Matthew 25
Lɔga Ɛlɛhɛnnanɛa :Yesusi Lɔga Sedhdhea Ku Tɔmmɔn
1“Nɔng ale ngakoleonu lɔga lɔmɛa :Komoruya tumony ▼▼:Komoruya tumony Ngalɔkta sennɛ “Komoruya Tumonyde” ɛlɛhɛn sara Tumu. Yɔk zuga Ayhudhi a zukte ɛngɛrsɛ Tumu goore na sara Tumu dib ngaeliyɛo. Na Matiyos huna bere kɔdhdhɛsɛna yɔk ngalɔkta, hunde kɔn lɔkte sennɛ lɔga lɔmɛa :Komoruya Tumony zugoye, ngangaye a bhɛa senɛa lɔga lɔmɛa :Tumu zugo.
zugo, hɛt ko lɔkte dha bere messɛ :sedhdhee ku tɔmmɔn terinyɛ gochin na bhonsɛ bhɔ na kɔmɔyɔ rorite duri wololoye. 2Yɔk ngasedhdheonu ku tɔmmɔnde dha bere agga ko zugo kari ngani kɛtɛldao. Na hayna a gɔngga, hayna a ghurghuri. 3Na ngagiya ku gɔnggaye yɔk dha bere terinyɛ gochina sɔng na mala gony bhɛgɛa gochina gɛ ngani kɔsɔgɔyɔto. 4Na yɔk ngagenu ghurghurte dha bere hunde terinyɛ gochina na hɛye sɔgɔttɛ mala bhɛgɛa gochina gɛ gusiyɔ. 5Na nɔng roriyaa dureo wololo dha bere i dhul na shaw ngakunno. Na yɔk sedhdheaa gina kumulɔng bhiikta :ungu na tunggi lush. 6“Na hunaa bho anna bar kɛngɔye, shikkɛ zukte bholollɛ na sennɛ, ‘Roriya kùdureo a ngandonu kunde, na banda mɔyɔyɛ!’ 7“Na sedhdheaa gina kumulɔng bansanɛ na terinyɛ gochina gɛ na ɛl kɔk. 8Na gaa ku gɔngga yɔk yogɛsɛnɛ gaa ghurghura lɔgɔ na senɛsɛnɛ, ‘Ayiy mala nu bhe chinyi. ▼▼Zuga Ayhudhi a zukte gochina terinyɛ gala hɛtta ko bililinya. Na bilili toye ɛrɛsɛnɛ mal na aynde waldɛ goye. Na nɔng tana na Suri, agge kàgga kalkay. Na ngagochinda gɛye, hɛt ko kalkanya rɛ na waldɛ malnyoke.
Gochina gayo se kidhitɛyɔ.’ 9“Na yɔk gaa ghurghura yagɛsɛnɛ na senɛsɛnɛ, ‘Nganga ngayo! Nɔng agge hunde kibhtao ngamalda kɔlɔmmo :aggeuye na kɛ̀ngɛrtagungɔ, ale ngakɛ̀hɛtinɛnɛo. Na mɛa igge ago talda bhee nu hung.’ 10“Na yɔk hunde chinyi ngani hɛ na se katalda malde, nɔng rori kun dhogoy. Na yɔk gaa ghurghura ɛlla kɔk dhiyɛ ko nɔng kari bhɛa duriyɛa :zugu wololo. Na waran kùnyuk dhogoy. 11“Na koo sedhdheaa ku gɔngga ko yɔk hony na tɔllɔhɛsɛnɛ rori na senɛsɛnɛ, ‘Komoru! Komorue! Alae, wo oyogiy waran!’ 12“Na nɔng rori yagɛsɛn na senɛsɛn, ‘Ga shiktonyuyɔ! Anye kimaggung dhul.’ 13Na mɛa ko igge mɛdhta na bhɛktɛ shodhdhik ke ngaya imagɛo ngakoleonu oo ngaunggonu dibte. Lɔga Ɛlɛhɛnnanɛa :Yesusi Zuga Kàjjɛa Worginya
14“Na sɛgɛn lɔga lɔmɛa :Komoruya tumony zugo ale hɛt ko lɔkte dha bere me :hirre se kok ba konnɔ na koo eleono gaymanyaa gɛnyɛ na dhɔyɛsɛn ahaa gɛnyɛye. 15Nɔng ngahirronu dha bere dhummana worginya na ngɛrɛsɛn gaymanya bhiy bhiy damiya anda messɛa na ɔanɛa. Na kona ajjɛ worginya kammayi hayna ▼▼worginya kammayi hayna Ngalɔkta Girikichɛn keli, “talant.” Na talant a birinya. Na talante dhɔnɛ hunde kɛ̀lɛhɛn ko birinyaye, hɛt ko birinyaa kàgadhiyɛa hira messo zinggo oynya 15 oo 20 kumulɔng. Na aynde ko agge kibhbhano talant na kɛlɛhɛnɛsɛno worginya kamma dhɔnɛye.
, kona ajjɛ kammayi ramman, na kona ajjɛ kamma dhɔnɛ. Na nɔng koo kɔyɔ. 16Na ngandonu kàjjɛ worginya kammayi haynaye, nɔng kɔɛ ke tiri na koo tis na ammanɛ gee ku kammayi hayna sɛgɛn. 17Na ko nɔng ngandonu kàjjɛ kammayi rammande, dha bere kɔɛ na koo tis na ammanɛ gee ku kammayi ramman sɛgɛn. 18Na ngandonu kàjjɛ kamma dhɔnɛye nɔng dha bere kɔɛ worginyaa bɔɔ ajjɛa :hira kachcha :nɛa na ulluguny na bhɔgɛsɛn ba toye. 19“Na koo ngahirronu ku ɛnaye hunaa iho bɛrgunyaa bo mɛra na tewa ushaye, wokkono na ojjɛ ko zugo lɔga worginyaa bere ajjɛa yɔk. 20Na gaymaya bere kàjjɛa worginya kammayi hayna, dha bere dhumana ga bere tissana ku kammayi hayna sɛgɛn na kunɛ na senɛsɛn hira kachcha :nɛa, ‘Komoru, inye annaa bere yɛbhbhanyi na ajjanyi worginya kammayi hayna. Na anye bɔɔ kitissa na ussoa gee ku kammayi hayna sɛgɛn.’ 21Na nɔng ɛna senɛsɛn, ‘Dha bɔɔ mesu shɛɛ kɛr! Gaymaya bassa kɛ̀yɛbhbhinyi ani :inyo! Inye wa mesu lɔga chicho muchuga shɛɛ na teu hira kɛ̀yɛbhbhinyi. Na mɛa anye kajjiny buyna allinɛnɛi ahaa bo bibiyo. Na ga wo gɔrra nande na kɛ̀dɛlɛ kari.’ 22“Na ko nɔng gaymaya bere kàjjɛa worginya kammayi ramman, dha bere kun na senɛsɛn hira kachcha :nɛa, ‘Komoru, inye annaa bere yɛbhbhanyi na ajjanyi worginya kammayi ramman. Na anye bɔɔ kitissa na ussoa gee ku kammayi ramman sɛgɛn.’ 23Na ɛna yagɛsɛn na senɛsɛn, ‘Dha bɔɔ mesu shɛɛ kɛr! Gaymaya bassa kɛ̀yɛbhbhinyi ani :inyo! Inye wa mesu lɔga chicho muchuga shɛɛ na teu hira kɛ̀yɛbhbhinyi. Na mɛa anye kajjiny buyna allinɛnɛi ahaa bo bibiyo. Na ga wo gɔrra nande na kɛ̀dɛlɛ kari.’ 24“Na koo gaymaya bere kàjjɛa worginya kamma dhɔnɛ ko nɔng ko na sɛɛsɛ hira ku ɛna, ‘Komoru! Anye kaggainydɔ inye hunde ani hira kɛngɔ gɛrsa zugo ngachirbhisiyo, sunisɛni rɛ liwa gua ngani dukkiyɛyɛayo na mugɛsɛn rɛ aha bhɛa ngani sachchiyɛyɛayoye. 25Na anye kɛtɛngɛrinyɔ. Na kokka na kibhau worginyaa gunyu ku kamma dhɔnɛ na kullugunya na kɔbhɔgɛsɛu ba toye. Na mɛa nɔ! Ahaa gunyu a ngagiya!’ 26Na nɔng ɛna yagɛsɛn na senɛsɛn, ‘Ngagaymayta ku gɔnggay bu ku kuhuyagite! Yee, ngangaye inye bɔɔ gaanany kingi hunde kani hira kusunisɛni rɛ liwa gua ngani kùdukkiyɛyɛayo na kumugɛsɛn rɛ aha bhɛa chɔɔ ngani kàsachchiyɛyɛayoye? 27Nɔng hunde a ngangaye, inye maya bɔɔ ibhbhan ahaa bɔɔ kajjinyi na ajjɛ zuga tissɛa. Na mɛa hunde kowokkonde anda kibhbhan ko bhɛlɛkte bɔɔ ammanɛye. 28“‘Mɛa ga ibhta ngaworginyaa ku kamma dhɔnɛ lɔ ngahirraye na ayɛ hiraa lɔmma gaa ku kammayi tɔmmɔn. 29Anye bhee kesennagɛung ngangaye a ore go, hirre lɔ ahaye, nɔng ga gɛnyɛ kɔ̀tɔrɛ na a mɛri. Na nɔng inde ngalɔmmoye, chɔɔ gee kesea lɔmbe kìbhbhana na kɛ̀hɛyɛyɔ. 30Na mɛa ga ibhta ngagaymayta hologun ninggɛye na ujjugu bhɔ bhɛa ku mugura bo kɔrra ruyɛa :zugu na rimmɛa nigiya.’ Lɔga Kedhdhɛa :Tumu Lɔgɔ Kolea Ale Wurtune
31“Nɔng Hiri Hoynɛ hunde ale kunde, kun ke na bo lɔmmana diram na dhɛanɛ ko zuga ekko :Tumu kumulɔng. Na i alleya nɛnɛ komorumo bo lɔmma diram. 32– 33Na bhorinya kumulɔng ale mukkinya na ɛl bhɛa nɛnɛ jaa. Na nɔng ale ken zugo na oy bhiy bhiy. Na kɛngana ga ridhing ningginɛna na ajjɛ kichili bhɛa nɛnɛ siyɔ sɛtɛn, na ga ku kuhuyaga, ajjɛ kichili siyɔ kangitɛn huna hira iwonɛna ibhbhana mɛdɛrni ko tenɔ na kɛngana na mɛdɛrni ojjo sɛtɛn na tenɔ ojjo kangitɛn. 34“Na nɔng Komoru ale senɛsɛn gaa ɛlla bhɛa nɛnɛ sɛtɛn, ‘Igge ngagiya bere tuhong :Babaa nanuye, hoya bhaga bhɛa lɔmɛungu :nɛa bere kɔdhdhanɛa bɛrgua ngani kèghendonɛa ba ko mɛa toye na ojjogungu kɔk. 35Anye bhee kesennagɛung ngangaye a ore go, huna bere dhakkanyi :hozzo, igge annaa ayanyu amissɛ. Na huna bere dhakkanyi :huny, annaa ayanyu ahaa kàmatta. Na huna bere kowoyi ɔra nu ke hira annaa, igge annaa lambaganyu. 36Na huna bere kowoyi ngaulo, igge annaa ayanyu ruminya. Na huna kilagasi, annaa ɛbhionyu. Na huna bere kìchibbonyi, igge annaa gɔnydanyu.’ 37“Na yɔk zuga ridhing ningginɛna ale yagɛsɛnɛ nɔng na senɛsɛnɛ, ‘Komoru, ngangaye agge bere kàrtiny hunde dhakkiny :hozzoye, na amissɛ kàyiny minang? Oo bere kàrtiny hunde dhakkiny :hunyde, na ahaa kàmatta kàyiny minang? 38Na bere tɔu ɔra nayo ke hira annaa, na agge kàlambaginy minang? Oo bere tɔu ngaulo na ruminya kàyiny minang? 39Na chɔɔ bere ilagau oo kɛ̀chɛbtiny na kɔ̀ggɔnydiny minang?’ 40“Na nɔng Komoru ale yagɛsɛn na senɛsɛn, ‘Ga shigitɔ! Nɔng igge huna bere mesɛsɛno ngazukta chichi ku gochonginya ko ngɔnanyaa ganyuye ngalɔkta ɛanɛo zugoye, ngangaye ngalɔktonu messogonyu anye rɛ.’ 41“Na ale yogɛsɛn gaa ɛlla bhɛa nɛnɛ kangitɛn na senɛsɛn, ‘Igge ngagiya bere kɔ̀chɔrrungge, bhɛa nanu ngaya ngaɛllo! Ago goa ngadhittinɛnao dhul bere kòjjɛsɛna Moldoy ko zuga ekko :nɛa kɔk. 42Anye bhee kesennagɛung ngangaye ore go, huna bere dhakkanyi :hozzo, igge annaa amissɛ ngani ayanyuo. Na huna bere dhakkanyi :huny, annaa ahaa kàmatta ngani ayanyuo. 43Na huna bere kowoyi ɔra nu ke hira annaa, igge annaa ngani lambaganyuo. Na huna bere kowoyi ngaulo, igge annaa ruminya ngani ayanyuo. Na huna bere kilagasi ko huna bere kìchibbonyi, igge annaa ngani gɔnydanyuo.’ 44“Na ko yɔk ale yagɛsɛnɛ na senɛsɛnɛ, ‘Komoru, agge bere kàrtiny hunde dhakkiny :hozzoye oo :hunyde, oo bere kàrtiny hunde wo ɔra nayo ke hira annaaye, oo hunde wo ngauloye, oo bere kàrtiny hunde ilagasiye oo hunde kìchibbenyde na ngani kɛ̀yainyo minang?’ 45“Na nɔng Komoru ale yagɛsɛn na senɛsɛn, ‘Ga shigitɔ! Nɔng igge huna bere ngazukta chichi ku gochonginya ko ngɔnanyaa ganyuye, ngalɔkta ɛanɛo zugoye ngani mesɛsɛayo, ngangaye ko anye ngani mesogonyuo.’ 46Na ngazukta gɛrɛ ku ngangaye yɔk ale hɛ bhɛa attiya iho dhul ko kingi. Na yɔk ga ridhing ningginɛna ale hɛ bhɛa basseya iho dhul.”
Copyright information for
SuqSC