Tit 1 | SuqSC | STEP | Ngadadabta kɔgɔdhan :anyo Bhaulosi, hira kagay Tumu bere ekonyi :Yesus Kirisosi na kìriy zuga bere bɛrrana :nɛa na kataga kamannaa ku dhere dhugunɛsɛna bhɛa yɛbhɛa dib na kɛbhɛgɛ shɛɛ.

Titus 1

1 Ngadadabta kɔgɔdhan :anyo Bhaulosi, hira kagay Tumu bere ekonyi :Yesus Kirisosi na kìriy zuga bere bɛrrana :nɛa na kataga kamannaa ku dhere dhugunɛsɛna bhɛa yɛbhɛa dib na kɛbhɛgɛ shɛɛ. 2 Na hunde yɛbhɛ ngakamannaya ku dhere na bhɛgɛ shɛɛye, ibhɛsɛnɛ lɔga ale jɔanɛa basseya iho dhul hinisi damiya bere ɛsɛdhdhanɛa :Tumu sabbaa nɛnɛ huna chɔɔ ba ngani kètegenyoayo. Yɔk ngalɔkta hunde a dhereye, kàggayɔ ke ngaya Tumu butomo ngameziyɛoye. 3 Nɔng Tumu Komoruya na ibbayseiy annaa bere ibhbhaganyi anye hini na ajjanyi lɔga gɛnyɛ kolea bere sennanɛa :nɛa na kàmadhɛsɛ zugo.

4 Na ngadadabta kɔgɔdhdhaginy inye, Tito, hira hɛtto ko eriya nanu ku dhere bere yɛbhi kamannaa Yesusi hunde nayoye.

Any kichirbhisieny :Babaa na Tumu ko :Hira Ibbayseiy agge Yesus Kirisosi ^{▼▼Tuga Giriki se “...Kirisos Yesusi...”} na kainy zany na bhak ba shɛɛ.

5 Huna bere kɔdhɔttinyi Keritɔ, annaa kajjinyi lɔgɔ na keni dheya lɔga bere dhɔynɛna na kɛtɛldi dib. Na bɛra zugo bhɛa zuga yɛbhbhɛa kamannaa Yesusi oree oree na kete zuga bibiyo lɔmmɛa zuga yɛbhbhɛa Yesus. 6 Nɔng hira bo lɔmma zuga yɛbhbhɛa Yesus, maya a hira messo lɔga ku dhere na gayɛa :zugu kumulɔng. Na maya lɔ tɛri dhɔnɛ na erroa gɛnyɛ agga yɛbhbhɛa kamannaa Yesusi na hudhak hudhak ngamessɛayo na ngairrannɛayo. 7 Na gulsaa bo allinɛnɛa zuga yɛbhbhɛa Yesus nɔng maya anna ngadhunggurroo na hini chinyi ngaannao na ngadhutiyoo, na ko zugo ngadhaginɛnao, na birinya ngayelloo. Na maya anna messo lɔga ku dhere gayɛa :zugu kumulɔng ke ngaya nɔng bere ibhɛsɛn :Tumu hini na mesɛ zinggoa bere ajjɛa :Tumuye. 8 Yɔk lɔkte maya me :nɛaye a ɛnɛnggeo, maya a hira lammana zugo na hinno lɔga challa na tɛlla lɔgɔ na bhɛkka rɛa nɛnɛ shɛɛ na ridhing ningginɛna na kedhdho lɔgɔ dib. 9 Na sɛgɛn maya kɔbh kamannaa Yesusi kìbhɛsɛna hinisi goore damiya bere kàmadhɛsɛna sabbɔ. Na aynde ale madhɛsɛn zugo na iriy na ko yɔk gaɛ hologun shɛɛye. Na ko yɔk gee dhaginɛ ko hinisi na marrɛye ale madhɛsɛn haalɛ na dhugunɛsɛn hologun dib.

10 Yɔk zuga irrannɛa na marrɛa ngalɔkta na itabhbhɛa zugo na woɛa lɔgɔ gɔrɔ a mɛri. Yɔk ngazuktonu messɛ ngangaye dhogoy gena a ngazukta madhɛsɛnɛ zuga yɛbhbhɛa kamannaa Yesusi lɔga kègedhdhɛa rɛhiya mayaye rɛ. 11 Na maya kòyogɛsɛn na tugiya gɛ kabhbhɛyɔ ke ngaya madhɛsɛnɛ zugo lɔga ku butomo na gena dhɔyɛ kamannaa Yesusi ko zuga doriyoa gɛye. Yɔk bhee madhɛ zugo ngalɔkta gɛrɛse, a ngaya se kɔjɔyay birinya hungge. 12 Chɔɔ hira Keriti barara kona annaa bere senno, “Kali kali zuga Keriti a butoga ko guchurɛna ko ghormɛna gɛrsa ku gɔngga.” 13 Yɔk ngalɔkta bere yok :hiriyɔye dha bere a dhere. Na mɛa madhɛsɛ goore na kɔdhɔyɔ ngalɔktonu na kɛyɛbhɛ kamannaa Yesusi shɛɛ na kiriytɛ na kete dhandali. 14 Na butomoa zuga Ayhudhi dhagɛa kali ko lɔga zuga marrɛa kamannaa ku dhere ngachirarrɛ. 15 Zuga ridhing ningginɛna yɔk ɛl hurr. Ahite ɛngɛrsɛ ninggɛ. Na yɔk ga ku kuhuyaga kamannaa Yesusi ngayɛbhbhɛayo bhɛa nɛ ahite i hurr ninggɛ. Ɛsɛdhdhɛ kuhuyamo hinisichinne kali kali na bhɛa gayɛa lɔga gɛrsa ko ga challa dib ninggɛ. 16 Na yɔk yokkonɛ lɔgɔ tok na sennɛ, “Tumu kaggaoyɔ.” Na nɔng hunde kùguny lɔga messɛaye, yɔk dhaa imaggɛyɔ. Na lɔga gɛ a kuhu sɔng na lɔga Tumu ngabhɛkkɛo dhul. Na chɔɔ bhee messɛ lɔga challa ninggɛ dhul.