Genesis 47

1– 2Nɔng Yoseb dha bere bɛrrana gɔynggɛye ku hayna na kidhigan bhɛa komoruya Gibsi na kataktɛyɔ. Na ago na koo Yoseb sɛɛsɛ komoruya Gibsi, “Dha bare baba nanu ko gochonginyaa ganyu banda Kananɔ na zɛktay beo ko mɛdɛrni ko tenɔ ko ahaa gɛ kumulɔng na mɛa ɛl Gesemɔ.” 3Na nɔng ghinu Yoseb gɔynggɛ na sɛɛsɛ, “Anno zukte messo zinggoye ku ɔng?” Na yɔk seyɛsɛ, “Agge kanno zuga kiwonɛno damiya bere kokonginyaa gayo kinginye. 4Na mɛa Kananɔ hozzo a gɛrsi na chɔɔ lanjoya ghɛyɛa beo ninggɛ. Na aynde kiziggonɛo na kabhaktayɛo ngaya bhee chinyiye. Na mɛa agge, zuga kagachinyi, igomogiy na kàbhakto Gesem.” 5Na nɔng komoruya Gibsi sɛɛsɛ Yoseb, “Hunde wa gounggu ko chogonu assainyɔye, 6nɔng ngabaya Gibsiye kumulɔng anna nunu. Na ga aynɛ ngabaya bu chal kèe Gesembe na kabhagatɔ. Na hunde kona a kadhinyogi na ga iwo gooreye, aynɛ gulsamo na chɔɔ tɔgɛsɛ bea ganyu ke sayo na kiwoogonydɔ.” 7Na koo Yoseb dhigana chɔgɔnɛ bhɛa komoruya Gibsi na kataktɛyɔ. Na Yaykob tuhu komoru. 8Na ghinu :komoruyɔ na sɛɛsɛ, “Oynyaa gunyu a isɔng?” 9Na Yaykob nɔng sɛɛsɛ, “Oynyaa ganyu bere kizigɛi jaja na kɔchɔllanɛnɛi ngabaya a 130. Na hunde kɛlɛhɛni ko oynyaa bere zigɛa :kokonginyaa ganyuye, ga ganyu a ko muchugi.” 10Na koo tuhu komoru sɛgɛn na kendɛ na ogo.

11Na koo Yoseb aynɛ gɔynggɛ ko chɔgɔnɛ baa bo challa kènno Ramese ▼

▼Ramese a ɔra iho Gesemɔ.

iho Gibsigiye damiyaa senɛsɛna :komoruyɔ na bhagayɛ. 12Na kɔrgɔrɛ chɔgɔnɛ ko gɔynggɛ ko zuga gɛ liwa bhiy bhiy.

Bɛrgua Ba Anɛa Hozzo Na Yoseb Anɛa Gulsa

13Na hozzo mɛdha na te gɛrsi. Na oree kumulɔng liwa gara dhul. Na zuga Gibsi ko ga Kanani chɔllayɛ ke ngaya hozzo mɛdhdhanɛye. 14Na hoyɛy tomoga hɔla gaw dhandala kumulɔng na talday liwa bhɛa Yosebi na nɔng ibha ngatomoktonu na ojju doraa komoruya Gibsi. 15Na hunaa tomoga gɛ hɔla gaw dhandala taldɛa liwa na gartaye, zuga Gibsi muktiyaa kumulɔng na seyɛsɛ Yoseb, “Mɛa te rɛsɛ! Tomoga gayo hɔla bɔɔ kataldɛo liwa na garta. Ay liwa na kùssoyɔ!”

16Na nɔng Yoseb sɛɛsɛ, “Hunde bare birinyaa gu dheytaoye, ago tɔkta bea gu na kàung liwa.” 17Na yɔk koo tɔkta beo ko tenɔ ko mɛdɛrni ko harteyi ko sigiriya na talday liwa bhɛa Yosebi. Na nɔng ɛa zugo hozzogiye ngaoyoonu dhɔng na ibbaysiu.

18Na hunaa andana :oyo konnɔye, zugo hoya na assa Yoseb na seyɛsɛ, “Gulsae, lɔkte kɛmɛssɛiny inye ninggɛ dhul. Ahaa gayo bɔɔ kɔlɔmmo bɔɔ kedheytao rang na garta. Yɔk tomoga gayo hɔla gaw dhandala ko bea gayo bɔɔ kataldɛo liwa bhɛa nunu na garta kumulɔng. Na mɛa agge kɔlɔmmo rɛhi ko ba sɔng. Ahi kona bhɛa nayo ninggɛ dhul. 19Na mɛa inye gunyey dhɛɛ na kàgarto kɛ ɔng? Baa nayo seni kɔ̀dhɔɛ hɔlɔng hung? Taliy agge ko baa nayo na ayiy liwa na kùssoyɔ. Na agge kèteo zuga kagachcho komoruya Gibsi na baa nayo kete na nɛnɛ. Ngakèrto. Na mɛa ayiy dugu na ba ngaɛddɛnɛ na bhɔlɔ ngaani.”

20Na zuga Gibsi kumulɔng taldɛy ba ke ngaya hozzo anɛ bu na ngaɔanɛoye. Na Yoseb talɛɛ komoru baa Gibsi kumulɔng na te na nɛnɛ. 21Na bhɔdhu zuga Gibsi bhoy na te gaymanyaa komoruyny. 22Na baye dha bere ngani katalloye a baa gɔldangɛa zuga Gibsi sɔng ke ngaya dha taa yɔk liwa ajjɛ :komoruya Gibsi kali kali na hozzo ngani karagɛoye.

23– 24Na Yoseb sɛɛsɛ zugo, “Igge ko baa nu bɔɔ katalungɔ na teo ga komoruyny kari. Na mɛa ibhta ngaduguya kajjungge na dugutɔ. Na ale kolea suniyeo liwa, suni na ilonggo gaminya hayna. Na gambe dhɔnɛ ayɛ komoru. Na gee dhɔynɛye kete ga ale dukko ko amissɛa ammo :iggeu ko erroa gu ko zuga gu.”

25Na yɔk seyɛsɛ, “Gulsae, ngaya bɔɔ ibbaysiyɛiy na messogɛiy lɔga bo challaye, agge kumulɔng any kèteyo gaymanyaa komoruyny.”

26Na ngadamitonu kùsunionɛ liwa na kùmugɛ gaminya hayna na kona kajjɛ komoruye, nɔng Yoseb tɔgɔdhɛsɛ dadab na te kera baa Gibsi dhul. Na ko mɛa toye ngani messɛ nganga. Nɔng baye dha bere komoruya Gibsi ngani katalloye, a baa gɔldangɛa Gibsi sɔng.

27Yɔk zuga bhora Isirayeli dha bere bhakkɛ Gibsi ɔra kèe Gesem. Na te zuga bo aha mɛra na bhɛldɛ na te mɛri. 28Na Yaykob bhagu Gibsi oynya 17. Nɔng dha bere oynyaa bhagɛa ba kumulɔng a 147. 29Na hunaa kolea senno kerɛ tewa jaye, eleo hoynɛ Yoseb na sɛɛsɛ, “Hunde kesea yellony dhereye, ga laya siyɔ na tadhɛ sana nanu na bhiigagany lɔgɔ na chirbhiseony na te hira kɛyɛbhbhinyi dhere. Na hunde ale kɛrɛsiye, ngabaya Gibsiye ngaojjonyi. 30Ɔkkɛany na ojjony bhɛa bere kòjjɛa kokonginyaa ganyu na kawso ko yɔk ngonu.”

Na nɔng Yoseb igomu na sɛɛsɛ, “Ee! Ngadamita yokkogonyde ale kemesiyɔ.” 31Na Yaykob sɛɛsɛ, “Hunde wa igomogonyɔ dhere chiye, ga bhiigagany lɔgɔ.” Na Yoseb bhiigɛsɛ lɔgɔ bhɛa anda ale mesɛa. Na nɔng Yaykob bhɛa ungusɛa hayagiye tɔgɔdhɛsɛ Tumu kɔmma na eterrisanu.