Joh 5 | SuqSC | STEP | Na kali kona koo Yesus dhɔngɛ Yerusalemɔ ke ngaya zuga Ayhudhi bere lɔmmɛ gibiriye.

John 5

Lɔga Ibbaysiyɛa :Yesusi Hiri

1 Na kali kona koo Yesus dhɔngɛ Yerusalemɔ ke ngaya zuga Ayhudhi bere lɔmmɛ gibiriye. 2 Na Yerusalemɔ, warana kèe Warana Mɛdɛrniuny jaa bere lɔmma bangeyte dhey dhey lukkanɛ rabtaye ku hayna. Na ngabangeytonu tuga Hibiru kèli Betezata. 3 Na zuga chɔllaa bhoyɔ ga bo mɛra bere ungussɛa ngonu. Yɔk ngazuktonu gena bere anna zuga ku anyakuwanda ko ga kawarɛ chaga ko ga chudhinɛna. [Na bhɛkkɛ ma churr hunde kesea chukinɛye. 4 Na dha taa hira ekko :Komoruyɔ Tumu kun na chuki ma. Na hirre bɔrrɔyɛsɛn ma sabbɔye bassɔ.] ^{▼▼Dadabinyaa Lɔga Tumu tuga Giriki gena ngalɔkta ɛl sizziyɔ wurtɔ ko wushɔye ninggɛ.} 5 Na ngonu bere lɔmma hirre dha bere chudhinya kingi oynya 38. 6 Na Yesus aru ngahirronu na tagu hunde dha bere chudhinya kingiye, na ghinu na sɛɛsɛ, “Bhɛa seni bayɛ hiniyɔ?”

7 Na hira chudhinɛna yagɛsɛ na sɛɛsɛ, “Komorue, anye hunde ma chukininyaye, hirre kɔyɛany toye ninggɛ. Na hunde keni kùjjugɛsɛ rɛye, jimmanany :konnɔ na dok sabbɔ.”

8 Na sɛɛsɛ :Yesusi, “Bana! Ibha hayaa nunu na ogo!” 9 Na hiri bau nga hung. Na bana na ibha hayaa nɛnɛ na ogo.

Nɔng ngakaldonu bere anna Kala Ayawsuny 10 na gulsachina Ayhudhi seyɛsɛ ngahirronu wa kìbbaysiye, “Mɛa a Kala Ayawsuny na hayaa nunu ngalɔgɔni ke ngaya damiya na anɛ kullɛye.”

11 Na nɔng yagɛsɛ na sɛɛsɛ, “Hirre wa ibbayseonyde wa sennaganyi, ‘Bana, ibha hayaa nunu na ogo!’”

12 Na ghini na seyɛsɛ, “Inde wa sennaginy, ‘Bana ibha hayaa nunu na ogoye, a nɛng?’” 13 Nɔng ngahirronu kìbbaysiye hunde bere ibbaysi :noyye, imag ke ngaya zugo bere anɛ mɛri na Yesus garsɛsɛn zugo toyeye.

14 Na koo Yesus itinynyandɛ ko hiraa gina doraa Tumu barara na sɛɛsɛ, “Ani nganda wa bauye. Mɛa lɔga gɛrsa sɛgɛn ngamesi! Hunde mesiye, ale kalda kesea dokkon lɔkte gɛrɛ jorronɛ ilagaya bɔɔ sabbune.” 15 Na ngahirronu koo ogo na yogɛsɛ gulsachina Ayhudhi hunde dhaa ibbaysi :Yesusiye.

Lɔga Madhɛsɛna :Yesusi Zugo Bhɛa Bassey Jɔanɛa Bhɛa Eriya Tumu

16 Na gulsachina Ayhudhi kɔrta Yesus ke ngaya wa mesɛ ngalɔkta Kala Ayawsunyde. 17 Na nɔng Yesus sɛɛsɛ, “Baba nanu nɔng mesinɛ tii tii chɔɔ mɛa toye. Na ko anye kemesinɛndɔ.” 18 Na yɔk hunaa shikkɛa ngalɔkta yokkonoye, kalda dɛbɛ goore na lami bhee se kɔgɔndɛ ke ngaya mesɛ ngalɔkta Kala Ayawsuny na chɔɔ ɛlɛhɛnɛsɛn Tumu rɛ na senɛ, “Tumu a Baba nanuye.”

19 Na Yesus yagɛsɛ na sɛɛsɛ, “A challi, ga shigitɔ! Lɔkte me :Eriya Tumu bhichang ninggɛ. Nɔng me lɔga orrono bhɛa Chɔgɔnɛ sɔng. Yɔk lɔkte me :Chɔgɔnɛye ko nɔng messɔ. 20 Nɔng Baba Tumu ibhɛsɛn Eriya Nɛnɛ hini na dhɔlɛsɛn lɔga messo kumulɔng. Na chɔɔ ale dhɔlɛsɛn lɔga bo jorronɛa ngalɔkta na iwachinɛnoyɔ. 21 Na ngadamita Baba Tumu dhɔngnganɛ zuga rɛsɛa na ajjɛ basseyte ko nɔng Eriya Nɛnɛ zukte hinnonoye, ajjɛ basseya iho dhul. 22 Nɔng mɛa Baba Tumu lɔga zugony ngakedhdho. Buyna kedhdhɛa lɔgɔ kumulɔng annaa bere aynɛa Eriya Nɛnɛ 23 na zugo kumulɔng kayɛ Eriya Nɛnɛ diram ngadamita ajjɛ chɔɔ Chɔgɔnɛye. Na nɔng inde Eriya Tumu diram ngaajjɛoye, ko nɔng Baba Tumu, hira bere ekkono Eriya Nɛnɛ, ngahirronu diram ngaajjɛo.

24 “A challi, ga shigitɔ! Inde shik lɔga ganyu na yɛbh hira bere ekkononyiye, ngangaye, tɔlɔmu basseya iho dhul na jaru rɛsɛ na ogo bhɛa basseyny na ale ngani ngakujjukkanao. 25 A challi. Ga shigi shɛɛ! Kolea ale shigɛa :zuga rɛsɛa ^{▼▼Nɔng ngarɛsɛya ɛlɛhɛn bhɛa hiri Yesus ngani kɛyɛbhɛayo. Na hunde hiri yɛbhu Yesuse, jɔanɛa bassey.} lɔga yokkono :Eriya Tumu ale kundɔ. Na chɔɔ ngakoleonu a mɛa toye rɛ. Na gee ale shikkɛye bassɛyɔ. 26 Nɔng Baba Tumu, a ɛnaa basseyny. Na chɔɔ annaa bere ibhaa Eriya Nɛnɛ na ojja na tewa hira ku ɛnaa basseyny hunde nɛnde. 27 Na chɔɔ annaa bere aynɛa buyna kedhdhɛa lɔga zugony ke ngaya anɛ Hiri Hoynɛye.

28 – 29 “Na igge ngaiwachi ngalɔkta. Nɔng kolea ale shigɛa :zuga bere rɛsɛa ɛlla igingo lɔga yokkono :Eriya Tumu ale kun na yɔk bansanɛ rɛsɛyɔ. Na ga bere messɛa lɔga challa ale bansanɛ na kajjɛ bhɛa ɛlɛa basseyɔ. Na yɔk ga bere messɛa lɔga gɛrsa ale bansanɛ na kùjjukkana na kàttiyɔ. 30 Yɔk lɔkte kemesi :anyo bhichang ninggɛ. Anye kegedhdhi lɔga kishikkani sɔng na yɔk ɛl dib ke ngaya kemesɛ lɔga hinno :hira bere ekkononyi sɔng na ga kihinnoni :anyo ngakemesɛoye.

Lɔga Yokkonɛa :Yesusi Zuga Kɔbhɛsɛnɛa Zugo Lɔga Gɛnyɛ

31 “Nɔng anye hunde kɔ̀ɔbhɛsɛ zugo lɔga ganyu, yɔk ale ngayɛbhbhanyɛo, ke ngaya koyokkonɛ :ɛnaye. 32 Na nɔng hira kɔbhɛsɛna zugo lɔga ganyu kona ihe. Na chɔɔ ngalɔkta gany kɔbhɛsɛn :nɛa zugoye hunde a dhereye, anye kaggayɔ.

33 “Nɔng igge annaa bere ekto zugo bhɛa Yohanisi, na nɔng kɔbhagungɔ lɔga ganyu ku dhere. 34 Nɔng anye bhee koyokkogɛung ngalɔktaye, a bhɛa keni bayɛ :iggeu. Bhɛa kalamiɛy zuga bere orronɛa lɔga ganyu kawarre, anye ngakɔtɔgiyo. 35 Nɔng Yohanis bere hɛtta ko goa walda na abakkanna ba. Na ko igge annaa tɛhɛndo hɔldina nɛnɛ na hinisiya gu keteya hɔli bɛrgunyaye muchugi.

36 “Na nɔng anye kɔlɔmi lɔga bere korroni na keni kɔ̀ɔbhɛsɛ zugo jorronɛa lɔga bere kɔbhɛsɛna :Yohanisi zugo. Yɔk a lɔga bere ajjanyi :Babaa nanu Tumu na kùrrugɛsɛyɔ. Na ngalɔkta kemesi :anyo mɛa toyeye, dhɔllanɛ bhɛa bere ekkononyɛanyi :Babaa nanu Tumu. 37 Nɔng Baba Tumu, hira bere ekkononyi rɛ, ko nɔng annaa bere kɔbhɛsɛa zugo lɔga ganyu. Na igge nɔng tuga nɛnɛ ngani shigito dhul, na ɛa nɛnɛ ngani argito, 38 na chɔɔ lɔga gɛnyɛ bhɛa nu ninggɛ dhul ke ngaya hira bere ekkono :nɛa ngayɛbhɛoyoye. 39 Nɔng igge toyeo dadabinyaa Lɔga Tumu goore na marakko ke ngaya senno ale jɔanɛo ganggua basseya iho dhulde. Yɔk ngadadabinyaonu agga yokkɛa lɔga ganyu 40 na nɔng igge anno ngagiya marro bhɛa keni hoyɛy gɔra nanu na jɔyay basseyte.

41 “Nɔng anye bhɛa keni kɔdhɔnggɛany :zugu na kayɛany diram ngakihiniyo. 42 Na nɔng igge hunde anno zukte ku ɛnɛng na chɔɔ Tumu hinisiya gu dhere ngaibhɛsɛnooye, anye kaggayɔ. 43 Anye annaa bɔɔ ajjanyi :Babaa Nanu buyn na ekkononyi bhɛa nu, na igge tamartanyu. Na nɔng hunde hir kona kɔtɔlɔma buyna sabbaa nɛnɛ na kugo bhɛa nu, yɛbhbho ngahung. 44 Na igge hunde anno ngagiya ajjinɛno diram kɛngɔ na chɔɔ lɔga challa kènno mesigi na kayɛung :Tumu Komoruya dhɔnɛna diram ngamessoo dhulde go, na anda anye yɛbhbhanyu ɛnɛng?

45 “Na igge ngaɛsɛdhɛ lɔgɔ huna naa ale kichillɛungu :anyo bhɛa Babaa Nanu Tumu. Nɔng inde ale chillɛungge a :Muse, hira ibhɛsɛno lɔga gɛnyɛ hinisi goore. 46 Nɔng igge hunde bere yɛbhɛ lɔga Muse dhere, anda bɔɔ yɛbhtanyu anye ke ngaya nɔng anɛ hira bere kɔdhdhɛsɛna lɔga ganyu dadabte. 47 Na nɔng igge hunde lɔga bere kɔdhdhana :Muse ngayɛbhbhooye, anda lɔga ganyu ale yɛbhbho ɛnɛng?”