Jam 2 | SuqSC | STEP | Gochonginyaye, igge ba ngalɛllo ke ngaya anɛo zuga yɛbhbho Komoruya na lɔmma diram Yesus Kirisose.

James 2

Lɔga Maya Ba Ngakɛ̀lɛlɛayo

1 Gochonginyaye, igge ba ngalɛllo ke ngaya anɛo zuga yɛbhbho Komoruya na lɔmma diram Yesus Kirisose. 2 Ngamɛa ga kɛ̀lɛhɛnagung lɔgɔ. Anda hunde zukte ku ramman kohoya bhɛa nu muknyɛsɛno, na kona kete hira bo aha mɛra chibinɛna ruminyaa bo challa na malukko worginya, na kona kete na aha ningginɛna malukko korsi, 3 hunde lɛllano na lɔmma aha na senɛsɛno, “Wonga, tɛ alleyta chalde bheya!” Na naa aha ningginɛna kɛo na senɛsɛno, “Chil ngonu!” oo “Tɛa bay dheyyɔ ngonuye,” aynde ale i ɛnɛng? 4 Igge hunde messo ngangaye, ngalɛlloo ba kɛngɔ na ɛsɛdhdhoo lɔga gɛrsa na lɔgɔ kedhdhoo gɛrrɛng?

5 Ngagochonginyaa ganydeye, ga shiktonyuyɔ! Zuga aha ningginɛna bay ngaya ngayo gee bere bɛrrana :Tumu na kɔtɔlɔmɔ yɛbhaa bo dhandala na kɛsɛrɛ baa bere bhiigɛsɛna zuga ibhɛsɛnɛa nɔng hinisiye? 6 Ga tunggɛsɛyɔ se. Igge dha bere kɛo zuga aha ningginɛna hɔlɔng hung. Yɔk ngazukta bu aha mɛrte ngayo ngagiya tiranynyɛungɛ kali kali na dhigannungɛ hana kedhdhɛa :zugu lɔgɔ na chillɛungɛye? 7 Yɔk chɔɔ ngayo gee dhɔmmɛ ngasarra hirre bu lɔ diram allinɛnɛung iggeye rɛ?

8 Nɔng hunde bhɛgɛ lɔga ɛlla dadaba Komoruya na Tumu ku damiya nɛnɛ sennɛa, “Zugo teyel huna rɛa nunu,” anda messo shɛɛ. 9 Na nɔng hunde lɛllo baye, anno zuga messo lɔga gɛrsa ujjukkanungu :kera Tumu na lɔmmo ridhing. 10 Nɔng hirre bhɛk Damiya Tumu kumulɔng na ɛddɛ dhɔnɛye, ngangaye ɛddɛu kumulɔng. 11 Nɔng Komoruya bere sennagiy, “Lollumo ngamesso,” anna bere sennagiy, “Zugo ngakɔdhdho.” Na chɔɔ ko hunde lollumo ngamesso na tɔgɔdhɔ zugo, nɔng ngani anno zuga ɛddɛo Damiya Tumu chi!

12 Na mɛa yokto lɔgɔ na mesigi shɛɛ ke ngaya ale Tumu ɛlɛhɛnɛ lɔga gu na maragɛ ko damiya obhonisionɛa zugo bhɛa hɔla na kedhdhɛ lɔgɔye. 13 Na nɔng hunde ale ken lɔga zugonyde, hira bere chirbhiseo zugo ale bho ngaɛngɛrɛsso. Na nɔng inde bere zugo ngani kichirbhiseoye, ko nɔng Tumu ngachirbhisiyo.

Hunde Kɛ̀yɛbh Lɔga Yesusi Na Lɔga Challa Ngakèmessoye, Bhee Ku Hologunde A Inong?

14 Gochonginyaye, hunde hir kona kese, “Kɛyɛbhi lɔga Yesusi,” na lɔga challa chirbhisia zugo ngani kemessoye, bhee ku hologunde a inong? Hunde yɛbh lɔga Yesusi ngadamita messɛ ngangaye, aynde ale kìbbaysiyɔ ka? Ngakìbbaysiyo. 15 Kako hunde gochonga na oo ngɔnaa na kona rum ninggɛ na wo hɔlɔng na chɔɔ kesea dhak :hozzo, 16 na igge ittonno na senɛsɛno, “Ok shɛɛ, ke na bo challa! Na amissɛ ko ruma ibhɛi chiwan any kainy :Tumu,” na ngani ɛyaoye, bhee ku hologunde a inong? 17 Ko agge hunde kɛ̀yɛbh lɔga Yesusi na lɔga challa kìchirbhisiyɛa zugo ngakèmessoye, yɛbhaa na hologun ninggɛ. ^{▼▼Tuga Giriki se, “Yɛbhaa na a rɛsi.”}

18 Na nɔng hunde kɔtɔlɔ hirre sennagany, “Inye yɛbhi lɔga Yesusi. Na anye kemesi lɔga challa kichirbhisiyɛi zugo,” anye kesenɛsɛn, “Ga dhɔlagany bhee yɛbhɛ lɔga Yesusi hunde lɔga challa chirbhisiyɛi zugo ngani messoye. Na ko anye kɔ̀dhɔlaginy bhɛa kɛyɛbhɛi lɔga Yesusi hunde kemesi lɔga challa kichirbhisiyɛi zugoye.” 19 Hunde barar Tumu sɔngge nɔng a nganda yɛbhiye. Na ngaya yɛbhɛye, a challi. Chɔɔ ko yɔk mɛnɛnga a ngagiya gaɛ na ɛngɛrsɛ na bharrittɛ tik tikte.

20 Ngahirra dalnɛnde, hunde kɛ̀yɛbhɛ lɔga Yesusi na ngalɔkta chal kìchirbhisɛɛ zugoye ngakèmesi, seni kùdhugunoginy bhɛa hologun ningginɛna dha? 21 Ga tungɛsɛ lɔga bere kokonga na Awurahami! Lɔkte bere me :nɛa na kɔgɔnyɛ :Tumu ke hira ridhing ningginɛnaye a lɔk giyong? Bere ngamessoo lɔga yokkono :Tumu na ibhbhanao eriya nɛnɛ ^{▼▼Tuga Giriki se, “...eriya nɛnɛ Isak...”} na kuddulɛsɛayo Tumu dha? 22 Nɔng a nganda bere yɛbh lɔga yogɛsɛna :Tumu na messe. Na hunaa messoye, yɛbhu Tumu goore. Na bhɛa yɛbhɛa Tumu ko bhɛa mesɛa lɔgɔ, bere anna dhɔnɛ. 23 Dadaba lɔga Tumu annaa senno, “Awuraham yɛbhu Tumu. Na yɛbhaa nɛnɛ gɔnyu :Tumu na bhɛa nɛnɛ te hira bo hɔla ridhing ningginɛna.” Na ngalɔkta urruknyɛsɛ na ko mɛa toye Awuraham keli “Dehunya Tumu.” 24 Ga argitɔ, hiri hunde kɛyɛbh lɔga Tumu sɔng, Tumu ngagunyo ke hira hɔla ridhing ningginɛna. Nɔng hunde me lɔga challa hinno :Tumuye, aynde anɛ hira hɔla ridhing ningginɛnaye.

25 Chɔɔ tɛriya bere ku hummey kènno Ngarahab huna bere lammana zuga Isirayeli ku rotoga na ullugunynyo na dhɔlɛsɛna ganggu, Tumu annaa gunynyo ke hira ridhing ningginɛna. 26 Ngangaye, hunde rɛa hiriuny dhɔyu :kuloya nɛnɛ basseynyde, ngangaye dha ere. Ko nɔng hunde hiri yɛbh Tumu na lɔga gɛnyɛ challa ngani kemessoye, bhɛa yɛbhɛa Tumu hologun ninggɛ.