Mar 3 | SuqSC | STEP | Na kali kona Yesus bana na ogo doraa madhinɛnɛa zuga Ayhudhi lɔga Tumu sɛgɛn. Nɔng dha bere ngonu lɔ hirre siyɔ chudhinɛyɔ.

Mark 3

Lɔga Ibbaysiyɛa :Yesusi Hira Siyɔ Chudhinɛna

1 Na kali kona Yesus bana na ogo doraa madhinɛnɛa zuga Ayhudhi lɔga Tumu sɛgɛn. Nɔng dha bere ngonu lɔ hirre siyɔ chudhinɛyɔ. 2 Na bere ngonu lɔmma zukte se kɔɔngɔ Yesus na kichildɛyɔ. Na koo bhɛgɛ nɔng churr na kiyoɛsɛ bhee kesea orɛ hunde ibbaysi ngahirronu Kala Ayawsunyde. 3 Na Yesus sɛɛsɛ hiraa siyɔ chudhinɛna, “Ga bana wo chil bheya sɛrɔ ɔdhte!”

4 Na koo ghinu zugo na sɛɛsɛ, “Ngangaye Kala Ayawsuny bere ajjiy :Tumu bere kèe kèmesɛ lɔga challa oo ga ku kuhu? Na bere kèe kìbbaysiɛ zugo oo kìndɛyɔ?” Na yɔk dhittɛ rib.

5 Na munyuɛsɛ ngazuktonu ke ngaya sabbi anɛ dhandaliye na gɔnyu ke hini chinydin tull na sɛɛsɛ hiri, “Ga ɔdh siyɔ se!” Na hiri ɔdhu siyɔ na siyɔ ɔdhɛ na bau. 6 Na yɔk zuga kɔbhbhɛa damiya Bhɛrɛsi koo bhono bhɔ ke tiri na ago na mɛzzi ko bara Herediosi na daktɛ Yesus go na lami ganggua anda senno kindɛ.

Lɔga Zuga Bo Mɛra Kɔbhbhɛa Yesus

7 – 8 Na koo Yesus ko zuga kɔbhbhɛa nɔng ago chɔɔ yirisiya Gelila. Na zuga bo mɛra shigi lɔga messo :nɛa na kɔbhta nɔng na hoya. Yɔk ngazuktonu bere hony bhɛa nɛnɛye kumulɔng, bere honynyo baa Gelila ko naa Yudha ko naa Udhuma ko Yerusalemɔ ko oriya ɛlla Yordanosɔ tandɔ ko gaa ɛlla Tirosɔ ko Sidonagiye dheyyɔ. 9 Na nɔng aynɛ zuga kɔbhbhɛa nɔng lɔgɔ na kibhta gonggulde chinyi na kayɛsɛ nɔng ke ngaya zugo anɛ mɛri na ikkinyɛye. 10 Yɔk zuga ilagassɛa bere dhadhaginɛnɛa gɔrɔ na kidhara nɔng ke ngaya bere ibbaysiɛ zuga bo mɛraye. 11 Na chɔɔ zuga tɔgɛsɛnɛa :mɛnɛngu bere hunde orrɛa nɔngge dhagɛa rɛhi ba bhɛa nɛnɛ jaa na yokkonɛa lɔgɔ goore na senɛsɛnɛa, “Inye ani Eriya Tumu.” 12 Na nɔng Yesus aynɛ lɔgɔ ke dhandali na taganyɛ bhɛa senno ngakudhugundoy nɔng hunde a hir inongge.

Lɔga Bɛrranɛa :Yesusi Zuga Ekko :Nɛa Ku Tɔmmɔn Ko Ramman

13 Na Yesus irrɔgu dhum kona tundɔ na eleo zuga hinno :nɛa. Na yɔk koo hoya chɔɔ bhɛa ihɛa nɛa. 14 Na bhɛa ngazuktonu honyde bɛra gee ku 12 na ojju ke Zuga Ekko. Na kɛtɛldi ko nɔng kari na ale kete zuga ekko :nɛa na kamadhtɛsɛ zugo lɔga gɛnyɛ 15 na kɔtɔlɔmɔ buyna obhonisionɛa mɛnɛnga. 16 Yɔk ngazuktonu bere bɛrrana :nɛa ku 12de kona a Simona bere kɔdhdhɛsɛna :nɛa sara kèe Betiros. 17 Na gena a erroa Zɛbɛdosi kèe Yaykob ko gɔynɛa kèe Yohanis. Nɔng Yesus dha bere kɔdhdhɛsɛn yɔk sarre kèe Bhornages. Na “Bhornages” a bhɛa kènɛa, “Erroa hɛtta ko tumua ujjo na bhadhdha.” 18 Na kona a Indiriyas, Bhilibhos, Bartolomiyos, Matiyos, Tomas, ko eriya Ilbiyosi kèe Yaykob ko Tadiyos ^{▼▼“Tadiyos” ko “eriya Yaykobi kènno Yihudha” iho Lukas 6:14-16 ko Lɔga Zuga Kèkko 1:13 ɛlɛhɛnɛsɛnɛ hirre dhɔnɛ.} ko Simona marra lɔga allinɛnɛa :komoruya Rome zuga Ayhudhi, ^{▼▼Simon a hira bere ganɛna ko zuga dogɛsɛnɛa zuga Ayhudhi go na katamara zuga Rome.} 19 ko Yihudhaa Askorotu ^{▼▼Zuga marakkɛa lɔga Tumu hunde ɛlɛhɛnnɛ ngasarra kèe Askorotuye, gena sennɛ a bhɛa kènɛa “hira nisso zugo” oo “butogi” oo “hira kɔdhdhɛsɛna zugo mirɔga. Gena sennɛ, “A sarre baye kèe Korotu.”} ale kɔdhdhɛsɛna Yesus mirɔga.

Lɔga Yesusi Ko Ga Belzabuli

20 Na koo Yesus ogu dori konnɔ. Na zuga bo mɛra muktiyaa sɛgɛn na hoya. Na te ga bo mɛra na chɔɔ Yesus ko zuga kɔbhbhɛa nɔng bhee ammɛ amissɛ garu. 21 Na zuga doraa nɛnɛ hunaa shikkɛa ngalɔktaye se, “Yesus dha bɔɔ sabba dhiyɛ!” Na koo hoya chɔɔ bhɛa ihɛa :nɛa na kibhigi na kidhiganatɔ.

22 Na yɔk zuga madhdhɛa zugo Damiya Tumu bere kàjjɛa Muse dha bɔɔ shidhinyana Yerusalemɔ se, “Ngahirra dha bɔɔ tɔgɛsɛ :Belzabuli! ^{▼▼“Belzabul” a bhɛa kèsenɛa “Moldoy.”} Na chɔɔ mɛa toye mɛnɛnga obhoniseono ngabarartinda ngagulsaya mɛnɛnguny Belzabuliye rɛ.”

23 Na nɔng eliu yɔk na hoya gɔra nɛnɛ jaa. Na ɛlɛhɛnɛsɛ lɔgɔ na sɛɛsɛ, “Ngangaye Moldoy anda Moldoy lallɛn obhoniseono ɛnɛng?” 24 Hunde zuga komoruya dhɔnɛna kendɛ kɛngɔ na ngani ngashiginɛoye, ngakomoruytonu bhee bhagɛ ba na allinɛnɛ zugo dirr ninggɛ. 25 Na ko yɔk zuga doraa dhɔnɛna hunde kendɛ kɛngɔ na ngani ngashiginɛoye, bhee bhagɛ ba kari dirr ninggɛ. 26 Na ko nɔng Moldoy hunde tamartɛ ko mɛnɛnga gɛnyɛ na kendɛ kɛngɔ na ngani ngashiginɛoye, bhee allinɛnɛ :nɛa dirr ninggɛ, na buyna nɛnɛ garasɔ. 27 Na chɔɔ ko nɔng hirre bansana na kɔ na uy doraa hira bo ɔnnɛna na ogor aha laay hung, ninggɛ. Nɔng maya sabbɔ ibh ɛnaa dori na chib na aynde kɔɛ ahaa ngahirronu kumulɔng lɔgɔ ninggɛnde.” 28 Ga shigitɔ! Yɔk zugo hunde kemesigi lɔga gɛrsa na kɔdhɔmɔ Tumu, ngalɔkta gɛ gɛrɛse kumulɔng bhɛa ale ujjugɛa :Tumu na senɛsɛna, ‘Any kagarayɛ,’ ihe. 29 Na nɔng inde dhɔm Kuloya Tumuye, lɔga gɛnyɛ gɛrsa bhee ujjugɛ :Tumu na senɛsɛn, ‘Any kagarayɛ,’ ninggɛ dhul. Na chɔɔ ale ngani lɔ ewoa ngalɔkta gɛrɛ bɔɔ dhɔmɛ Kuloya Tumuye dhul ko kingi.”

30 Nɔng Yesus bhee senɛ ngangaye, a ngaya wa senɛsɛnɛ :zugu, “Dhaa bɔɔ tɔgɛsɛye.”

Lɔga Mamaa Yesusi Ko Ga Gochonginyaa Gɛnyɛ

31 Na Yesus gɔynggɛ ko jɔnɛ koo hoya chɔɔ ngonu na chili bhɔ na ektɛsɛ hiri na kelɛɛsɛyɔ. 32 Na yɔk zuga bo mɛra bere ojjɛsɛnɛa Yesus kɛrghɛn na ɛlla bay ngonu seyɛsɛ, “Yesuse, mamaa nunu ko gochonginyaa gunyu a ngagenu chillɛ bhɔye na lamienyɛyɔ.” 33 Na nɔng ghinu yɔk na sɛɛsɛ, “Mamaye nande a :noy? Na gochonginyaye ganyde a giyong?” 34 Na gɔnyu zugaa bu ɔdhdhɛa ɛlla kari bay ngonu na seu, “Mama nanu ko gochonginyaa ganyu a ngagiya! 35 Nɔng mamaye nande ko gochonginyaye ganyde ko ngɔnanyaye ganyde a gee shikkɛ lɔga Tumu na bhɛkkɛye.”