Mat 10 | SuqSC | STEP | Na Yesus eleo zuga kɔbhbhɛa nɔng ku 12 na aynɛ buyna obhoniseonɛa mɛnɛnga ko na ibbaysiyɛa zuga ilagassɛa mutanyoga bhiy bhiy kumulɔng.

Matthew 10

Lɔga Egɛa :Yesusi Zuga Bere Bɛrrana Ku 12

1 Na Yesus eleo zuga kɔbhbhɛa nɔng ku 12 na aynɛ buyna obhoniseonɛa mɛnɛnga ko na ibbaysiyɛa zuga ilagassɛa mutanyoga bhiy bhiy kumulɔng. 2 Yɔk zuga bere bɛrrana :nɛa ku 12 na ekko, na sabbune sara gɛnyɛ keli Simon (nɔng sara gɛnyɛ gena keli Betiros), na kona a gɔynɛa kèe Indiriyas, ko eriya Zɛbɛdosi kèe Yaykob, ko gɔynɛa kèe Yohanis, 3 ko Bhilibhos ko Bartolomiyos, ko Tomas ko hira mukko gharata kèe Matiyos, ko eriya Ilbiyosi kèe Yaykob, ko Tadiyos, 4 ko Simona marra lɔga allinɛnɛa :komoruya Rome zuga Ayhudhi, ^{▼▼Simon a hira bere ganɛna ko zuga dogɛsɛnɛa zuga Ayhudhi go na katamara zuga Rome.} ko Yihudhaa Askorotu ^{▼▼Zuga marakkɛa lɔga Tumu hunde ɛlɛhɛnnɛ ngasarra kèe Askorotuye, gena sennɛ a bhɛa kènɛa “hira nisso zugo” oo “butogi” oo “hira kɔdhdhɛsɛna zugo mirɔga. Gena sennɛ, “A sarre baye kèe Korotu.”} kɔdhdhɛsɛna Yesus mirɔga.

5 Na nɔng ibha ngazukta ku 12de na madhɛsɛ lɔgɔ na egu na sɛɛsɛ, “Bhɛa zuga bhorinyaa anaa ko oriya zuga Samariya ngahɛo. 6 Ago bhɛa zuga Isirayeli sɔng. Yɔk hɛt ko mɛdɛrniya bere litinyana na garsɛa. 7 Na hunde hɛoye, madhtɛsɛ lɔgɔ na seyɛsɛ, ‘Kolea senno kɔtɔlɔmɛ :Komoruya tumony ^{▼▼Komoruya Tumony Ngalɔkta sennɛ “Komoruya Tumonyde” ɛlɛhɛn sara Tumu. Yɔk zuga Ayhudhi a zukte ɛngɛrsɛ Tumu goore na sara Tumu dib ngaeliyɛo. Na Matiyos huna bere kɔdhdhɛsɛna yɔk ngalɔkta, hunde kɔn lɔkte sennɛ lɔga lɔmɛa :Komoruya Tumony zugoye, ngangaye a bhɛa senɛa lɔga lɔmɛa :Tumu zugo.} zugo mɛa te ja.’ 8 Na gee ilagassɛye ibbaysitɔ, gee bere rɛssɛye dhɔnggayɔ. Na gee am :gedhdheye, ibbaysi na kɛtɛldi hurr. Na mɛnɛngge tɔgɛsɛnɛ zugoye, chugu na obhonisiyoyɔ. Ngabuynda kàjjung hɔlɔngge, ko igge ayɛ zugo hɔlɔng.

9 “Na worginya oo birinyaa ku tomoga hɔla gaw dhandala oo ga rɛghɛa gaw dhandala kɔbɔrtɔgichinne ngalɔgɔnno. 10 Na kammaya lɔgɔnɛo galaa ganggu oo rum kona oo chaha oo bhirɛ ngalɔgɔnno dhul ke ngaya anɛo zuga messo zinggoa Tumu na maya lɔmmungɛa :zuguye. 11 Na hunde hɛo na dokko ɔrre bu oo chinyi konaye, igge lamiyo hirre kɛngɔ chal lammana zugoye, na tɛldi doraa nɛnɛ ko bhee dhɔyɛo ngaɔrronu na hɛyɛo. 12 Na hunde tunnukko doraa hiriunyde, ɛna issatɔ. ^{▼▼Ngalɔkta ɛlɛhɛnnɛ lɔga messɛa zuga Ayhudhi. Nɔng agge damiya na nganga ngayo. Agge hunde kɛ̀hɛ doraa hirigunyde, zugo ngakìssayo, issayiyɛ :yɔkku. Na ngalɔkta a bhɛa kènɛa ko agge hunde kùguny zugo hana gɛye, maya kìssayɔ na aynde guny Tumu ke tuhaye.} 13 Na hunde ɛna kɛngɔ te challi na tɔlɔmmung shɛɛye, ayɛ kutu :Tumu na doraa nɛnɛ kɔtɔlɔ chaldinaa issayɛo. Na nɔng hunde kɛngɔ te gɛrsi na shɛɛ ngani ngalɔmmungoye, chaldinaa issayɛo nɔng any kawaga na tɔlɔmɔ :eygo. 14 Na hunde kesea zugo ngani ngalamanungɛo oo lɔga gu ngani ngashikkɛoye, dhɔyɔ ngadorionu oo ngaɔrronu na tibarta teriya dokkono ngaɔrronu jagarre. 15 Ga shigitɔ! Ɔrre zugo messɛ ngangaye, kolea ale kedhdhɛa :Tumu lɔga zugony, ale kàtti na bhɛa attiya nɛnɛ, chali attiya bere kàttiyɛa Sodom ko Gomora.

16 “Nɔng anye mɛa kibhbhanung na kekkung huna mɛdɛrniya kɔ̀tɔgɛsɛna yoya toye. Na mɛa igge te ghurghuri huna konnauny na te zuga hɔla huna yikkayny. 17 Na tɛldi kɔk! Yɔk zugo ale hɛyɛungɛ bhɛa zuga kedhdhɛa lɔgɔ na dhakkungɛ doriyoa madhinɛnɛa zuga Ayhudhi lɔga Tumu. 18 Na ibhbhanungɛ na hɛyɛungɛ bhɛa zuga allinɛnɛa zugo ko bhɛa komortɛnuny ke ngaya yɛbhbhɛanyu anyeye na kɔbhɛsɛno yɔk ko zuga bhorinyaa anaa lɔga ganyu bere orrono kawarre. 19 Na hunde ibhtong na chɛbtungɔye, igge ngashurtɛ na se, ‘Na dha kalda lɔgɔ kòyokkono ɛnɛng?’ oo ‘Na dha kalda kòyokkono gee kèe giyong?’ Lɔkte ale yokkono ngakoleonuye, ale kòyokkogunggɔ, 20 ke ngaya inde yokkono lɔgɔ tugiya guye anɛ :Kuloya Babaa nu na :iggeu ngayokkonooye.

21 Nɔng ngakoleonu gɔynggɛ ale ɛkkɛnyannɛ kɛngɔ na gena kɔdhdhɛsɛnɛ gochonginyaa gɛ mirɔga na nissɛyɔ. Na choginggɛ ale bansɛsɛnɛ erroa gɛ na kɔdhdhɛsɛnɛ mirɔga na nissɛyɔ. Na erro ko yɔk ale bansɛsɛnɛ jugɛ ko choginggɛ na kɔdhdhɛsɛnɛ zugo na nissɛyɔ. 22 Na zugo kumulɔng ale marrungɛ ke ngaya yɛbhbhɛanyu anyeye. Na nɔng inde iriynɛ na yɛbhbhany anye ko bhee jagarɛ rɛsɛye, ale bassɔ. 23 Na hunde kɔ̀gɔldagung ba konnɔ na kàhanggungɔye, jara ba konnɔ hung. Ga shigitɔ! Chɔɔ igge hunde oriya Isirayeli kumulɔng ngani tɔyɛo na dheytaoye, nɔng Hiri Hoynɛ ale kundɔ.

24 Nɔng bhɛa hira kàmadhdha ko bhɛa naa madhinɛna, bu naa madhinɛna. Na ko nɔng bhɛa hira kaynɛna ko bhɛa naa kàgachcha, bu naa kàgachcha. 25 Na mɛa hira kàmadhdha, hunde kɛtɛhɛyɛ ko hira madhdha nɔng, anda a challi. Na ko nɔng hira kaynɛna hunde kɛtɛhɛyɛ ko hira kachcha :nɛa, anda a challi. Nɔng hira ku ɛnaa dori annaa bɔɔ kèliya Belzabul. Na ko yɔk zuga ɛlla doraa nɛnɛ kalda yɔk kèli sara gɛrsa dhogoy jorronɛa ngagiya!

26 Na zukte ku ngangaye ngaɛngɛrso ke ngaya lɔkte kùlluguny na ale ngadhugunninyao oo gee munnɛ na ale ngauhanɛo na kàggayo ningginɛnɛye. 27 Na mɛa lɔkte koyokkogung :anyo mugurɔye, igge yokto kaliyɔ bhɛa hɔla. Na gee koyokkogung hɛhɛyɔye, dhugundɛsɛ zugo bhɛa sɛrɔ ɔdhdha. 28 Na igge ngatɛngɛrɛ ngagiya nissɛ zugo ayugɛna hung na basseyiya zugony ngaiggarisiyɛoye. Tɛngɛrɛ na ɔana bhɛa ibhbhanɛa ayugɛna zugony ko basseyi kari na iggariseo goa ngadhittinɛnao dhul. 29 Yɔk mɛa bumma ramman a ngagiya kàtallana tamuniya dhɔnɛnaye. Na nɔng hunde Tumu ngani keseayoye, chɔɔ bummay dhɔnɛ ngagaraso dhul. 30 Chɔɔ chɔra gu sabbichinnuny kumulɔng nɔng bere toyiwa na gayɔ. 31 Na mɛa bho ngaɛngɛrso. Igge bhɛa bummaa bo mɛra, anno ga bassa jorrono yɔk.

32 Yɔk gee dhugunɛsɛnɛ zugo bhɛa anɛa zuga yɛbhbhanyɛa anyeye, ko anye ale kudhugunɛsɛn Baba nanu iho tumɔ bhɛa yɔk anɛa zuga ganyu. 33 Na yɔk gee imagganyɛ bhɛa zugonyde, ko anye ale kimagi bhɛa Baba nanu iho tumɔ.

34 Na igge ngaɛsɛdhɛ lɔgɔ huna naa bere kuguni na kàynɛ zuga bhakkɛa ba kumulɔng zany. Bere kugunɛi bɛr. Zany ngani kùguyɛysho. 35 Anye bhee kesennagɛung ngangaye, a ngaya anye huna bere kuguni, keni kègen zugo
‘na eriya maya katamartɛ ko chɔgɔnɛ,
na na ngaha katamartɛ ko jɔnɛ,
mɛrɛ katamartɛ ko nyagnɛn,
36 na hiri zuga gɛnyɛ kɔbhɔttɛ na kete mirɔga gɛnyɛye.’

37 “Nɔng inde ibhɛsɛn chɔgɔnɛ oo jɔnɛ hini na jorrono bhɛa ibhbhagɛanyi anyeye, bhee anɛ hira kɔbhbhanyi anye ninggɛ. Na inde ibhɛsɛn liya nɛnɛ oo sedhdheya nɛnɛ hini na jorrono bhɛa ibhbhagɛanyi anyeye, ko nɔng bhee anɛ hira kɔbhbhanyi anye ninggɛ. 38 Na ko nɔng inde kɛya kìlagɛa ^{▼▼Ngakɛta kilagɛye ɛlɛhɛn chɔllaa dokkono :hiriyɔ hunde yɛbh Yesuse ko lɔga bere chɔllanɛnɛa :Yesusi na rɛsɛiy agge.} ngaittonoo na kɔbhbhanyoye, bhee anɛ hira kɔbhbhanyi anye ninggɛ. 39 Nɔng inde lami bhɛa senno kibbaysiɛ rɛye, ale ujjuk rɛ. Na nɔng inde ujjuk rɛ ke bhɛa kɔbhbhɛanyi anyeye, ale jɔana basseya iho dhul.

40 Hirre lammanung iggeye, ngangaye lammanany anye. Na inde lammananyde, ngangaye lammana chɔɔ hira bere ekkononyi. 41 Na inde lammana hira yogɛsɛna zugo lɔga dhugunono :Tumuye, ko nɔng ale kɛ̀dhdhɛttan damite ale kɛ̀dhdhɛttanɛ hira yogɛsɛna zugo lɔga dhugunono :Tumuye. Na ko nɔng inde lammana hira ridhing ningginɛnaye, ale kɛ̀dhdhɛttan damite ale kɛ̀dhdhɛttanɛ hira ridhing ningginɛnaye. 42 Ga shigitɔ! Inde ibhbhana maa lalna kombiyɔ na ajjɛ ngazukta chichiye kona ke bhɛa anɛa hira kɔbhbhanyi anyeye, nɔng ale kɛ̀dhdhɛttandɔ.