Mat 28 | SuqSC | STEP | Na hunaa Kala Ayawsuny tewa ushaye, unga ku sabba bhelleyɔ shaw, Ngamariyama Magadhala ko Ngamariyamaa ku kona banda na ago na kɔgɔnyigi igingey.

Matthew 28

Lɔga Bansanɛa :Yesusi Rɛsɛyɔ

1 Na hunaa Kala Ayawsuny tewa ushaye, unga ku sabba bhelleyɔ shaw, Ngamariyama Magadhala ko Ngamariyamaa ku kona banda na ago na kɔgɔnyigi igingey.

2 Na ba chukɛɛ goore ke ngaya hira ekkono :Tumu kunɛ tumɔye. Na ogo igingeyɔ na ubullanu bɛa kùnyugɛa igingey tugɔ na liginɛ tundɔ. 3 Nɔng ɛya nɛnɛ bere hɛtta ko tumua bhadhdha na ruminyaa gɛnyɛ hɔlla hurr huna kugurruny. 4 Na bholisa bhɛkkɛa igingey tɛngɛrɛ nɔng goore na bhariyi tik tik na tɛhɛyɛ ko zuga rɛssɛa.

5 Na nɔng sɛɛsɛ tɛrroaa gina, “Bho ngaɛngɛrso! Igge hunde lameo hira bɔɔ kìlakka kèe Yesuse, kaggayɔ. 6 Nɔng ngahirronu mɛa ngaya ninggɛ. Wa banaa damiya bɔɔ yogɛa. Chɔɔ ga hoya gɔnyigi bhɛa bɔɔ kòjjɛa. 7 Na igge mɛa ago ke tiri na yoktɛsɛ zuga kɔbhbhɛa nɔng na seyɛsɛ, ‘Nɔng dhaa banaa rɛsɛyɔ na aynde jim Gelilagiyeye. Na aleo orro ngonu.’ Nɔng anye mɛa wa koyogogungɔ.”

8 Na tɛrro dhɔyɔ igingey ke tiri na nge ga bo ɛngɛrsɛa bho na tanda dɛlɛsɛnɛa gɔrɔ gɔrɔ. Na ago na koyoktɛsɛ zuga kɔbhbhɛa Yesus ngalɔkta. 9 Na dhulɛsɛ :Yesusi dɛk na issau na sɛɛsɛ, “Tɔlɔmɔ zany na tɛldi ke na bo challa!” Na yɔk ago gɔrre nɛnde na ibhigi jagarɛ na tɔgɔndɛsɛ kɔmma. 10 Na nɔng sɛɛsɛ yɔk, “Bho ngaɛngɛrso! Ago yoktɛsɛ gochonginya ganyu na kago Gelilagiye. Aleo orronyɛ ngonu.”

Lɔga Zuga Bhɛkkɛa Igingey Hɛyɛa Lɔgɔ Ɔrɔ

11 Na yɔk tɛrro hunde chinyi ngani hɛye, yɔk bholisaa bhɛkkɛa igingey gena ago chɔɔ ɔr na yoktɛsɛ gɔldangɛa bibiyo doraa Tumu barara lɔgaa ɛrrinyana kumulɔng. 12 Na yɔk gɔldangɛa bibiyo doraa Tumu barara ko zuga Ayhudhi bibiyo muktiyaa na mɛzzi na ibhta birinyaa bo mɛra na ayɛ bholi na kɛmɛsɛ lɔgɔ 13 na seyɛsɛ, “Ago yoktɛsɛ zugo na seyɛsɛ, ‘Agge dhaa barɔ zuga kɔbhbhɛa nɔng hoya na ogoro hiri na aytɛ hunde kungussoye.’ 14 Na ngalɔkta chɔɔ hunde kago na kishik :komoruyɔ, ale kɔɔbhɛsɛno :aggeu na igge lɔkte gɛrsi ngadokkonoo.” 15 Na bholi ibhta birinyaa gina na mesigi damiyaa kàmadhɛsɛna. Na ngalɔkta bere kɔbhɛsɛnɛ :yɔkku zugoye, chɔɔ mɛa toye zuga Ayhudhi ga mɛra ngani yokkɛyɔ.

Lɔga Egɛa :Yesusi Zuga Kɔbhbhɛa Nɔng Na Kamadhtɛsɛ Zugo Kumulɔng Kamannaa Nɛnɛ Challa

16 Na koo zuga kɔbhbhɛa Yesus ku 11 ago kutula iho Gelilagiye damiyaa senɛsɛna :Yesusi. 17 Na hunaa orrɛa nɔngge, tɔgɔndɛsɛ kɔmma. Na yɔk gena dhaktɛ ko hinisi. 18 Na nɔng ko gɔrre nɛye, na sɛɛsɛ, “Buyna kɔlɔmɛi zugo ko aha kumulɔng, tumɔ ko bay bere kàyanyɔ anye. 19 Na mɛa ago madhtɛsɛ bhorinya kumulɔng lɔga ganyu na kete zuga kɔbhbhanyɛa. Na churu sara Babaa na Tumu ko gaa Eriya Nɛnɛ ko gaa Kuloya Nɛnɛ, 20 na madha na kɔbhtɛsɛ lɔga taa kamadhdhagungu :anyo kumulɔng na kɛbhɛgɛtɔ. Nɔng anye tii tii kɛ̀l kari ko igge ko bhee uturronɛ ba.”