Mat 18 | SuqSC | STEP | Na ngakaldonu zuga kɔbhbhɛa Yesus hoya na assa nɔng na ghini na seyɛsɛ, ‘Ngangaye, bhɛa zuga lɔmma :Komoruya tumony kumulɔng, inde lɔ buyna bo dhogoyte a nɛng?’

Matthew 18

Bhɛa Zuga Lɔmma :Komoruya Tumony Kumulɔng, Inde Lɔ Buyna Boye A Nɛng?

1 Na ngakaldonu zuga kɔbhbhɛa Yesus hoya na assa nɔng na ghini na seyɛsɛ, ‘Ngangaye, bhɛa zuga lɔmma :Komoruya tumony ^{▼▼:Komoruya tumony Ngalɔkta sennɛ “Komoruya Tumonyde” ɛlɛhɛn sara Tumu. Yɔk zuga Ayhudhi a zukte ɛngɛrsɛ Tumu goore na sara Tumu dib ngaeliyɛo. Na Matiyos huna bere kɔdhdhɛsɛna yɔk ngalɔkta, hunde kɔn lɔkte sennɛ lɔga lɔmɛa :Komoruya Tumony zugoye, ngangaye a bhɛa senɛa lɔga lɔmɛa :Tumu zugo.} kumulɔng, inde lɔ buyna bo dhogoyte a nɛng?’

2 Na nɔng eleo eri kona na kugo gɔ̀rrè nɛnde na ibha na ojju bhɛa nɛ kɛrghɛnɔ 3 na sɛɛsɛ yɔk, “Ga shigitɔ! Hunde ngani bhɔdhtɛo na tɛhɛyɛto ko erroa ngani chichoye, bhee hɛyɛo na lɔmɛung :Komoruya tumony ninggɛ dhul. 4 Yɔk bhɛa zuga lɔmma :Komoruya tumony, inde lɔ buyna jorrono lalugɛ kumulɔngge, aynde lachchana rɛ na hɛt ko ngaeritaye. 5 Na inde lammana erite ku nganga sara ganyuye, ngangaye lammanany anye.

6 “Na nɔng inde ibhbhana ngagiya chichi yɛbhbhanyɛ anyeye kona na tis na keme lɔga gɛrsaye, nɔng hunde kìbhta golua bo dhidhinga na kɛ̀chɛbtɛsɛ ngo na kùjjuktɛsɛ yirisiya bo hɔrra na kɔgɔyɛ, anda a challi. 7 Yɔk zuga marrɛa Tumu kumulɔng, ale ruɛ rɛhi ke ngaya tissɛ zugo na kemesigi lɔga gɛrsaye. Yɔk lɔga tissɛa zugo ale honydɔ, na nɔng hirre kunɛ ngalɔktonuye, ale ruɛ rɛ. 8 Na mɛa siya nunu oo jagari hunde tisseny na me lɔga gɛrsaye, kedhdha na ujjuga. Ko bhee lɔmɛ sɛnɔ kari oo jagarɛ kari na kùjjukkagɛiny goa iho dhul, hunde tɔlɔ siyɔ dhɔnɛ oo ngɔl na ok bhɛa basseya iho dhul, anda a challi. 9 Na ko nɔng kawariya nunu hunde tisseny na me lɔga gɛrsaye, tukuso na ujjuga. Ko bhee lɔmɛ kawarɛ kari na kùjjukkagɛiny goa iho dhul kèe Gɛhɛnna, ^{▼▼Ngagoya kèe Gɛhɛnaye, anna ngagarsao messono Tumu tɔllɔng na katɛɛ Moldoy ko zukte kɔbhbhɛ lɔga Moldoynyde.} hunde tɔlɔ dhɔnɛ na ok bhɛa basseya iho dhul, anda a challi.

Lɔga Kɛ̀lɛhɛnɛsɛna Mɛdɛra Garsa

10 “Na mɛa ga kìbbayunggɔ! Ngagiya chichi chichiye kona ngabhasso, ke ngaya zuga ekko :Tumu ɛlla tumɔ bhɛkkɛa yɔk kali kali itinynyanɛnɛ ko Baba nanu iho tumɔye. 11 Na nɔng Hiri Hoynɛ bɔɔ kowa na kibbaysi zuga bere garsɛa. ^{▼▼Dadabinyaa ku Girikichɛn gena ngalɔkta ɛl kutur 11giyeye ninggɛ. Yɔk ngalɔkta ko ga ɛlla Dadaba Kamannaa Bere Kɔdhdhana :Lukasi 19:10ɔ a dhɔnɛ.}

12 Mɛa ga yoktogonyuyɔ! Ngangaye hunde hir kona kɔtɔlɔ mɛdɛrni 100 na kona kagar, anda ngadhɔtto ngagiya ku 99de na kɔyo na lameonoo naa garsa? 13 Ga shigitɔ! Nɔng hunde jɔana ngamɛdɛrta wa garase, bhɛa ngagiya ku 99 ngani kagaratoye, goore hinisa nɛnɛ hɔl ke ngaya jɔanɛ nganda ku dhɔnɛ wa garase. 14 Na ko nɔng Baba nu iho tumɔ bhɛa senno kagartɛ :ngagiya chichiye konnɔ ngahinno.

Lɔga Maya Kèmesso Hunde Kìdhdhanɛ Kɛngɔye

15 “Na hunde zuga yɛbhbho Tumu kari kona ɛddɛu lɔgɔ bhɛa nunuye, ok na mɛzzi ko nɔng bhichang na dhugunɛsɛ lɔkte ɛddɛ :nɛaye. Na hunde shigeny na ujjugu lɔgɔye, ngangaye lɔgɔ gara na teyo zuga dhɔnɛna sɛgɛn. 16 Na nɔng hunde ngani ngashikkenyo na lɔgɔ ujjukkoye, inye ibha hir kona oo zukte ku ramman na ojjigi lɔgɔ kari, ke ngaya hunde lɔgɔ chirarrɛ :zuga orronɛa kawarre gee ku ramman oo sizziye, anɛ lɔga ku dhereye. 17 Na hunde tamaru na yɔk ngani ngashikkoye, inye ok na lɔga gɛnyɛ yogɛsɛ zuga ɛllo kari yɛbhbhɛa Tumu kumulɔng. Na hunde tamaru na chɔɔ yɔk ngani ngashikkoye, inye gɔny huna hira Tumu ngani kɛyɛbhbhao oo huna hira mukko gharata.

18 “Ga shigitɔ! Lɔkte ngidhdho bay ngayaye kumulɔng, ko yɔk tumɔ tundɔ ngidhinɛyɔ. Na gee igommono bay ngayaye kumulɔng, ko yɔk tumɔ tundɔ kìgommonoyɔ.

19 Mɛa ga kɔ̀tɔrrɛung sɛgɛn, na shigitɔ! Chɔɔ bay ngaya hunde bhɛa nu zukte ku ramman kishiktɛy lɔk gena na kighini Baba nanu iho tumɔ, nɔng urrugɛsɛn na mesɛsɛndɔ. 20 Anye bhee kesennagɛung ngangaye, a ngaya chɔɔ hunde zukte ku ramman oo sizzi kɛtɛldɛ bhee dhɔnɛ ke bhɛa anɛa zuga ganyu, anye kɛlɛo ko yɔk kari ngoonuye.

Lɔga Kùjjugɛa Lɔga Gɛrsa

21 Na koo Betiros ogo gɔrre Yesusiye na ghinu na sɛɛsɛ, “Komoru, na mɛa hunde hira yɛbhbhinyi kona kɛddɛ lɔgɔ bhɛa nanu tii, lɔga gɛnyɛ anye maya kujjugi kɛngi isɔng? Maya kujjugi ko bhee anɛ kɛngi issabbay ka?

22 Na yagɛsɛ :Yesusi na sɛɛsɛ, “Aa Aa, kɛngi issabbay ngayo. Ga shiktɔ! Maya lɔga gɛnyɛ ujjugi jagarɛ kɛngi 70 kɛngi 7. ^{▼▼Dadabinyaa ku Girikichɛn gena sennɛ, “...jagarɛ kɛngi 77.” Na hologun a bhɛa kènɛa lɔga zugony maya kùjjuk lɔgɔ kali kali.}

23 “Bhee anɛ ngangaye, a ngaya lɔga lɔmɛa :Komoruya tumony zugo hɛt ko lɔkte dha bere me :komoru konnɔye. Nɔng dha bere se kumuga birinyaa ku ewona lɔmɛsɛnɛa :zuga kachchɛa nɔng. 24 Na kɔ na hunde kɔdhdhanɛ ewona dagaye, yɔk zugo honynyɛ hira lɔmɛsɛna nɔng ewo, worginya kamayi 10,000. ^{▼▼Yɔk ngaworginyaonu ga kammaa ku dhɔnɛ hunde kɛ̀lɛhɛnde, heo birinyaa kàgadhiyɛa hira mesinɛna oynya 20.} 25 Nɔng ngahirronu dha bere lɔ ewoa bhɛa gadhiyɛa na ɔanɛa ningginɛna. Na nɔng komoru yogɛsɛn zugo na kataldɛy ngahirronu ko tɛriya nɛnɛ, ko erroa gɛnyɛ ko ahaye lɔmbe kumulɔng na birinya kutunggɛ ko ewo.

26 “Na hiri nɔng dha bere kɔdhdhɛsɛn komoru kɔmma na tɔllɔhɛsɛn na senɛsɛn, ‘Ga oy hini ke bu na reony ungge muchugi. Ahaa kɔlɔmmaginyi kumulɔng kagadhienydɔ.’ 27 Na komoru wonyɛsɛn :hiriyɔ na chirbhisi na dhɔyɛsɛn ahaa kènno kagadhi na senɛsɛn, ‘Ogo!’

28 Na ngahirronu hunaa bhonsana na kɔaye, koo jɔana hirre mesinɛ kari dha lɔmɛsɛn nɔng ewoye birinyaye ku dinarinya 100. ^{▼▼Dinar a sara birinyaa zuga Rome bere kinginye. Na dha bere ngabɛrguonu hunde hiri me zinggo kali dhɔngge, kàgadhi dinari dhɔnɛ.} Na mag ngo gig na churu na senɛsɛn, ‘Gadheony ahaa bere lɔmmaganyi mɛarrɛ!’

29 Na hiri nɔng kɔdhdhɛsɛn lallɛn kɔmma na tɔllɔhɛsɛn na senɛsɛn, ‘Ga oy hini ke bu na reony ungge muchugi. Ahaa kɔlɔmmaginyi kagadhienydɔ.’

30 “Na nɔng lallɛn dha bere mar dhul na koo chilɛ na kɛ̀hɛyɛ doraa chibinuny na kìchib ko bhee gadhiɛ ewoa lɔmma :nɛa. 31 Na yɔk zuga kaynɛna kari gena dha bere orrɛ ngalɔkta na dɛmnɛ na hinisi kɔrrɔ tirr na hɛ na yogɛsɛnɛ komoruya kachchɛa :yɔkku ngalɔkta wa ɛrrinyaye kumulɔng.

32 “Na koo komoru eleono ngahirronu kay nɔng wa chib lallɛnde na senɛsɛn, ‘Ngagaymayta bu kɛngɔ gɛrsinyde! Nɔng anye annaa wa kɔdhɔyaginyɔ ewoa ahaa lɔmmaganyi kumulɔng ke ngaya wa tɔllɔhagɛanyde. 33 Na ko inye maya ngachirbhisio hira kaynɛno kari ngadamita wa kichirbhisiyɛiny :anyoye?’ 34 Na dɛbiny na ibhbhana ngahirronu na ajjɛ gulsachina doraa chibinuny na kaytɛ na katti ko bhee gadhiɛ ewoa ahaa lɔmma :nɛa bhoy.

35 “Na mɛa ko igge kumulɔng hunde lɔga ɛddɛanɛa :zuga yɛbhbho Tumu kari dhere ngaujjukkooye, ko nɔng Baba nanu iho tumɔ ale attiung ngadamita ngahirraye.”