Mat 7 | SuqSC | STEP | “Zugo ngaujjukkano na aynde ko igge ngakùjjukkanɛungoye.

Matthew 7

Lɔga Maya Zugo Ngakùjjukkanɛayo

1 “Zugo ngaujjukkano na aynde ko igge ngakùjjukkanɛungoye. 2 Hunde ujjukkano zugoye, ko igge ale kùjjukkanung damite ujjukkanɛo yɔkte. Na hunde mankinɛno galite ku ɛnɛngge, ko igge ale kàmankisogung galite mankinɛnɛoye.

3 “Na inye hunde ani nganda lɔmi kɛya bo gore kawariyɔ na chɔɔ ngatɔgiyoye go, na ngashalaldayta chinyi godhe lɔ goonuye gunyi na me ɛnɛng? 4 Na mɛa hunde kawariya nunu a nganda ngani lɔ kɛyɔ bangguraye go, na goonu, ‘Ga kɔ̀dhɔgɔa ngashalaldayta lɔmi kawariyɔye,’ anda senɛsɛn ɛnɛng? 5 Alala! Ngahirra tabhi zugo nigiyayɔye, ga sabbɔ dhɔgɔa ngakɛyɔ bangguraya lɔmi kawariyɔye, na aynde ori ba shɛɛ na dhɔgɔanɛ shalaldaya chinynyo godhe lɔmma :goonuye.

6 “Na ngaibhta ahaa Tumu kullɛna na ayɛ rɔsi. Hunde messo ngangaye, yɔk kesea wokkonɛ na tibbarrungɛ chinyi chinyi. Oo ngaibhta galyoga gu na ujjuktɛsɛ bhɛa ɛlɛa :chɔwachinnu. Hunde messo ngangaye, yɔk kesea ale dokkɛ jagarre.”

Lɔga Maya Kògolɛa Tumu, Na Kàlamiyɛa, Na Kèliyɛa

7 Ogolo Tumu, na aynde ale ajjung lɔkte ogolloye. Na lɔkte hinno bhɛa nɛnɛye lamitɔ, na aynde ale jɔanoye. Na elitɔ, na aynde ale ossogung tutukte. 8 Anye bhee kesennagɛung ngangaye, a ngaya gee ogollɛ nɔng kumulɔngge, ale kàjjɛ lɔkte ogollɛye. Na gee lamiɛ lɔga hinnɛa bhɛa nɛnɛye, ale jɔanɛye. Na ko yɔk gee elɛɛye, ale kòssɛn tutukte.

9 Mɛa bhɛa nu hunde kɔtɔlɔ hirre lɔ erite ku lusi na kɛtɛhɛn tila na kogol, anda ibhbhana bɛ na ajjɛyɔ? 10 Oo hunde eri kɛtɛhɛn urgusi, anda ibhbhana kono na ajjɛyɔ? Ngaajjɛo. 11 Na chɔɔ igge hunde anno ngagiya ku kuhuyaga na gao bhɛa ajjɛo erroa gu ahaa challaye go, na Baba nu iho tumɔ gee ogollɛ nɔngge, anda ahaa bo challa goore ngaajjɛo ɛnɛng? 12 Na mɛa lɔkte senno kemesogung :zuguye, ko igge maya mesɛsɛno zugo, ke ngaya lɔga ɛlla Damiya Tumu ko ga bere yokkonɛa zuga yogɛsɛnɛa zugo lɔga dhugunono :Tumu kumulɔng, dhugunnonɛ ngalɔktaye.

Lɔga Warana Ngochchua Ko Na Naa Bhɔa

13 Dha ganggua dhoo warana ngochchua ke ngaya haraye bu gore dho warande bhɔye anɛ na kɔa gɔra garsɛa :zugu na zugo ga mɛra dhoɛ ngaharaonuye. 14 Nɔng ganggua kɔa gɔra basseyny anna chinynyo godhe waran ngochchua. Na chɔɔ zukte dhoɛye, a muchugi.

Lɔga Zuga Tabhbhɛa Zugo Dhugunonɛa Lɔgɔ Huna Gaa Dhugunonɛa Lɔga Tumu Dhere

15 “Na mɛa igge tɛldi kɔk! Ngakitabhtung :zuga ku butoga bhɔdhdhɛa rɛhi ke zuga yogɛsɛnɛa zugo lɔga dhugunono :Tumu! Yɔk hunde hony na assanungɛye, heo zuga challa. Na yɔk hunde kàmarak lɔga gɛ shɛɛye, a yoyaa bo gɛrsa ulubbɛa rɛhi chɔra mɛdɛrniuny na tibbarrɛa zugo chinyi chinyi. 16 Yɔk zukte ku ngangaye, ale gao bhɛa kawara gɛ eggissonɛa. Mɛa anda radhi eggissono kawara kɛyayny na kàmbɔ? Oo anda churray eggissono kawara dhudhubanggurrany na kàmbɔ? Ngaeggissonɛo. 17 Na mɛa ngadamita, kɛna challa kumulɔng eggissonɛ kawara challa. Na yɔk ga gɛrsa eggissonɛ kawara gɛrsa. 18 Nɔng kɛya challa bhee eggissonɛ kawara gɛrsa, ninggɛ. Na ko nɔng kɛya gɛrsa bhee eggissonɛ kawara challa, ninggɛ. 19 Na kɛnde kawara challa ngaeggissonɛoye kumulɔng, kègedhdhana na kɔ̀chɔgɛ go. 20 Na ngadamita orɛo kɛnɔ kawarɛ na gayɛoye, ko yɔk zuga ku butoga bhɔdhdhɛa rɛhi ke zuga yogɛsɛnɛa zugo lɔga yokkono :Tumu, ale gao bhɛa kawara gɛ eggissonɛa.

21 “Zukte sennaganyɛ, ‘Komoru, Komorue’ kumulɔng ga ale hɛa na lɔmma :Komoruya tumony ^{▼▼Komoruya Tumony Ngalɔkta sennɛ “Komoruya Tumonyde” ɛlɛhɛn sara Tumu. Yɔk zuga Ayhudhi a zukte ɛngɛrsɛ Tumu goore na sara Tumu dib ngaeliyɛo. Na Matiyos huna bere kɔdhdhɛsɛna yɔk ngalɔkta, hunde kɔn lɔkte sennɛ lɔga lɔmɛa :Komoruya Tumony zugoye, ngangaye a bhɛa senɛa lɔga lɔmɛa :Tumu zugo.} ngayo. Na yɔk gee ale hɛ na lɔ :nɛaye, a gee messɛ lɔga hinno :Babaa nanu iho tumɔye. 22 Nɔng kala ale kedhdhɛa :Tumu lɔga zugony, zugo ga mɛra ale sennaganyɛ, ‘Komoru, Komoru, na kèe agge kanno zuga bere kudhugunɛsɛno zugo lɔga Tumu sara gunyu, na kobhoniseono mɛnɛnga sara gunyu, na chɔɔ kemesso lɔga bo mɛra dhandala sara gunyu?’ 23 Na anye nɔng ale kudhugunɛsɛn lɔgɔ dib na kesenɛsɛn, ‘Ngakuhuyakta giya, anye kimaggung dhul. Na ago ngagɔrronu! Ngaya nande ngaɛllo!’

Lɔga Hira Ghurghura Ko Ga Naa Ku Dalle Kɔdhdhɛa Doriyo

24 “Nɔng hirre shik ngalɔkta ganyde na messe, hɛt ko hira ghurghura bho kɔdhdha doraa nɛnɛ bhɛa kumkuma. 25 Na ko hunde guyɔ kɔdhɔya na karak goore na taan kete bu na ngɔyɔ kɛbbɛk na kuchukki dori, ba ngadhakkao ke ngaya bɔɔ kɔ̀gɔdhdhɛ bhɛa kumkumaye. 26 Na nɔng inde shik ngalɔkta ganyde na ngamessoye, hɛt ko hira ku dalle kɔdhdha dori bhɛa ku kassay. 27 Na hunde guyɔ dhɔttana na dhakka goore na taan chibbo na ngɔyɔ ɛbbɛkka dori na chukkeoye, dhakka ba na nyomnɛna.”

28 Na Yesus hunaa dheyaa lɔgaa yokkonoye, yɔk zugo iwachi ngalɔkta madhinɛnɛ :nɛaye, 29 ke ngaya zugo lɔgɔ madhɛsɛn huna hira lɔmma buyn, na huna zuga gɛ madhdhɛa zugo Damiya Tumu bere kàjjɛa Muse ngani kamadhdhoye.