Mat 1 | SuqSC | STEP | Mɛa te lɔga kɔbhbhanɛa sara kokonginyaa hira ku ashaya Dawiy ko Awurahami kèleo Yesus Kirisos.

Matthew 1

Lɔga Kokonginyaa :Yesus Kirisosi

1 Mɛa te lɔga kɔbhbhanɛa sara kokonginyaa hira ku ashaya Dawiy ko Awurahami kèleo Yesus Kirisos. ^{▼▼Kirisos a bhɛa kènɛa, “Hira Bɛrrana :Tumu ku Komoruya Ibbayseo Zugo.”} 2 Nɔng Awuraham dha bere irrittono Isak,
na Isak koo irriyo Yaykob,
na Yaykob koo irriyo Yuhudha ko gɔynggɛ.
3 Na Yuhudha koo irriyo Bhares ko Zara.
Yɔk ngaerroya jɔnɛ dha bere keli Ngatimar.
Na Bhares koo irriyo Eserom,
na Eserom koo irriyo Aram.
4 Na Aram koo irriyo Aminadab,
na Aminadab koo irriyo Nason,
na Nason koo irriyo Salemon.
5 Na Salemon koo irriyo Boez.
Nɔng Boez jɔnɛ dha bere keli Ngarahab.
Na Boez koo irriyo Iyobe.
Nɔng Iyobe jɔnɛ dha bere keli Ngarut.
Na Iyobe koo irriyo Issey.
6 Na Isseyi koo irriyo komoru Dawiy.

Na komoru Dawiy koo irriyo Sɔlɔmɔn. Nɔng Sɔlɔmɔn jɔnɛ dha bere a tɛrite hirre kèe Oriyo.
7 Na Sɔlɔmɔn koo irriyo Robam,
na Robam koo irriyo Abiya,
na Abiya koo irriyo Assa.
8 Na Assa koo irriyo Yosawa,
na Yosawa koo irriyo Yoram,
na Yoram koo irriyo Oziya.
9 Na Oziya koo irriyo Yotam,
na Yotam koo irriyo Akaz,
na Akaz koo irriyo Izikiya.
10 Na Izikiya koo irriyo Minase,
na Minase koo irriyo Amon,
na Amon koo irriyo Yosiya.
11 Na Yosiya koo irriyo Ikkoniya ko gɔynggɛ bɛrgua bere zuga Babiloni dhakkanɛa baa zuga Isirayeli na hɛyɛa zugo gidhdhingɔ.

12 Na hunaa zuga Babiloni dhaktaa baa zuga Isirayeli gidhdhingɔ na tewa ushaye,
Ikkoniya irriyo Salatael,
na Salatael koo irriyo Zurubabel.
13 Na Zurubabel koo irriyo Abiud,
na Abiud koo irriyo Eliyakim,
na Eliyakim koo irriyo Azar.
14 Na Azar koo irriyo Sadhok,
na Sadhok koo irriyo Akim,
na Akim koo irriyo Eleodha.
15 Na Eleodha koo irriyo Elazar,
na Elazar koo irriyo Mattan,
na Mattan koo irriyo Yaykob.
16 Na Yaykob koo irriyo Yoseb. Nɔng Yoseb a hira dha bere tɔginɛnɛa Mariyam. Na Mariyam koo hudhugo Yesus. Nɔng Yesus a hira dha bere bɛrrana :Tumu ku Komoruya Ibbayseo Zugo. ^{▼▼“Hira Bɛrrana :Tumu ku Komoruya Ibbayseo Zugo” tuga Giriki keli “Kirisos.” Na ko nɔng tuga Hibiru keli “Mɛsi.”}

17 Yɔk ngazukta kumulɔng kɔdhdhanɛ bɛrgua bere Awurahami ko bhee anɛ bɛrgua bere Dawiy, na tenyiya gɛ a 14. Na koo kɔdhdhanɛ bɛrgua bere Dawiy ko bhee anɛ bɛrgua bere zuga Babiloni dhakkanɛa baa zuga Ayhudhi gidhdhingɔ, na tenyiya gɛ a 14 sɛgɛn. Na koo kɔdhdhanɛ bɛrgua bere zuga Babiloni dhakkanɛa baa zuga Ayhudhi gidhdhingɔ ko bhee anɛ bɛrgua bere Kirisosi, na ko yɔk tenyiya gɛ a 14 sɛgɛn.

Lɔga Hudhukkinyanɛa :Yesus Kirisosi

18 Yɔk lɔga bere kùhudhukkonɛa Yesus Kirisos a ɛnɛnggeo, dha bere sedhdheyte kèe Mariyam tɔginɛnɛ :hirre kèe Yoseb. Nɔng ngasedhdheytonu a ngatɛrita ku mama Yesus Kirisosiye rɛ. Na dha bere huna ko hira nɛnɛ kari ngani kɛtɛldao, lɔmmana eri barartina Kuloya Tumu. 19 Nɔng ngahirra tɔginɛnɛ Mariyam kèe Yosebte, dha bere a hira ridhing ningginɛna. Na ngaya anɛ hira ridhing ningginɛnaye, koo ɛsɛdhu lɔgɔ na kɔdhɔ Mariyam laay ke ngaya marɛ bhɛa senno ngakaynɛ liya bhɛa sɛrɔ ɔdhdhaye.

20 Na nɔng hunaa ngani ɛsɛdhdha ngalɔktaye, koo kunau na aru hira ekkono :Komoruyɔ Tumu. Na hiraa kèkkono sɛɛsɛ nɔng, “Ashaya Dawiy, Yosebe! Bhɛa seni ɔgɛ Mariyam ngaɛngɛrsi! Ngaerita lɔ kɛngɔye anna lɔmmana barartina Kuloya Tumu. 21 Na ale hudhukkono ke may na inye kɔdhdhɛsɛn sarre kèe Yesus ke ngaya ale ibbaysɛɛ zuga gɛnyɛ bhɛa lɔga gɛ gɛrsaye.”

22 Yɔk ngalɔkta kumulɔng bhee anɛ ngangaye, a ngaya kèe kurruknyɛsɛ lɔga Komoru Tumu bere yokkono :hira yogɛsɛna zugo lɔga dhugunono :nɛaye. Yɔk ngalɔktonu sennɛ, 23 “Sedhdheya ko hiri ngani kɛtɛldao ale lɔmmana eri. Na hudhukkono ke may na kɔ̀gɔdhdhɛsɛn sarre kèe Amanuel.” “Amanuel” a bhɛa kènɛa “Tumu kɛ̀l kari ko agge.”

24 Na Yoseb hunaa bansana ungeye, koo ɔgɛ Mariyam ke tɛriya nɛnɛ damiyaa yogɛsɛna :hira ekkono :Komoruyɔ Tumu. 25 Na nɔng dha bere bhɛa senno kɛtɛldɛ kari mar dhul ko bhee Mariyam hudhukkonɛ liya nɛnɛ. Na koo eri hudhukkiyaa, na tɔgɔdhɛsɛ :Yosebi sarre kèe Yesus.