Joh 15 | SuqSC | STEP | “Kɛya ku woyna ku dhere kani :anyo. Na nɔng Baba nanu a hira ulalnɛna.

John 15

Lɔga Ɛlɛhɛnnana :Yesusi Lɔga Kɛyɔ Banggurra Ko Ga Lɛwanyany

1 “Kɛya ku woyna ku dhere kani :anyo. Na nɔng Baba nanu a hira ulalnɛna. 2 Na kedhdhana lɛwanyaye ujjonɛ bhɛa nanu na kawarɛ ngadhungnganɛoye bhoy na ujjuktɔ. Na yɔk gee dhungnganɛ kawarɛye, me shɛɛ na kedhdhana na kɔshɔyay :lɛwanya genne na keggiyo kawarte mɛri jorronɛ ga bɔɔ sabbune. 3 Na igge mɛa ɛllo hurr ke ngaya yɛbhɛo lɔgaa kamadhdhagungu :anyoye. 4 Na mɛa kɛ̀tɛldi kari ko anye na ngakègennɛ. Nɔng kɛyɔ lɛway ko banggurra ^{▼▼Woyn a kɛte hɛt ko kɔllɔlɔri na bhichang ngachillo. Hunde childe, hɛt ko kurmay oo gindiya dhisɛna rɛ kɛnɔ na chillana. Na bhɛa ku banggurra hɛo morok. Na hunde dhunga kawarɛ na eggiuye zugo dhuchchanɛ na chudhdhɛ na messɛ ke gimay.} hunde ɛl bhiy bhiyye, lɛway bhee dhungnganɛ kawarɛ bhichang ninggɛ. Na ko igge hunde dhɔttanyu na kari ngani ngakɛlloye, bhee dhungnganɛo kawarɛ bhichang ninggɛ.

5 “Nɔng anye kani woyn bhɛa ku banggurra na igge anno hana ku lɛwanya. Na hirre kɛllo ko anye kari na ngakegenɛnooye, nɔng ale dhungngana kawarte mɛri. Na ko igge hunde dhɔttanyu na kari ngani ngakɛlloye, lɔkte messo bhichang ninggɛ dhul. 6 Nɔng hirre ko anye kari ngakɛllooye, heo lɛwaya kùjjukko na dhɔrɔgɔsa. Yɔk lɛwanyaye ku ngangaye, kùmukkana na kujjugɛsɛn go toye na ambɔ. 7 Na nɔng igge hunde kɛ̀tɛldi ko anye kari na tɔlɔmɔ lɔga ganyu hinisichinne, anda lɔkte hinnono na ogollo Tumuye kumulɔng, ajjunggɔ. 8 Na hunde dhungga kawarte mɛri na dhɔlda bhɛa anɛo zuga kɔbhbhanyu anye dhere, anda ajjɛo Baba nanu diram.

9 “Na damiya bere ibhbhagɛanyi :Babaa nanu hini, ko anye annaa bere kibhagungngɔ hini. Na mɛa kìbhtɛ hinisi na kɛ̀tɛldi kari ke dhɔnɛ. 10 Nɔng hunde mesigi lɔga kajjungu :anyo, anda kɛ̀l kari na kibhbhagung hini ngadamita bere ko anye kemesɛ lɔga ajjanyi :Babaa Nanu na ko mɛa toye ngani ibhbhagɛany hiniye. 11 Nɔng bhee koyokkogɛung ngalɔktaye, a ngaya keni hinisiya gu keteyɛ hɔli goore hunde nande na chɔɔ keteyɛ hɔli goore dhogoniye. 12 Na mɛa lɔkte kajjungge a ɛnɛnggeo, ibhtɛ hinisi ngadamita kibhbhagɛung :anyo hiniye. 13 Nɔng hirre ibhbhana rɛa nɛnɛ na rɛsɛ dehunyɛa gɛnyɛye, dhaa a hira ibhɛsɛna yɔk hini dhere. Na chɔɔ hirre ibhɛsɛn zugo hini na jorrono ngahirra, ninggɛ dhul. 14 Na ko igge hunde mesigi lɔga kajjungu :anyo, anda anno dehunyɛa ganyu. 15 Na igge kalda wurtɔ anye gaymanya ngani ngakeleungo ke ngaya gaymay lɔga messo :gulsaa nɛnɛ imagɛye. Na mɛa anye keleung dehunyɛa ganyu ke ngaya wa kudhugunnogɛung lɔga bɔɔ kishikkani bhɛa Babaa nanu kumulɔngge. 16 Nɔng igge annaa ngani bɛrtaganyuo. Na nɔng anye annaa bere kɛbɛraungɔ na ago na dhungga kawara bo mɛra ɛlla dhul ko kingi. Hunde messo ngangaye, lɔkte hinnono na ogollo Baba nanu sara ganyuye, kumulɔng ajjunggɔ. 17 Na mɛa lɔkte kajjung :anyoye a ɛnɛnggeo, ibhtɛ hinisi!

Lɔga Zuga Marrɛa Tumu Ale Marɛa Zuga Kɔbhbhɛa Yesus

18 “Na hunde tamartung :zuga marrɛa Tumuye, tagatɔ hunde a zuga bere marrananyɛa anye kingiye. 19 Igge hunde te zuga marro Tumu dhere, anda yɔk ibhbhagungɛ hinisi huna zuga gɛ. Na nɔng mɛa bhee marrɛungɛ :yɔkkuye, a ngaya bere kɛbɛrranɛung bhɛa nɛ na anɛo zuga ganyuye. 20 Ga tunggɛsɛ lɔga bɔɔ koyokkogungu na kesennagungu, ‘Bhɛa gaymayuny, bu komoruya nɛnɛ.’ Yɔk hunde kete zuga bere bhɛkkɛa lɔga ganyu, anda ko yɔk bhɛkkɛ lɔga madhɛsɛno :iggeu. Na hunde agga bere hanganyɛa anyeye, ko igge ale hangungɛ nganga. 21 Na bhee ale tiranynyɛungɛ ngangaye, a ngaya anɛo zuga kɔbhbhanyu anye na chɔɔ imagɛ hira bere ekkononyiye. 22 Nɔng anye hunde bere ngakuguni na lɔgɔ koyogɛsɛni, anda bhee kùjjukkanɛ yɔk lɔga gɛ gɛrsa ninggɛ. Na nɔng mɛa bhee ale kɛnganɛ :yɔkku lɔga gɛ gɛrsa ninggɛ. 23 Hirre marrany anyeye, ngangaye dhaa mar chɔɔ Baba nanu chi. 24 Nɔng anye hunde bɔɔ bhɛa nɛ lɔga bo dhandala chɔɔ hir kona ngani kemessao dhul ngakemesi, anda bhee kùjjukkanɛ lɔga gɛ gɛrsa ninggɛ. Na chɔɔ yɔk ko hunde kargi ngalɔkta bu dhandal kemesi :anyoye, yɔk ngani marranyɛ anye ko Baba nanu chi. 25 Na yɔk bhee messɛ ngangaye, a ngaya se kurruknyɛsɛ lɔga bere kɔ̀gɔdhdhɛsɛna dadaba Damiya nɛ sennɛa, ‘Bere marranyɛa hɔlɔng hungge.’

26 “Nɔng anye ale kekkogung Hira ɛlla ko Baba nanu Irishshongngu igge. Nɔng ngandonu a Kuloya kunno bhɛa Babaa nanu na dhugunɛsɛna zugo lɔga ku dhere. Na nɔng hunde ale kunde, kɔbhɛsɛn zugo lɔga ganyu. 27 Na ko igge maya kɔbhɛsɛno zugo lɔga ganyu ke ngaya bɛrgua bere kɔgɔdhdhanɛi madha kɛlɛ kariye.