Jam 3 | SuqSC | STEP | Gochonginyaye, bhɛa nu zuga madhdhɛa zugo lɔga Tumu any kete muchugi ke ngaya zuga madhinɛna ale maragɛ :Tumu goore kalde ale kedhdhɛ lɔga zugonyde.

James 3

Lɔga Kàgabhɛa Tugiya Ga

1 Gochonginyaye, bhɛa nu zuga madhdhɛa zugo lɔga Tumu any kete muchugi ke ngaya zuga madhinɛna ale maragɛ :Tumu goore kalde ale kedhdhɛ lɔga zugonyde. 2 Agge kumulɔng kɛddɛ lɔga bo mɛra tii tii. Nɔng hirre kabh tuga nɛnɛ na lɔga gɛrsa ngayokkonoo dhulde, a hirre hɔl hurr ridhing ninggɛ na bhɛk rɛa nɛnɛ lɔkke kumulɔngge.

3 Nɔng agge hunde kìbhbhana bɛa dɛmna ku ari na kɔ̀gɔdhdhɛsɛn mɔsay dhagalay na kùbuyte, torrono :rɛ wanney na chil lɛtɛtɛm na kème damite kìhinde. ^{▼▼Tuga Giriki ɛlɛhɛn lɔga harteny na se, “Na agge hunde kìbhbhana hartey na kɔ̀gɔdhdhɛsɛn mɔsay dhagalay na kàdhɛsɛn wochinde, shik :rɛ wanney na kɔ gɔrre kìhinde.”} 4 Oo ga chɔɔ kɛ̀lɛhɛnagung lɔga gongguluny. Gonggul hunde ko kete bu goore na kɛbbɛk :ngɔ, hira kulinɛna kulinɛ kalmaa chinynyo godhe na ɛlɛhɛnɛsɛn gɔrre hinde. 5 Na ko nɔng kayɔ bhɛa rɛhiya ga a galiya chinynyo godhe na nɔng dhunggur na yokkono lɔga bo bibiyo. Ga ɛsɛdhɛ goa amma kɔshiya bo goore. Sabbɔ ngabansanao goa chinynyo godhe dhɛdhɛseono? 6 Ko nɔng kayɔ heo ko go. Nɔng bhɛa rɛa na kumulɔng, kayɔ a kɛga dɛmna lɔmma lɔga bo gɛrsa ku kuhuyamo. Na se kigidhigan rɛa na kumulɔng na basseya na kɔshɔgɛ :goa bere tissana iho dhul ko kingi.

7 Nɔng hiri bhɛa ɛdhɛmisiyɛa kɛginyaa dusuny ko shɔa ko gala silolnɛna bay bay ko ga ɛlla ma toye kumulɔng na dhagɛsɛnɛa zugo rɛhi ɔanayɔ. 8 Na nɔng hirre ɔana kayɔ ninggɛ. A galite ku kuhuyagite gɛrsi lɔ madhdhaa kɛ̀rɛsɛa.

9 Nɔng kayɔ kèterrisanɛ Baba na Tumu, na tanda kɔ̀chɔrɛ zuga gɛnyɛ bere ghendono :nɛa na ɛlɛhɛnɛsɛna ɛya nɛnɛ sɛgɛn. 10 Yɔk lɔga etterisanuny ko ga chɔrayuny bhonsanɛ ngatukta ku dhɔnɛye. Gochonginyaa ganyuye, maya nganga ngakèmesso. 11 Ngangaye, anda ɛlaa dhɔnɛna maa bo choyo ko ga chamamaga kari dhudhuttanɛyɔ? Ngadhudhuttanɛo. 12 Gochonginyaa ganyuye, anda dhudhubanggurray kawara girariny dhungnganayɔ? Oo aynde mannigoy ^{▼▼Tuga Giriki se, “...woyn...”} kawara dhudhubanggurrany dhungnganayɔ? Ngadhungnganɛo dhul. Ko yɔk maa chamamaga ko ga bo choyo ɛlaa dhɔnɛna ngadhudhuttanɛo.

Lɔga Bho Gaanaa Bany Ko Naa Tumony

13 Bhɛa nu hirre ga bho na ɛsɛdh lɔgɔ shɛɛ ihe? Yee, hunde iheye, any kalaya rɛ na keme lɔga challa na kabhak ba zininigiye. Na hunde me ngangaye, aynde kàggaɛ bhɛa anɛa hira gaa bhoye. 14 Nɔng igge hunde chirkanno lɔga zugony na hinisi wawusɛ na ɛsɛdhdho lɔga sabbiya gu sɔngge, ngadhunggurro na senɛsɛno zugo, “Agge kanno zukte kaggao bhoye,” na mallo lɔga ku dhere. 15 Nɔng bho gaanaye ku ngangaye anna ɛsɛdhdhanɛa :zugu bany ngaya ko na imaginɛna ko Kuloya Tumu ko na ajjɛa :Moldoyɔ. Na ajjiy :Tumu ngayo. 16 Hande ɛlɛ zuga chirkannɛa lɔgɔ na ɛsɛdhdhɛa lɔga sabbiya gɛ sɔngge, ngoonu lɔ lɔga gɛrsa ku kuhuyamo ko zuga bhoriyɛa ba.

17 Bho gaanaa ajjɛa :Tumu zugo nɔng anna ridhing ningginɛna. Na zuga sennana :Tumu na gayɛa bho yɔk agga bhakkɛa ko zugo kari ke ga bo challa ibhinɛna hinisi shɛɛ na lachchanɛa rɛhi na chirbhisiyɛa zugo goore na messɛa lɔga challa. Na chɔɔ agga ba ngalɛllɛayo na messɛa lɔga yokkonɛa dib. 18 Nɔng hira ɛngɛriseo zuga ɛkkɛnyannɛna na hinisi ɛllanɛa bay, heo hira dukko dugua challa. Na ngaduguonu dukte ale chillɛa na eggissonɛa kawara challa ridhing ningginɛna.