Mat 11 | SuqSC | STEP | Na Yesus hunaa madhɛsɛa zuga kɔbhbhɛa nɔng ku 12 lɔgɔ na tewa ushaye, bana na ogu chɔɔ oriya zuga Ayhudhi ɛlla baa Gelila na kamadhɛsɛ zugo lɔga Tumu na kɔɔbhɛsɛ shɛɛ.

Matthew 11

Lɔga Ghinɛa :Yohanisi Yesus

1 Na Yesus hunaa madhɛsɛa zuga kɔbhbhɛa nɔng ku 12 lɔgɔ na tewa ushaye, bana na ogu chɔɔ oriya zuga Ayhudhi ɛlla baa Gelila na kamadhɛsɛ zugo lɔga Tumu na kɔɔbhɛsɛ shɛɛ.

2 Nɔng ngakoleonu Yohanisa Churro Zugo dha bere i doraa chibinuny. Na hunaa shikko ngalɔkta me :Kirisosiye, ibha zuga kɔbhbhɛa nɔng gena na egɛsɛ 3 Yesus na kighini na keseyɛsɛ, “Hira bere kènno ale kuni, ani :inyo rɛ oo kèreyo kon?”

4 Na nɔng yagɛsɛ na sɛɛsɛ, “Waga na kɔbhtɛsɛ Yohanis ngalɔkta wa shikkano na orrono kawarreye. 5 Na seyɛsɛ, ‘Zuga kawarɛ chaga, orrɛ bho. Ga ngɔllɛa, woɛ shɛɛ. Ga amma :gedhdhe, ^{▼▼Tuga Giriki ngalɔkta senɛ “gedhdheye” ɛlɛhɛn ilagayɛna hɛtta ko gedhdhe ko lɔgɔrɔm ko gena gena.} kònynyono na bassɛ na ɛl hurr. Ga ku dunggɛna, shikkɛ bho. Ga bere rɛssɛa, bansanɛyɔ. Na chɔɔ zuga ku bhoyoga, mɛa kàmadhɛsɛn kamannaa challa. 6 Nɔng inde guny lɔga ganyu na yɛbhbhany na ngadhɔttanyoye, a tuhinɛ.’”

7 Na zuga kɔbhbhɛa Yohanis hunaa ngani wokkɛaye, nɔng Yesus kɔbhɛsɛ zugo lɔga Yohanisi na sɛɛsɛ, “Ngangaye huna bɔɔ hɛo korugiye, senno gɔnyigi ɔng? Bɔɔ senno gɔnyigi balyay hunde ɛbbɛk :ngɔ na chukkinɛye? 8 Oo hunde nganga ngayoye, bɔɔ hɛo na gɔnyigi ɔng? Bɔɔ senno gɔnyigi hira bo malukko ruminyaa bo challa? Ngayo. Yɔk zuga malukkɛa ruminyaa bo challa a ngagenu bhakkɛ doriyoa komortɛnunyde. 9 Na ngangaye, bɔɔ hɛo na gɔnyigi ɔng? Bɔɔ senno gɔnyigi hira yogɛsɛna zugo lɔga dhugunono :Tumu? Ee, a dhere chi. Na ga kùdhugunogunggɔ. Nɔng Yohanis anna jorrono chɔɔ hira yogɛsɛna zugo lɔga dhugunono :Tumu.

10 Nɔng ngahirra, a hira lɔga gɛnyɛ bere kɔ̀gɔdhdhɛsɛna dadab na sennɛa,
“‘Ga shiktɔ! Anye ale kibhbhan hira nanu kona na kegi sabbɔ
na kɔhaginy ganggua ale dhoi.’

11 Na mɛa ga shigitɔ! Bhɛa ngazukta bere hudhukkonɛ :tɛrrouye kumulɔng, inde jorrono Yohanisa Churro Zugo ninggɛ dhul. Na nɔng bhɛa lɔmɛa :Komoruya tumony ^{▼▼Komoruya Tumony Ngalɔkta sennɛ “Komoruya Tumonyde” ɛlɛhɛn sara Tumu. Yɔk zuga Ayhudhi a zukte ɛngɛrsɛ Tumu goore na sara Tumu dib ngaeliyɛo. Na Matiyos huna bere kɔdhdhɛsɛna yɔk ngalɔkta, hunde kɔn lɔkte sennɛ lɔga lɔmɛa :Komoruya Tumony zugoye, ngangaye a bhɛa senɛa lɔga lɔmɛa :Tumu zugo.} zugo, chɔɔ hira chinynyo ghasura, jorrono Yohanisa Churro Zugo. 12 Na kɔdhdhanɛ bɛrgua bere Yohanisa Churro Zugo ko mɛa toye, zuga messɛa ba gɛrrɛng gɛrrɛng a ngagiya ngani bansɛsɛnɛ komorumoa tumony na kalliyɛy :yɔkkuye. 13 Anye bhee kesenɛ ngangaye, a ngaya dha bere chɔɔ huna Yohanis madha ngani kɔgɔdhayɛayo, yɔk zuga bere yogɛsɛnɛa zugo lɔga dhugunono :Tumu kumulɔng ko Damiya Tumu bere kàjjɛa Muse dhugunnonɛ lɔga ale lɔmɛa :Komoruya tumony zugoye. 14 Na mɛa hunde yɛbhɛ ngalɔkta koyokkogung :anyoye, anda ungusɛsɛno lɔgɔ na gaoyɔ hunde ngahirronu kèe Eliyas bere kèe ale kunde, a :Yohanisiye. 15 Na mɛa inde lɔ nyabhite sɛɛ kishiktɔ.

16 Na ngangaye, anye ngatenyda ale kɛlɛhɛnɛsɛn ɔng? Yɔk hɛt ko erroa ɛlla bay bhɛa gaw na eliya lalugɛ na senɛsɛnɛa,
17 “‘Agge annaa kɛ̀rtungɔ
na igge yelloy ngani ngaammoo,
na kirrɔktɛo
na ngani ngaruoyo.’

18 Bhee kɛlɛhɛnagɛung ngalɔktaye, a ngaya Yohanis huna bere kunno, nɔng amissɛa ammɛa :zugu ngani kusɛo, na woyna kùchudhdhana ngani kirɛo, na koo senɛsɛnɛ :zugu, ‘Dha bɔɔ tɔgɛsɛye!’ 19 Na ko nɔng Hiri Hoynɛ huna bere kunno, annaa bere amma amissɛa ammɛa :zugu na matta woyna kùchudhdhana, na koo senɛsɛnɛa :zugu, ‘Ga gɔnyigi ngahirra. Nɔng a ghormi, na dhutti, na chɔɔ a bɛkkaya zuga mukkɛa gharata ko na gaa messɛa lɔga gɛrsa.’ Yɔk lɔga challa messo :hiriyɔ a gee dhugunnonɛ bhɛa anɛa hira gaa bhoye.

Lɔga Wologɛa :Yesusi Zuga Nɔng Ngayɛbhbhɛayo

20 Na koo Yesus wologu zuga bere oriya gɛ messɛa :nɛa lɔga bo dhandala kìwacheo ke ngaya lɔga gɛ gɛrsa ngani kujjuktɛoye, na sɛɛsɛ, 21 “Ngazukta ngaoriya kèe Korazin ko Betesaydhaye, igge ale ruyɛo rɛhi. Chɔɔ ngalɔktonu bu dhandal kìwachi bere kemesi bhɛa nuye, hunde bere kème Tirosɔ ko Sidonagiye, anda yɔk bere tunggɛsɛ lɔgɔ na malugu ruminyaa duhu na ubbulu rɛhi burɔ na ujjugu lɔga gɛ gɛrsa. ^{▼▼Ngalɔkta malugɛ :zugu ruminyaa duhu na ubbulɛ rɛhi burɔye, a damiya zuga Ayhudhi dhɔllanɛa bhɛa ujjugɛa lɔga gɛ gɛrsa dhere na wokkonɛa gɔra Tumu.} 22 Na mɛa anye kesennagung ɛnɛnggeo, kolea ale kedhdhɛa :Tumu lɔga zugony, bhɛa attiya nu, ale chali attiya kàttiyɛa zuga oriya Tirosi ko Sidona. 23 Na ko igge ngazukta Kibiromiye, ngangaye igge senno ale kɔ̀dhɔngung na hɛo tumɔ ka? Ngahɛoyo. Ale kùjjukkagung Siol ^{▼▼Siol “Siol” tuga Hibiru, a bhɛa ɛlɛa zuga rɛsa.} bhɛa kàttiyɛa zugo. Na chɔɔ ngalɔktonu bu dhandal kìwachi bere kemesi bhɛa nuye, hunde bere kème Sodomɔ, anda Sodom ko mɛa toye ngani ihe. 24 Na mɛa anye kesennagung ɛnɛnggeo, kolea ale kedhdhɛa :Tumu lɔga zugony, bhɛa attiya nu, ale chali attiya kàttiyɛa zuga Sodomi.

Lɔga Ayawsa Ajjiy :Yesusi

25 Na koo Yesus seu, “Babaa nanu, Komoruya tumony ko bany, kɔdhɔnginy ke ngaya litanɛ zuga gayɛa bho ko ga kàmadhdha ngalɔkta na dhugunɛsɛn erroa chichoye. 26 Mmm, Baba, inye bhee mesɛ ngalɔktaye a ngaya anɛ ga ajjinyɛa hini hɔldinde.

27 “Yɔk lɔgɔ kumulɔng bere ayanyɔ ꞉Babaa nanu. Na hira gaa Eriya Tumu, a Baba nɛnɛ sɔng. Kona ninggɛ. Na inde ga Baba nɛnɛ Tumuye, a Eriya nɛnɛ sɔng ko zukte hinɛsɛn :Eriya nɛnɛ na dhugunɛsɛnde. Gena ninggɛ.

28 Na mɛa igge ngagiya tɔlgɔnyung itto lɔga bo ngaɔanooye, ga hoya gɔra nanu na kàung bhɛa ayawsɛo. 29 Na layta rɛhi bhɛa nanu na tɛhɛyɛ ko bea kìchibɛsɛna kɛya kɔhinɛnɛa, na arta lɔga ganyu ke ngaya anye kanɛ hira hini bo kalashshani rɛye. Hunde messo ngangaye, hinisiya gu ale ɛllanɛ bay. 30 Anye bhee kesennagɛung ngangaye a ngaya lɔga kajjungu :anyo anɛ bhaseni, na gee gany keni tɛtte, anɛ hɔlhɔliye.