Mar 15 | SuqSC | STEP | Na bhorroyɔ shaw gɔldangɛa bibiyo doraa Tumu barara ko zuga Ayhudhi bibiyo ko zuga madhdhɛa zugo Damiya Tumu bere kàjjɛa Muse ko zuga Ayhudhi bibiyo kedhdhɛa lɔgɔ kumulɔng hunaa daktɛa Yesus go na tewa ushaye, koo ibhta na chɛbɛ na ayɛsɛ Bhilatos.

Mark 15

Lɔga Kɛ̀hɛyɛa Yesus Bhɛa Bhilatosi

1 Na bhorroyɔ shaw gɔldangɛa bibiyo doraa Tumu barara ko zuga Ayhudhi bibiyo ko zuga madhdhɛa zugo Damiya Tumu bere kàjjɛa Muse ko zuga Ayhudhi bibiyo kedhdhɛa lɔgɔ kumulɔng hunaa daktɛa Yesus go na tewa ushaye, koo ibhta na chɛbɛ na ayɛsɛ Bhilatos.

2 Na Bhilatos ghinu Yesus na sɛɛsɛ, “Komoruya zuga Ayhudhi ani :inyo?”

Na yagɛsɛ :Yesusi na sɛɛsɛ, “Ee, a ngadamita senɛye.”

3 Na gɔldangɛa bibiyo doraa Tumu barara childɛ Yesus lɔkte bu mɛri. 4 Na Bhilatos ghinu Yesus sɛgɛn na sɛɛsɛ, “Yɔk ngazukta a ngagiya wa childɛinyɔ lɔga bo mɛraye. Na inye lɔgɔ ngayagɛsɛnno?”

5 Na nɔng Yesus dhiyɛ rib sɛgɛn na chɔɔ lɔgɔ gee chichi ngani ngayokkonoo dhul. Na Bhilatos iwachɛɛ.

6 Nɔng dha taa hunde ba a kolea ammɛa :zugu Gibiriya Basikaye, zuga Ayhudhi ghinnɛ komoru na ɔgɛsɛn zuga kìchibbo dhɔnɛ. 7 Na ngakoleonu dha bere lɔ hirre kèe Barban kìchib ko zuga bhoriyɛa ba na kɔdhdhɛa zugo kari. 8 Na zugo hoya na ghini Bhilatos na kɔgɛsɛ hira kìchibbo kona damiya dha taa ɔgɛsɛna kolea Gibiriya Basika.

9 Na Bhilatos ghinu zugo na sɛɛsɛ, “Ghinnonyu na kɔ̀gagung ngakomoruyta Ayhudhiye?” 10 Nɔng dha bere hunde gɔldangɛa bibiyo doraa Tumu barara ibhbhanɛ Yesus na ajjɛsɛnɛ nɔng ke bhɛa hinisi ngɔyɛa lɔga Yesusiye, gayɔ. 11 Na yɔk gɔldangɛa bibiyo doraa Tumu barara kɔnkɔnɔ zugo na kighini Bhilatos na ko bhee ɔgɛsɛn Yesus, kɔgɛsɛ Barban.

12 Na Bhilatos koo ghinu sɛgɛn na sɛɛsɛ, “Na nganda eleo Komoruya Ayhudhiye senno kème ɛnɛng?”

13 Na yɔk yokto lɔgɔ goore sɛgɛn na se, “Ilaga!”

14 Na nɔng ghinu yɔk na sɛɛsɛ, “Senno kìlak kɛ ɔng? Wa ɛddɛu lɔk giyong?”

Na yɔk kalda yokto lɔgɔ goore na se, “Ilaga so!”

15 Na koo Bhilatos igomɛsɛ zugo na ɔgɛsɛ Barban na hinisiya gɛ kete hɔli. Na ibha Yesus na aynɛ bholi na kadhaga na kilagatɔ.

Lɔga Bhɔsɔrɛa :Bholisɔ Yesus

16 Na bholi koo ibhta Yesus na aytɛ tu kɛnga komoruyny kèe Biratɛri. Na eliyo lalugɛ kumulɔng na muktɛ ngonu ke dhɔnɛ. 17 Na ibhta rumbe rɛghghɛ bu gaw dhandali na bhuruytɛsɛ Yesus. Na takuyto kɔmkɔm birinne huna garchua komoruyny na oytɛsɛ sabba. 18 Na bhɔsɔrɔ na seyɛsɛ, “Komoruya Ayhudhiye! Tɔlɔ diram na alliyɛy zugo shɛɛ!” 19 Na koo dhaga sabba lurginyaye dirr na tusɛsɛ mɔdha na tɔgɔndɛsɛ kɔmma na ayɛ diram ke sagin. 20 Na hunaa bhɔsɔrta na tewa ushaye, bhuruyta rumaa rɛghghɛa malukko na bhuruytɛsɛ ruminyaa gɛnyɛ. Na aytɛ na kilagatɔ.

Lɔga Kìlagɛa Yesus

21 Na hunaa hɛyɛaye, koo itinynyandɛ ko hira kèe Simon bhakka Kerena hunde kun ɔr dheyyɔye. Nɔng a baba Iskindiri ko Rubhusi. Na maktɛsɛ kɛya aleo kìlagɛa Yesus na kɛtɛa :nɛa. 22 Na ibhta Yesus na aytɛ chɔɔ bhee kèe Golgota. Yɔk ngasarra kèe Golgotaye tuga Hibiru a bhɛa kènɛa, “bhɛa gigeya sabba.” 23 Na koo ayɛ woyna kùchugurrana ko zibua hɛtta ko bokkoy, na nɔng tamaru. ^{▼▼Ngazibuya hɛt ko bokkoyte, kèmessono kɛte kèe kɛrbe. Na a zibua hunde rɛ wadhennoye ilaliseo rɛ na anna dildili.} 24 Na hunaa ilakta na tewa ushaye, ibhta ruminyaa gɛnyɛ na mesigi dami na kataktɛ gee lɛmnɛye. ^{▼▼Ngaya messɛ :zugu ngadamitaye hɛt ko zuga dhakkɛa talyaa ayugony.} Na koo ngɛrɛ na aytɛ.

25 Nɔng Yesus huna bere kìlakka, bere kìlakka bhorroyɔ kolea satinya ku sizzi. 26 Na ngalɔktonu bere kìchilɛ nɔng na kɔ̀gɔdhdhɛsɛn dadabte bere sennɛa, “Nganda a Komoruya Ayhudhi.” 27 Na yɔk ibhta chimtanyaye ku ramman na ilaga ko Yesus kari. Na kona ilaga siyɔ sɛtɛn, kona ilaga kangitɛn. 28 Na lɔga bere kɔ̀gɔdhdhɛsɛna dadaba lɔga Tumu sennɛa, “Nɔng wa kidhoyta ko zuga messɛa gɛrrɛng bhoriyɛa ba,” bhugnyɛsɛ ngaya. 29 Na zuga bere dhoyɛa ganggu ngonu sagini Yesus na dhɔmɔ gɛrrɛng gɛrrɛng na chukki sabbi na seyɛsɛ, “Aa! Nganda ngaaniyo hira bɔɔ seni ale bolkii doraa Tumu barara na kɔdhdhi ungo sizziyɔ sɛgɛn? 30 Mɛa ga ibbaysi rɛa nunu na bhona ngakɛta kìlakɛinynde!”

31 Na ko yɔk gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse mɛzzi kɛngɔ na kedhdhigi na se, “Yɔk zug gena ibbaysiu, na nɔng mɛa rɛa nɛnɛ ngani ngaibbaysiyo. 32 Na mɛa hunde a Kirisos Komoruya Isirayeli dhereye, ga sɛɛ kibbaysi rɛa nɛnɛ ngakɛta kìlagɛye na ko agge kàrgi na kɛ̀yɛbhɛtɔ.” Na ko yɔk zugaa ku chimtanya kìlakka kari dhɔmɔ gɛrrɛng gɛrrɛng.

Lɔga Rɛsɛa :Yesusi

33 Na kali kɛngɔ bho baru ba kumulɔng ko bhee anɛ raya. ^{▼▼Tuga Giriki se, “...ko bhee satinya anɛ sakkal.”} 34 Na hunaa tewa rayaye, ^{▼▼Tuga Giriki se, “...na satinya sakkalɔ...} Yesus yogo lɔgɔ tuga nɛ goore na seu, “‘Elohi, Elohi! Lamma sabaktani?” Yɔk ngalɔkta hologun a bhɛa kènɛa, “Tumu Komoruya nanu, Tumu Komoruya nanuye! Dhɔttany kɛ ɔng?”

35 Na zuga bere chillɛa jaa ngonu gena shigi ngalɔkta na se, “Shigiyɛ! Wa eliwa Eliyas.”

36 Na nɔng hir kona ngeu na ibha rum na chaluoy woynde mirgari na ɔlɔrranu bhirɛgiye na ibhɛsɛ Yesus na kirtɔ. Na seu, “Mɛa ɔddigiyɛ, ga any kɛtɛu na kàrgi hunde Eliyas kun na obhoniseonoye.”

37 Na Yesus aru wuy goore, na ere. 38 Na ruma kìbhilɛa doraa Tumu barara bhɛa kullɛna toye ɛrrɛyɛ kɛrghɛnɔ gak na te ramman. Nɔng huna bere ɛrrɛynɛna, bere ɛrrɛchinyana surr tundɔ ko bhee dogɛ ba bay. 39 Na gulsaa bholisuny bere chillo jaa ngonu kìlagɛ Yesuse, hunaa orro ngaya arɛ :Yesusi wuy na rɛsɛye, seu, “Kèe ngahirra dhaa a Eriya Tumu dhere chi!”

40 Nɔng ngonu bere lɔmma tɛrro gena, na yɔk bere ɛlla ko rɛna na dharasɛnɛa ngazukta kìlakte. Na bhɛa ngatɛrroonu bere ɛl ngonuye, kona bere anna Ngamariyama Magadhala ko Ngamariyama ku mama Yosa ko na Yaykoba chinynyo ko tɛriya kèe Ngasolome. 41 Yɔk ngatɛrroya a tɛrroa bere kɔbhbhɛa Yesus Gelilagiye na kachchɛa. Na ko yɔk tɛrroa bo mɛra dha bɔɔ dhɛanɛa ko Yesus kari na honynyo Yerusalem bere ɛlla ngonu.

Lɔga Kòjjɛa Yesus

42 Na hunaa bho tewa jhayny kolea messɛa :zugu ahaa senno kusigi rogonɔ Kala Ayawsunyde, 43 hira kènno Yoseb bere irrittinyana Armatiyagiye, bho ngani ngaɛngɛrɛso na ogu na ghinu Bhilatos na kaynɛ hiri ^{▼▼hiri Tuga Giriki se, “rɛa Yesusi”} na koytɔ. Nɔng Yoseb dha bere a hira kàggaa kedhdhɛa ko zuga Ayhudhi bibiyo lɔgɔ. Na ko nɔng dha bere re kolea ale lɔmɛa :Tumu zugo. 44 Na Bhilatos hunaa shikko hunde dhaa Yesus ereye, iwachɛɛ na seu, “Na shaw hung wa ere ɛnɛng?” Na koo eleo gulsaa bholisuny na ghinu na sɛɛsɛ, “Ngangaye, wa rɛ kingi?” 45 Na Bhilatos hunaa yogɛsɛa :gulsaɔ lɔgɔ na tagga bhɛa dhaa hiri erɛaye, koo ibha ^{▼▼hiri Tuga Giriki se, “rɛa Yesusi”} na aynɛ Yoseb. 46 Na Yoseb koo tala ruma ku salala hɛtta ko bharasi, na ogo na ɔga hiri kɛya kìlagɛa na chɛbu ngarumbonu. Na ɔgɛ chɔɔ bhogoya dha bere kùtukussono bɛgiye na ojju. Na bhogo tugɔ ubullanɛsɛ bɛ. 47 Nɔng Ngamariyama Magadhala ko Ngamariyama ku Yosa jɔnɛ, hunde dha bere hiri kòy oriye, orrɛyɔ.