Mat 12 | SuqSC | STEP | Na kali kona Kala Ayawsuny Yesus ko zuga kɔbhbhɛa nɔng dha gu kona toye. Na yɔk zuga kɔbhbhɛa nɔng bere dhakka :hozzo. Na targuyto liwa gen na usigiyɛ.

Matthew 12

Lɔga Kìghinɛa Yesus Lɔga Kala Ayawsuny

1 Na kali kona Kala Ayawsuny Yesus ko zuga kɔbhbhɛa nɔng dha gu kona toye. Na yɔk zuga kɔbhbhɛa nɔng bere dhakka :hozzo. Na targuyto liwa gen na usigiyɛ. 2 Na yɔk zuga kɔbhbhɛa damiya Bhɛrɛsi hunaa orrɛa ngalɔktaye, seyɛsɛ Yesus, “Ga gɔnya! Yɔk zuga kɔbhbhinyɛa inye messɛ lɔga ɛlla Damiya Tumu imaginɛna ko Kala Ayawsuny.”

3 Na nɔng yagɛsɛ na sɛɛsɛ, “Ngangaye lɔga bere messo :Dawiyi kala bere dhagɛa :hozzo ko zuga ɛlla kari, bere ngani toyito? 4 Nɔng annaa bere tunnukko doraa Tumu barara na ibhbhana tilaa kɛ̀ɛnga maya yɔk ngaammɛayo na ammɛa ko zuga ɛlla kari. Nɔng ngatilaonu anna ammɛa ꞉gɔldangɛa doraa Tumu sɔng. 5 Chɔɔ ko yɔk gɔldangɛa doraa Tumu barara a ngagiya messɛ zinggo Kala Ayawsuny, na ke zuga ɛddɛyɛa lɔga kullɛna imaginɛna ko Kala Ayawsuny ngakùgunyoye. Yɔk ngalɔktonu ɛl Damiya Tumu bere Kàjjɛa Muse. Na igge bere ngani toyito? 6 Mɛa ga shigitɔ! Chɔɔ hira bassa jorrono doraa Tumu barara ngaya ihe. 7 Na nɔng igge hunde bere taga hologuna ngalɔkta sennɛ, ‘Anye hira uddullogonyi go ngakihinio, kihini na chirbhiseo lalugɛye,’ anda zuga lɔgɔ ngani kɛddɛayo wa ngani ujjuktao. 8 Anye bhee kesenɛ ngangaye, a ngaya Hiri Hoynɛ anɛ Komoruya Kala Ayawsunyde.

9 Na koo bana na dhɔyu ngonu na ogu na tunnugu doraa madhinɛnɛa zuga Ayhudhi lɔga Tumu. 10 Nɔng ngonu bere lɔmma hirre siyɔ chudhinɛyɔ. Na yɔk zuga kɔbhbhɛa damiya Bhɛrɛsi lami bhɛa senno kichildɛ Yesus na ghini na seyɛsɛ, “Ngangaye, lɔga kìbbaysiyɛa zugo Kala Ayawsuny, Damiya Tumu bere kàjjɛa Muse bere kìgombo oo ngani?”

11 Na nɔng yagɛsɛ na sɛɛsɛ, “Mɛa bhɛa nu, hunde hira lɔmma mɛdɛrɛ kona, mɛdɛra nɛnɛ kɔngɔɛsɛ bhee kɔbɔngi Kala Ayawsuny, anda ngaghurtonoo na obhoniseonoo? 12 Na hiri bhɛa mɛdɛrruny, dhandali ngayo? Nɔng damiya Tumu bere kàjjɛa Muse annaa bere igomoa bhɛa kèmesɛa lɔga challa Kala Ayawsuny.

13 Na koo sɛɛsɛ hiraa siyɔ chudhinɛna, “Ga ɔdh siya nunu se!” Na hiri ɔdhu siyɔ na ɔdhɛ na bau na tɛhɛyɛ ko lallɛn. 14 Na yɔk zuga kɔbhbhɛa damiya Bhɛrɛsi bhono bhɔ na daga go na lami ganggua anda senno kindɛ Yesus.

Lɔga Hira Kachcha Tumu Bere Bɛrrana :Nɛa

15 Na nɔng Yesus tagu lɔga ɛsɛdhdhɛa yɔkku na dhɔyu ngonu na sɛyɛ ko rɛna. Na zuga bo mɛra kɔbhɔ nɔng, na ibbaysiu gee ilagassɛye kumulɔng. 16 Na dagɛsɛ go na hunde a hir inongge zug gena ngayogɛsɛnɛ. 17 Nɔng dha bere bhee mesɛ ngalɔktaye, a ngaya se kurruknyɛsɛ :lɔga bere yokkono :hira yogɛsɛna zugo lɔga dhugunono :Tumu kèe Isayase. Yɔk ngalɔktonu sennɛ,
18 “Hirre bere kɛbɛrran :anyo na katagayanyde a nganda,
Nɔng anna kibhɛsɛni hini na ajjanyi hini hɔldin.
Na ale kajjɛ Kuloya Nanu,
Na yogɛsɛn bhorinya kumulɔng bhɛa Tumu kedhɛa lɔga zugony dib.
19 Na nɔng ko zugo ale ngaɛkkɛnyannɛo oo ngabholollo,
Na hirre shik tuga nɛnɛ ganggoye ale ninggɛ.
20 Na balyayya lɔmma moloy, ngabhiikko,
goa bhurrutto kalkayɔ ngadhitto,
ko bhee kedhdhɛ lɔga zugony dib na mɔgɛ lɔgɔ kumulɔng.
21 Na bhorinya kumulɔng ale iddirnɛnɛ sara gɛnyɛ.”

Lɔga Yesusi Ko Ga Belzabuli

22 Na koo zug gena hoyɛy hirre tɔgɛsɛni, kawarɛ chagi kadhdhakka ibhinɛ na ayɛsɛ Yesus na ibbaysiu. Na hiri aru bho na alliu. 23 Na zugo kumulɔng iwachiyɛ na se, “Na dha nganda a Ashaya Dawiy ka?”

24 Na yɔk zuga kɔbhbhɛa damiya Bhɛrɛsi hunaa shikkɛa ngalɔktaye se, “Nɔng mɛa ngahirra mɛnɛnga obhoniseono barartina gulsaa mɛnɛnguny Belzabuli sɔng.” ^{▼▼“Belzabul” a bhɛa kèsenɛa “Moldoy.”}

25 Na Yesus tagu lɔga ɛsɛdhdhɛa :yɔkku na sɛɛsɛ, “Zuga lɔmma komoruya dhɔnɛna kumulɔng, hunde kendɛ kɛngɔ na ngani ngashiginɛoye, bhee lɔmɛ :komoruyɔ ke dhɔnɛ ninggɛ. Na ko yɔk zuga ɔra dhɔnɛna oo doraa dhɔnɛna kumulɔng hunde kendɛ kɛngɔ na ngani ngashiginɛoye, bhee bhagɛ ba kari ke dhɔnɛ ninggɛ. 26 Na ko nɔng Moldoy hunde obhoniseono mɛnɛnga bhɛa zugonyde, ngangaye dhaa mar rɛa nɛnɛ na kennɛ ko mɛnɛnga allinɛnɛa :nɛa. Na nɔng hunde me ngangaye, anda ale mɛnɛnga dirr allinɛnɛ ɛnɛng? 27 Na mɛa igge hunde senno mɛnɛnga kobhoniseon barartina Belzabuliye go, na zuga kɔbhbhungɛa igge, yɔk mɛnɛnga obhoniseonɛ barartina nini? Igge ale ujjukkanungɛ :zuga kɔbhbhungɛa. 28 Na nɔng anye hunde mɛnɛnga kobhoniseon barartina Kuloya Tumuye, ngangaye kolea senno kɔtɔlɔmɛ :Tumu zugo dhaa ko bhɛa nu.

29 “Oo mɛa hunde hir kona se kogor ahaa ɛlla doraa hira bo ɔnnɛna na kɔgɛ, anda hunde sabbɔ ngaɛnaonu bu ɔnnɛye, ngani kibhbho na kɛchɛbboye, ahaye wa se kɔgɛye, ale kɔɛ ɛnɛng? Na nɔng hunde ibhu na chɛbuye, aynde ale ujjɛ dori na kɔɛ aha lɔgɔ ninggɛnde.

30 Nɔng hirre ko anye dhɔnɛ ngakannooye, a mirogiya nanu. Na ko nɔng inde ngaɛananyo na zugo mukkanaoye, bhassayɔ. 31 Na mɛa anye kesennagung ɛnɛnggeo, yɔk zugo hunde kemesigi lɔga gɛrsa kumulɔng na chɔɔ kɔdhɔmɔ zugo, bhɛa ale kùjjugɛa lɔga gɛ gɛrsa na kèsenɛsɛna, ‘Any kagarayɛ,’ ihe. Na yɔk gee dhɔmmɛ Kuloya Tumuye, lɔga gɛ gɛrsa bhee kùjjugɛ na kèsenɛsɛn, ‘Any kagarayɛ,’ ninggɛ dhul ko kingi. 32 Nɔng hirre dhɔm Hiri Hoynɛye, bhɛa ale kùjjugɛa lɔga gɛnyɛ gɛrsa na kèsenɛsɛna, ‘Any kagarayɛ,’ ihe. Na nɔng inde dhɔm Kuloya Tumuye, lɔga gɛnyɛ gɛrsa ngakùjjukko dhul ko kingi.

33 Yɔk kɛnɔ kumulɔng kàgga bhɛa kawara gɛ. Na hunde kɛ kona a challiye, ngangaye ko yɔk kawara gɛnyɛ dhaa a challi. Nɔng hunde a gɛrsiye, ngangaye ko yɔk kawara gɛnyɛ dhaa a gɛrsi. 34 Ngahoyaa kurmusinyanyde, na igge hunde anno ngagiya ku kuhuyagaye go, anda lɔga challa yokkono ɛnɛng? Anye bhee kesennagɛung ngangaye, a ngaya lɔga lɔmma :hiriyɔ kɛngɔ, koo dhininyanɛ na yokkonɛ tugɔye. 35 Nɔng hira kɛngɔ challa yokkono lɔga challa bere shogisɛna kɛngɔ na lɔmma. Na ko nɔng kuhuyagi yokkono lɔga ku kuhu bere shogisɛna kɛngɔ na lɔmma. 36 Nɔng anye mɛa kesennagung, kolea ale kedhdhɛa :Tumu lɔga zugony, lɔkte bere yokkonɛ :zugu hologun ninggɛye bhoy, ale kìghin :zukte bere yokkonɛye kumulɔng na kàttiyɔ. 37 Anye bhee kesennagɛung ngangaye, a ngaya lɔga yokkono :iggeu a gee ale kòjjɛung ke zuga ridhing ningginɛna oo kùjjukkanɛung na kàttiyɛungge.

Lɔga Barara Bere Messo :Tumu Bhɛa Yonasi

38 Na yɔk zuga kɔbhbhɛa damiya Bhɛrɛsi ko ga madhdhɛa zugo Damiya Tumu bere kàjjɛa Muse gena, seyɛsɛ Yesus, “Hira madhdhiy, agge kenno me lɔga barara gena na kàrtoyɔ.”

39 Na nɔng yagɛsɛ na sɛɛsɛ, “Tenyde ku kuhu messɛ lollumoye, a gee hinnɛ bhɛa senno kartɛ lɔga bararaye. Na yɔk ale kɔ̀dhɔlɛsɛn lɔga barara bere messo :Tumu bhɛa Yonasi sɔng. Ga barara gena ngakɔ̀dhɔlɛsɛno dhul. 40 Na damiya bere ihɛa :Yonasi kɛnga urgusiya bo goore toye ungo sizzi bar ko kali, ko nɔng Hiri Hoynɛ ale i ba toye ungo sizzi bar ko kali. 41 Na kolea ale kedhdhɛa :Tumu lɔga zugony, yɔk zuga bere bhakkɛa Nɛnɛwe ale bansanɛ na ɛl ko zuga ngatenyda. Na zuga Nɛnɛwe chilɛ ga ngatenyda na ujjukkanɛ, ke ngaya ga Nɛnɛwe bere shigɛ lɔga madhɛsɛna ꞉Yonasi na ujjugɛ lɔga gɛ gɛrsaye. Na nɔng hira jorrono Yonas chɔɔ mɛa ngaya ihe. 42 Na ngakaldonu ale kedhdhɛ ꞉Tumu lɔga zugonyde, ko nɔng tɛriya ku komoruya allinɛnɛa baa iho gɔra tɔbha ale bansana na ɛl ko zuga ngatenyda. Na chilɛ zuga ngatenyda na ujjukkana ke ngaya nɔng bere bansanɛ surr ba utureyɔ na kishigɛ lɔga bho gaanaa Sɔlɔmɔniye. Na nɔng hira jorrono Sɔlɔmɔn chɔɔ mɛa ngaya ihe.

43 “Nɔng mɛnɛngi hunde bhonsana bhɛa hirigunyde, tɔlinɛ korugiye bhɛa ma ningginɛna na lami bhɛa senno kayawsɛ na ngajɔanao. 44 Na koo se, ‘Ga kàwak yaga bere nanu.’ Na hunde wokte, or dori hunde dha bere te guru na kìdiri na te na bo challaye. 45 Na kɔ na dhigannana lalugɛa ku kuhuyaga bo jorronɛa nɔng gee ku issabbay, na hɛ na tunnukkɛ hiri na bhakkɛ ngoonu. Na lɔkte bere dokkono :ngahirronuye, kalda angɛ na jorronɛ ga bere sabbune. Na ko yɔk ngatenyda bu ku kuhuyagaye lɔga gɛ ale a nganga.”

Lɔga Mamaa Yesusi Ko Ga Gochonginyaa Gɛnyɛ

46 Na Yesus hunaa ngani yogɛsɛna zugo lɔgɔye, yɔk gɔynggɛ ko jɔnɛ dha bere chillɛ bhɔ na lamiɛ bhɛa senno kɛmɛzziyɛ ko nɔng. 47 Na sɛɛsɛ :hir konnɔ, “Mamaa nunu ko gochonginyaa gunyu a ngagenu chillɛ bhɔ, lamienyɛ na mɛzzite.”

48 Na nɔng yagɛsɛ na sɛɛsɛ, “Mama nanu a :noy? Na gochonginyaye ganyde a giyong?” 49 Na dhɔlu zuga kɔbhbhɛa nɔng na seu, “Mama nanu ko gochonginyaa ganyu a ngagiya, 50 ke ngaya inde shik lɔga Babaa nanu iho tumɔ na bhɛkte, anɛ gochonga nanu ko ngɔnaa nanu ko mama nanuye.”