Jude

1 Ngadadabta kɔgɔdhan :anyo Yihudha, hira ku gochonga Yaykobi kagayi Yesus Kirisos.

Na kɔgɔdhdhagung igge, zuga bere ibhbhagungu :Babaa Na Tumu hini na eleongu na bhɛkkungu na ale ^{▼▼Dadabinyaa Lɔga Tumu tuga Giriki gena sennɛ, “...ajjungu...”}lɔmmungu :Yesus Kirisosi.

2 Any kichirbhiseong :Tumu goore na kaung zany kali kali na kibhagung hini tii tii.

Lɔga Ale Kàttiyɛa Zuga Yesus Ngayɛbhbhɛayo

3 Ngazukta gany kibhbhagung hiniye, anye bɔɔ hini ujjono goore na keni kɔ̀gɔdhagung ngalɔkta kɔ̀lɔ :aggeu bere ibbaysiyɛiy :Tumuye. Na hunde ko kɛ̀sɛdh nganga, anye sabba bhɔdhɛ na kɛsɛdhdha lɔga keni kɔ̀gɔdhagɛung lɔga maya mɛdhdhanɛo, na yɛbhɛo lɔga ku dhere bere ibhbhana :Tumu kalde dhɔnɛ wub na ajjiy agge zuga gɛnyɛ ridhing ngakɔlɔmao. 4 Nɔng bhee kɔgɔdhdhagɛung ngalɔktaye, a ngaya zug gena dha bɔɔ dhulday dari na assayɛung iggeye. Yɔk ngazuktonu lɔga gɛ ale kùjjukkanɛa, annaa bere kɔ̀gɔndɛsɛa dadab toye kingi. Yɔk a zuga Tumu ngaɛngɛrsɛayo na ibhbhanɛa lɔga bere ɛdhdhɛttannɛiy :Komoruya Na Tumu na bhɔdhdhɛa ke lɔga messɛa lollumo na mallɛa Yesus Kirisos Komoruya na dhɔnɛna lɔmmiy agge.

5 Nɔng igge gaoyɔ hunde bere Komoru Tumu obhoniseono zuga Isirayeli Gibsigiye na koo dhit ga nɔng ngayɛbhbhɛayoye, na anye keni kɛ̀bhɛseung sabbi. 6 Na ga kàtta zuga ekko :Tumu bere irranɛa nɔng. Yɔk annaa bere dhɔttɛa buyna ajjɛa :nɛa ko hana gɛ bhakkɛa. Na koo chibbo :Tumu dhul ko kingi na ojjo mugurɔ ko bhee ale anɛ kala bo kedhdhɛa lɔga zugony kumulɔng. 7 Na chɔɔ ga kàtta zuga bere bhakkɛa ɔra kèe Sodom ko na kèe Gomora ko ga bere bhakkɛa dhey dhey. Ko yɔk annaa bere messɛa lɔga bo gɛrsa ku lollumo ko kuhuyamoa bo gɛrsa chɔɔ anda zugo ngamessɛayo dhul. Na ngaya bere kàttiyɛ yɔk gogiyeye, dhɔllagiyɛ bhɛa ale chɔllanɛnɛa :zuga messɛa gɛrrɛng na kàttiyɛa goa iho dhul ko kingi.

8 Na ko yɔk ngazukta Tumu ngaɛngɛrsɛoye, a ngagiya messɛ lɔga gɛrsa orronɛa kunaɔ na dikkɛ rɛhi na irranɛ Tumu na dhɔmmɛ chɔɔ zuga ekko :nɛa lɔmmɛa dirambe. 9 Chɔɔ ko nɔng hira bo ekko :Tumu allinɛnɛa lalugɛ kenno Mikayel huna bere ɛkkɛnyannɛnɛa ko Moldoy rɛa Muse, bhee bere ujjukkanɛ Moldoy na dhɔmɛ ngani kujjugao. Nɔng bere senɛsɛna, “Any kowologiny :Komoruyɔ Tumu!” hung. 10 Na ngazukta Tumu ngaɛngɛrsɛoye, yɔk dhɔmmɛ chɔɔ lɔga imaggɛa kumulɔng. Na lɔgɔ ɛsɛdhdhɛ huna kɛginyany na ale ujjukkɛ rɛhi.

11 Na chɔɔ ale ruɛ rɛhi! Yɔk wa kɔbhta ganggua bere Kayeli, na messa damiya bere Balami na teyelda birinya goore na ɛddɛya lɔgɔ, na kìggarisiya damiya bere kìggarisiyɛa :hira irranɛa Tumu kèe Kore.

12 Na igge hunde mukkinyano na mulnɛno bhɛa nu ganɛnɛo na bo ibhinɛno hinisiye, yɔk ngazukta ku ngangaye, hony ga bo liya ngaammɛayo na mulnɛno kari na dikkongɛ na aminɛ huna zuga aha shɛɛ ngaiwoyɛayo na ɛsɛdhdhɛa kɛngiya gɛ sɔng. Na hɛt ko idhdhaa nyimmanɛa hung na ngɔyɔ ɛbbɛkka na guyɔ ngadhakkao. Na sɛgɛn hɛt ko kɛna kolea dhungngɛa :kɛnu kawarɛ ngadhungnganɛayo dha bɔɔ bhuktɛa na erta dhul ko kingi. 13 Na yɔk ko kuhuyamoa nɛ messɛa :yɔkku gɛrɛ na hɛt ko maa yirisiny ɛbbɛkka :ngɔ na dɛmnɛa na lɔmmɛa dhohua bo gidhanga. Na hɛt ko munyunya woyɛa mugura bere kòjjɛsɛna yɔk bo kɔrra tirr na ɛlla ngonu dhul ko kingi.

14 Na ko nɔng ashaya Adami kèe Henok bere irrittinyana tenya ku issabbay annaa bere ajjɛa :Tumu lɔga ngazukta na koo yokkono na senno, “Alala! Ga shigitɔ. Nɔng Komoru Tumu ale dhɛanɛ ko zuga gɛnyɛ ridhing ningginɛna bo mɛra toyi rɛkkiy, 15 na kegen lɔga zugony kumulɔng. Na kujjuga gee nɔng ngaɛngɛrsɛoye rang ke ngaya bere mesɛ lɔga ku kuhu marra :nɛa na yagɛsɛnɛ nɔng tugi na dhɔmɛye.” 16 Yɔk ngazukta kali kali mɛzziɛ girɔngichinne na chilɛ lalugɛ. Na messɛ lɔga ku kuhu hinnonɛa sabbiya gɛ. Na dhɔngngɛ rɛhi na amɛsɛnɛ zugo tugi choyn na kɔjɔya ahaa hinnɛa bhɛa zugony.

Lɔga Kènno Kɛ̀yɛbhtɛ Yesus Na Kɛ̀tɛldɛ Gig

17 Na nɔng igge ngazukta gany kibhbhagung hiniye, ga kàtta lɔga bere yokkonɛa :zuga bere ekko :Komoruya Na Yesus Kirisosi sabbɔ. 18 Yɔk annaa bere sennagungɛa, “Bɛrgua ale wurtune, zuga kɔbhbhɛa lɔga ku kuhu hinnonɛa sabbiya gɛ na bhɔsɔrrɛa Tumu ko zuga gɛnyɛ, ale bansanɛyɔ.” 19 Yɔk zukte ku ngangaye a gee tissongɛ igge na kendɛ kɛngɔye. Yɔk messɛ lɔga hinnonɛa sabbiya gɛ sɔng na Kuloya Tumu ngalɔmmɛyo.

20 Na mɛa ngazukta gany kibhbhagung hiniye, igge nɔng annaa bere yɛbhto lɔga Tumu kullɛna jorronɛa lɔgɔ kumulɔng. Na mɛa mɛtta nganga dirr na iriytɛ ngalɔkta Tumu ngani yɛbhbhoye na alliyɛ ko Tumu damiya madhdhagɛungu :Kuloya Nɛnɛ. 21 Na hunde ngani reo kolea ale chirbhisiyɛungu :Komoruya Na Yesus Kirisosi na ajɛungu basseya iho dhulde, tɛldi ko Tumu kari ke dhɔnɛ tii na tagatɔ hunde ibhbhagung hiniye.

22 Na zukte yɛbhbhɛ Yesus na dhaginɛ ko hinisiye, any kotowonydakkung na madhatɔ. 23 Na ko yɔk gee ɛl gogiyeye yakta ke tiri na ibbaysitɔ. Na zukte chirbhiseoye, maya lɔga gɛ gɛrsa ngidhdho na marro chɔɔ ruminyaa gɛ lɔmmɛa ridhinga messɛa :yɔkku.

Lɔga Kèterrisanɛa Tumu

24 – 25 Nɔng Tumu Komoruya Na dhɔnɛna ɔana lɔgɔ kumulɔng bere ibhbhana Yesus Kirisos na ibbayseiy agge, anna lɔmmungu na lɔga gɛrsa ngadokkono, na ale kɔyɛungu bhɛa nɛnɛ diramuny ke zuga ridhing ningginɛna na dɛllo goore. Na mɛa any kɔtɔlɔ diram ko barartin ko ɔnney ko buyn kali kali dhul ko kingi damiya bere lɔmmanɛa huna chɔɔ ba ko tumu ngani kètegenydoyɛayo! Amen.