Mar 16 | SuqSC | STEP | Na hunaa Kala Ayawsuny tewa ushaye, Ngamariyama Magadhala ko Ngamariyama ku mama Yaykobi ko tɛriya kèe Ngasolome talda mala bo ɔngɔnaa hur hur na kaytɛ na kuhudhtɛ Yesus.

Mark 16

Lɔga Bansanɛa :Yesusi Rɛsɛyɔ

1 Na hunaa Kala Ayawsuny tewa ushaye, Ngamariyama Magadhala ko Ngamariyama ku mama Yaykobi ko tɛriya kèe Ngasolome talda mala bo ɔngɔnaa hur hur na kaytɛ na kuhudhtɛ Yesus. 2 Na unga ku sabba bhorroyɔ shaw ^{▼▼unga ku sabba bhorroyɔ shaw Ngalɔkta a bhɛa kènɛa “...arkua bo bhorroyɔ shaw...” ke ngaya damiya zuga Ayhudhi Kala Ayawsuny a arkua chinynyoye.} kolea ngani ujjonɛa :susɔ, yɔk ago bhogoya ku igingey. Na hunaa ngani woyɛa gɔrɔye, 3 ghindɛ kɛngɔ na se, “Na ngabɛtonu kùnyugɛ igingey tugɔye dha aleo ubullannagiy :noy?”

4 Na hunaa dhɔngnganɛa sabbi na gunynyɛa gɔra igingeynyde, argi hunde bɛa bɔɔ bo gore kùnyugɛa igingey tugɔ dhaa ubullanɛye. 5 Na hunaa tunnukkɛa toyeye, argi tɛgayte maluk ruma bo hɔla hunde ligin igingeyɔ tana sɛtɛnunyde, na dɛɛbɛyɛ.

6 Na nɔng sɛɛsɛ, “Ngadɛɛsso! Hunde lameo Yesusa Nazireti bɔɔ kìlakkaye, kaggayɔ. Nɔng wa banaa, na mɛa ngaya ninggɛ. Ga gɔnyigi chɔɔ bhɛa bɔɔ kòjjɛa a nganda. 7 Na mɛa ago na yoktɛsɛ zuga kɔbhbhɛa nɔng ko Betiros na seyɛsɛ, ‘Nɔng Yesus aynde jim sabbɔ Gelilagiyeye. Na aleo orro ngonu damiya bere yokkogɛungu.’”

8 Na tɛrro dɛɛbɛ na bhariyi tik tik na iwachiyɛ na bhonda igingeyɔ na ngeyo. Na ngalɔktonu hir kona ngani koyoktɛsɛo ke ngaya bere ɛngɛrsɛ bhoye.

9 Nɔng Yesus huna bere bansana rɛsɛyɔ bhorroyɔ shaw unga ku sabba, bere sabbɔ rɛ dhɔlɛsɛna Ngamariyama Magadhala bere ibbayseo :nɛa na obhoniseonɛa mɛnɛnga ku issabbay. 10 Na nɔng Mariyam koo ogo na assa zuga taa ɛlla ko Yesus kari bhɛa ibhɛa duhu na yogɛsɛ ngalɔkta. 11 Na hunaa shikkɛa bhɛa Yesus ihɛa basseyɔ ko lɔga dhaa itinynyanɛnɛa ko Ngamariyambe, yɔk ngani ngayɛbhbhɛo.

12 Na koo Yesus bhɔdhu ɛa nɛnɛ na dhɔlɛsɛ zuga kɔbhbhɛa nɔng gee ku ramman rɛ hunde dhɔttɛ ɔr na hɛ bhokkonnɔye. 13 Na yɔk wakta na yoktɛsɛ lalugɛaa dhɔynɛna, na yɔk ngani ngayɛbhbhɛo sɛgɛn. 14 Na koo Yesus dhɔlɛsɛ zuga kɔbhbhɛa nɔng ku 11 rɛ hunde dɔshshɛ bay na aminɛye. Na wologu goore ke ngaya sabbi anɛ dhandali na lɔgaa bansanɛa rɛsɛyɔ yogɛsɛnɛa :zugaa orrɛa nɔng ngayɛbhɛoye. 15 Na sɛɛsɛ, “Banda ago ba kumulɔng, na madhtɛsɛ zugo kumulɔng kamannaa challa. 16 Nɔng inde yɛbh ngakamannaya na kùchurte, ale bassɔ. Na nɔng inde ngayɛbhbhoye ale kùjjukkanayɔ. 17 Yɔk zukte yɛbhbhɛ ngakamannayaye, ale messɛ lɔga bo barara na obhonisionɛ mɛnɛnga sara ganyu na mɛzziɛ tugiya imaggɛa. 18 Na chɔɔ ko hunde kibhigi konna sɛnɛ oo kirgi zibunyaa rɛsɛny, ɛl hung. Na ale tadhɛ zuga ilagassɛa sɛnɔ na bassɛyɔ.

19 Na Komoru Yesus hunaa yogɛsɛa ngalɔkta na tewa ushaye, kàytɛ tumɔ na koo tɛu bay bhɛa Tumu sɛtɛn. 20 Na yɔk zuga kɔbhbhɛa nɔng koo banda na ago na madhtɛsɛ zugo lɔga Tumu ba kumulɔng. Na Komoru Tumu dha bere mesinɛ ko yɔk kari, na ajjɛ bhɛa messɛa lɔga bo barara na zugo kataga bhɛa lɔga gɛnyɛ anɛa dhere. ^{▼▼Dadabinyaa tuga Giriki bere sabbune gena, ngalɔkta kɔdhdhanɛ kutur 9ɔ-20de ninggɛ.}