Jon 3 | SuqSC | STEP | Na Tumu aynɛ Yonas lɔgɔ sɛgɛn na sɛɛsɛ,

Jonah 3

Lɔga Yogɛsɛna ꞉Tumu Yonas Na Shikko

1 Na Tumu aynɛ Yonas lɔgɔ sɛgɛn na sɛɛsɛ, 2 “Bana ok ngaɔrronu bu gore ke Nɛnɛweye na madhɛsɛ zugo ngalɔkta bɔɔ anda koyokkoginyde.” 3 Na shigu na bana na ogu Nɛnɛwegiye. Nɔ dha bere Nɛnɛwe a ɔrre bu gore. Hunde kɔ̀gɔdhanɛ ɔr dheyyɔ na ke kuluhite, kowo ungo sizzi kari. 4 Na Yonas bhɛlu ɔr toye ungge dhɔnɛ sɔng na aynɛ zugo lɔgɔ na sɛɛsɛ, “Mɛa kɔdhdhanɛ ngakalda, na ɛllo ungo zugo ramman na Nɛnɛwe dhitinɛyɔ.” 5 Na yɔk zuga Nɛnɛwe kumulɔng yɛbhbhɛ lɔga Tumu na katta lɔga bere gɛ ɛddɛa na tɛldi hunynɛn na malugu ruminyaa kìbhɛa duhu.

6 Na hunaa lɔgɔ assanɛa komoruya Nɛnɛweye, bana bhɛa ihɛa alleya nɛnɛ komoruyny na bhuruya ruminyaa gɛnyɛ bo challa na malugu ruma kìbhɛa duhu na tɛu bay burɔ. 7 Na koo arɛ zuga gɛnyɛ wuy na sɛɛsɛ, “Anye ko gulsachinaa ganyu kennagung ɛnɛnggeo, ngamɛa zugo any kɛtɛldi hunynɛn. Na chɔɔ hirre dhɔnɛ ko beo ko mɛdɛrni ma ngakirgiyɛ ko amissɛ ngakusigiyɛ. 8 Na zugo any kamalugu ruminyaa kìbhɛa duhu. Na beo ko mɛdɛrniya gɛ ko yɔk any kulubutɔ. Na kalliyɛ ko Tumu gore na kɔdhɔyɔ lɔga gɛrsa ko kuhuyamoa taa nɛ. 9 Ka ale Tumu ujjuk lɔga bare wolokkey na chirbhisiey na ngakɛ̀rɛsso.”

10 Na Tumu hunaa orro lɔga gɛ ko bhɛa ujjugɛa lɔga gɛ gɛrsaye, chirbhisiu na dhɔyu lɔga senno kidhiyɛ yɔk.