurti, anda chɔɔ bɔɔ ngonu kawakto jagarɛ kɛngi ramman.”

11 Na chɔgɔnɛ yagɛsɛ na sɛɛsɛ, “Yee, hunde wa te wochinde, ibhta dhɔllanga bo ɔngɔna choy choy ko rɛtɛ ko ghimamunya ko dhɔllanga kèmessonɛa zibunya ko kɛnɔ kawara eggissonɛa ngabaya gen na ayɛsɛ ngagulsaonu. 12 Na ibhta tomoga hɔla gaw dhandala ^{▼▼Ngatomokta hɔlde hunde kɛlɛhɛnde, heo ko tunno.} bɔɔ yakkagungɛa na chibɛsɛnɛa kammayiya gu tugi na yaktɛsɛyɔ. Kako ngahirronu bɔɔ dhinyɛsɛn sabba. Na ibhta gee heo ko ga bɔɔ yakkagungɛa na talday liwa. 13 Na dhigana goonu bhɛa ngagulsaonu ke tiri. 14 Na Tumu, Komoruya Ɔana Lɔgɔ Kumulɔng any kichirbhiseong igge na ngagulsaonu kɔgagung Simon na dhiganda ko Biniyam kari. Nɔng anye mɛa kegedhdha hini. Hunde erroa ganyu garayɛye, any kagarayɛ.”

15 Na yɔk ibhta tomoga hɔla gaw dhandala bɔɔ kìyagɛsɛna ko gaa senno katalday liwa ko ahaa senno kayɛsɛ gulsa na dhigana Biniyam na ago Gibsigiye. Na hunaa dokkɛa ngonuye, ago bhɛa Yosebi. 16 Na hunaa Yoseb orro Biniyam ko gɔynggɛye, sɛɛsɛ gulsaa mesinɛna doraa nɛnɛ, “Dhigan ngazukta doraa nanu na in kɛk kona. Kali kɛngɔ keni kussɛo kari.”

17 Na ngahirronu koo eliu zugo na dhiganu dorigiye damiyaa yogɛsɛna :Yosebi. 18 Na hunaa kìdhiganna na ngani ɛlla gɔrɔye, yɔk ɛsɛdhɛ lɔgɔ na se, “Nɔng mɛa bhee kìdhigannanɛiyte a bhɛa bɔɔ yakkagɛiya tomoga hɔla gaw dhandala na ojjɛsɛnɛa kammayiya ga toye. Na mɛa se kuwasiy na kɔtɔk sigiriyaa ga na agge kète gaymanyaa gɛnyɛ.” Na dɛɛbɛ goore.

19 Na hunaa dokkɛa doraa Yosebi warande, ghini gulsaa doraa Yosebi na seyɛsɛ, 20 “Gulsae! Agge bere sabbɔ kohonynyo na katallo liwa ngaya. 21 Na hunaa kowokko na kungusso gɔrɔ na kɔkko kammayiye, karto tomoga gayo hɔla gaw dhandala bɔɔ katalɛo liwa hunde dha kojjɛsɛn kammayiya gayo toyeye. Na ngatomoktonu hɔlde ^{▼▼Tuga Hibiru se, “...ngabirinyaonu ku tunnoye...} mɛa a ngagiya wa kayaktao. 22 Na mɛa chɔɔ wa kohoyayɛo ga kenno kataldɛo liwa gena sɛgɛn. Nɔng hirre bere ibhbhana tomoga gayo hɔla na yagɛsɛn kammayiya gayo toyeye, kimaggoyɔ.”

23 Na gulsaa doraa Yosebi sɛɛsɛ, “Bho ngaɛngɛrso na shurnɛno. Kako inde bere ibhbhana ngabirinyaonu na yagɛsɛn kammayiya guye, a Tumu Komoruya nu ko na babaa nu. Nɔng igge annaa bere gadheonyu shɛɛ.” Na koo dhigana Simon na dhiganɛsɛ yɔk.

24 Na yɔk dhiganu :gulsaɔ doraa Yosebi na aynɛ maa onynyɛa jagarɛ ko lanya ammɛa :sigiriyau. 25 Na yɔk dha bere kòyogɛsɛn lɔga senno kussɛy ko Yoseb kaliyɔ. Na yɔk ibhta ahaa senno kayɛ nɔng na ojjigi kɔk.

26 Na hunaa Yoseb kunnoye, yɔk ayɛ ahaa honynyɛa na tɔgɔndɛsɛ kɔmma. 27 Na Yoseb hunaa issawa yɔk na tewa ushaye, ghinu na sɛɛsɛ, “Ngangaye, hira ku chogonu nyagasa bɔɔ yokkogonyu, a challi hung? Na mɛa ngani i basseyɔ?”

28 Na yɔk yaktɛsɛ na seyɛsɛ, “Baba nayo, hira kachinyi inye, a challi hung. Na nɔng ngani i basseyɔ.” Na tɔgɔndɛsɛ kɔmma na ayɛ diram sɛgɛn.

29 Na Yoseb hunaa gunynyo zugo na orro gɔynɛa jɔnɛ kèleo Biniyambe, ghinu yɔk na sɛɛsɛ, “Gochonga nu chinynyo bɔɔ yokkogonyu a nganda?” Na sɛɛsɛ Biniyam, “Eriya nanu any kutuheny ꞉Tumu.” 30 Na kɛngɔ bhɔdhɛ ke ngaya orɛ gɔynɛye, na bana ke tiri na ogo ghohigiye bhɛa ungusɛa :nɛa na turu sak sak.

31 Na hunaa turra na tewa ushaye, yagɛsɛ hini na chura kawarɛ ma na waga na aynɛ zugo lɔgɔ na kohoyɛy amissɛ.

32 Yɔk dha bere zuga Gibsi ko ga Hibiru kari ngaaminɛo. Bhɛa zuga Gibsi a kullɛ. Na kendiyaa gaminya sizzi na ussɛ bhiy bhiy. Na Yoseb kayɛsɛ amissɛ bhɛa nɛnɛ. Na gɔynggɛ kayɛsɛ amissɛye nɛ bhichang. Na ko yɔk zuga Gibsi ussɛ bhɛa nɛ bhichang. 33 Na gochonginyaa Yosebi tɛlda bay na gɔnydɛ ko Yoseb kawarɛ. Na yɔk gɔnydɛ kɛngɔ na iwachiyɛ ke ngaya dha bere hunde ɛl bayte, ɛlɛ bhuguychinne bhuguychinneye. 34 Na yɔk hunde kajjɛ amissɛa kògɛsɛna Yoseb na kojjo bhɛa nɛnɛye, nɔng Biniyam dha bere kajjɛ amissɛa aynde ammɛa zukte ku hayna. Na gochonginyaa Yosebi irtɛ ko nɔng kari ke ga bo hinisi hɔla.