Jam 1 | SuqSC | STEP | Ngadadabta kɔgɔdhdhagung :anyo Yaykobi, hira kagayi Tumu ko Komoru Yesus Kirisos. Na kittonnogung igge, ngagettoya ku 12 bere bhassanyɛsɛno ba kumulɔngge. Na kissaunggɔ, anno challi hung?

James 1

1 Ngadadabta kɔgɔdhdhagung :anyo Yaykobi, hira kagayi Tumu ko Komoru Yesus Kirisos.

Na kittonnogung igge, ngagettoya ku 12 ^{▼▼Ngagettoya ku 12de a gettoa zuga Isirayeli.} bere bhassanyɛsɛno ba kumulɔngge.

Na kissaunggɔ, anno challi hung?

Yɛbha Ko Bho Gaana

2 Gochonginyaye, hunde dokkono lɔga bo mɛra chɔllanɛnɛoye, hinisiya gu any kete ga bo hɔla na gɔnyɔ huna lɔga challa. 3 Yɔk lɔkte dhandal illobbungɛ na se Tumu ngayɛbhbhoye, hunde agga irishshongɛa na senno nyimbɛ lɔgɔ na yɛbhtɛ Tumu gooreye, igge gaoyɔ. 4 Na hunde nyimbo lɔgɔ dirr na hinisi ngani ngakedhdhoo na yɛbhto Tumu dhulde, ngangaye teyo zuga ojjɛsɛno rɛhi hirimo na gao bho na lɔkte gɛrsi ngalɔmmoo. 5 Na nɔng bhɛa nu hunde hir kona imag bhoye, any kogol Tumu na aynde ale kàjjɛ bhɛa gayɛa bhoye. Nɔng Tumu a Komoruya challa hini ngangɔayo ɛdhdhɛttana zugo lɔkke kumulɔng. 6 Na hunde ogol Tumuye, maya yɛbh na ogol surr hinisɔ toye dhere, na ko hini ngadhaginɛo. Nɔng hirre dhaginɛ ko hiniye heo ko zurgaya ^{▼▼Tuga Giriki se, “...heo ko maa yirisiny ɛbbɛkka :ngɔ na hɛa ba konnɔ.”} ɛbbɛkkana :huroyɔ na kɔyɛa bhokkonnɔ. 7 Nɔng ngahirronu bhɛa senno kɔjɔyay lɔk gena bhɛa Komoruyny, maya ngaɛsɛdhdho 8 ke ngaya lɔga ɛsɛdhdha :nɛa anɛ ramman na dhaginɛnɛ ko hini kali kaliye.

Lɔga Hini Hɔldina Hira Aha Ningginɛna Ko Lɔga Hira Aha Mɛra

9 Gochongge ku bhoyogi marrɛ :zuguye, hinisa nɛnɛ any kete hɔli ke ngaya dhɔngɛ :Tumu na anɛ hira boye. 10 Na ko nɔng gochongge bu lɔ aha ku dɛlɛlɛyte, hinisa nɛnɛ any kete hɔli ke ngaya lachchanɛ :Tumu na anɛ hira chinynyoye. Nɔng ngahirra bu aha mɛrte heo ko kɛya hulno na ale uruttono. 11 Na su hunde ujjono na kɔn ngakɛtonu hulende, mudhugu na urutinya na ɛa nɛnɛ bo challa garasɔ. Na ko nɔng ngahirronu bu aha mɛrte, hunde ngani me ngagaymoa nɛnɛye, urutinya na gara nganga.

Lɔga Dokkonɛa :Zugu

12 Hirre nyim lɔga kìllobɛaye, a tuhinɛ ke ngaya iriynɛnɛ na anɛ dhandaliye. Nɔng ale ajjɛ :Tumu basseya iho dhul ko kingi damiya bere bhiigɛsɛna zuga ibhɛsɛnɛa nɔng hinisi.

13 Na hirre killob :lɔk genneye, ngakese, “Wa illobonyɔ :Tumu.” Tumu nɔng lɔga gɛrsa ngaillobbiysho. Nɔng chɔɔ anna lɔga gɛrsa ngakìlobboo. 14 Na nɔng bhee killobbɛiyte, a ngaya kìchirkanɛ lɔga gɛrsa kìhinnono sabbiya ga na itabhbhaniyɛye. 15 Na ngalɔktonu gɛrɛ kìhinnono :aggeuye hɛ na mesiyɛ na kɔ̀lɔ ridhing. Na ngaridhinggonu hunde idhigisɛɛ na te buye, ujjukkey na kɛ̀rɛsɔ.

16 Ngagochonginyaa ganyde, ^{▼▼Tuga Giriki se, “Ngagochonginyaa gany keyellungge,...”} ngakitabhtung :genne go! 17 Yɔk lɔkte chal tuhinɛ na ɛl hurrte kumulɔng hony surr tumɔ bhɛa Babaa na Tumu, bere ghendono su ko tagi ko munyunya. Nɔng chɔɔ anna ngabhɔdhinɛnao na ziggoo huna rijjuny. 18 Nɔng anna bere bɛrraniy na yokkogiy lɔga gɛnyɛ ku dhere na kàbayɛyɔ. Na agge bhɛa ahaa bere ghendono kumulɔng kète ga ku sabba. ^{▼▼Ngalɔkta ɛlɛhɛnnɛ lɔga zuga Isirayeli hunde ajjɛ Tumu liwaa gɛ eggissonɛa sabbɔ oo ahaa gɛ bhɛllinynyana sabbɔye. Yɔk ibhbhanɛ liwaa gɛ eggissonɛa sabbɔ oo ahaa gɛ bhɛllinynyana sabbɔ na ajjɛ Tumu.}

Lɔga Kìshikko Na Maya Kùrrugɛsɛna

19 Ngagochonginyaa ganyde, ^{▼▼Tuga Giriki se, “Ngagochonginyaa gany keyellungge,...”} ga shigitɔ! Hunde dokkono lɔgɔye, chirara shɛɛ na tunggɛsɛ haalɛ. Shaw hung ngadharachinynyano na wologinɛno 20 ke ngaya dɛmneya zugony imaginɛnɛ ko lɔga hinno :Tumu ridhing ningginɛnaye. 21 Na mɛa dhɔyɔ kuhuyamo ko ngalɔkta bu mɛr gɛrɛse kumulɔng na layta rɛhi na tɔlɔmɔ ngalɔkta kèe bayɛ :iggeu bere ajjung :Tumu na lɔmmo hinisichinneye.

22 Ngatiranydɛ rɛhi na te zuga shikko lɔga Tumu nyabha sɔng! Shigi na urruktɛsɛyɔ. 23 Hirre shik lɔga Tumu na ngaurrugɛsɛnnoye, hɛt ko hira terinynɛna mirayagiye, 24 na hunde tewa ushaye, botto gɔrre hinde. Na ɛa nɛnɛ hunde wa i ɛnɛngge, dhinyɛsɛna sabba shaw hung. 25 Na nɔng hirre guny damiya challa iho hurr obhonisisɛna zugo bhɛa hɔla na marak shɛɛ na ngadhɔtto na sabba ngadhinyɛsɛnnoye, lɔga messo :nɛa kumulɔng ale tuh :Tumu.

26 Hirre se, “Kani hira kɛbhɛgi lɔga Tumu shɛɛ,” na tuga nɛnɛ ngakabhbhoye, nɔng ngangaye, tiranyɛ rɛ na bhɛa bhɛgɛa lɔga Tumu dhaa a butogi. 27 Yɔk lɔkte chal hinnogiy :Babaa na Tumu na kɛ̀bhɛgɛ na ridhing ngakɔ̀lɔmiye a ɛnɛnggeo, kèe kɛ̀ya erroa ku bhoyoga ko tɛrroa ku bhoyoga ^{▼▼Ngalɔkta ɛlɛhɛnnɛ tɛrroa zuga gɛ bere rɛssɛa.} chɔllanɛna na kɛ̀bhɛgɛ rɛhiya ga bhɛa lɔga gɛrsa lɔmmɛa ridhing messɛa :zugu.