Tit 2 | SuqSC | STEP | Na nɔng inye maya madhɛsɛn zugo lɔga gannɛna ko kamannaa Yesusi ku dhere.

Titus 2

Lɔga Maya Kàmadhɛsɛna Zug Gena

1 Na nɔng inye maya madhɛsɛn zugo lɔga gannɛna ko kamannaa Yesusi ku dhere. 2 Na madhɛsɛ zuga ku karu lɔgɔ na koytɛsɛ rɛhi hirimo na kete ga bhɛkkɛa rɛhiya gɛ na lɔmmɛa diram bhɛa zugony. Na maya mɛdhdhanɛ na yɛbhbhɛ kamannaa Yesusi na ibhɛsɛnɛ zugo hinisi na nyimmɛ lɔgɔ goore na a dhandali.

3 Na ko yɔk tɛrroa ku karbaynya madhɛsɛ na siwona dhuttiny ngalɔmmɛ na zugo ngakedhdhɛ na kɛbhɛgɛ lɔga Tumu shɛɛ na kamadha zugo lɔga challa. 4 Na aynde ale hɛ na madhɛsɛnɛ tɛrroa ngani chicho bhɛa yelɛa zuga gɛ ko erroa gɛ 5 ko bhɛa bhɛgɛa rɛhi na ɛlɛa hurr na mesɛa zinggo doriyoa gɛ na anɛa zuga hinisi challa na igomɛsɛnɛa zuga gɛye. Na ngatɛrroya ngani chichiye hunde mesigi ngangaye, aynde ale orrɛ :zugu na lɔga Tumu ke gɛrsi ngaojjɛoye.

6 Na ko yɔk bara madhɛsɛ na kɛbhɛgɛ rɛhiya gɛ. 7 Na ko inye me lɔga challa kali kali na dhɔlɛsɛ yɔk gɔrɔ. Na hunde madhɛsɛn lɔgɔye, madhɛsɛ dib, na kɔbhɛsɛ shɛɛ, 8 na dhugunɛsɛ hologuna ku dhere na hunde shikkɛye ko hinisi ngadhaginɛ. Na aynde ale zuga marriyɛa agge ammɛ :liya na bhee yokkonɛ lɔkte gɛrsi ninggɛye.

9 Na ko yɔk gaymanyaa yɛbhbhɛa Yesus madhɛsɛ na sɛɛ kigombɛsɛ gulsachina gɛ na tugi ngayagɛsɛnɛ na kemesigi lɔkte ajjɛ :gulsachinnuye kumulɔng shɛɛ na gulsachina gɛ hinisi kete hɔli. 10 Na ahaa gulsachina gɛ ngaogorrɛ na kete ga ibhɛsɛnɛa :gulsachina gɛ hinisi. Na hunde messɛ ngangaye, zugo ale orrɛ lɔga messɛa :yɔkku kumulɔng na hinnɛ lɔga Komoruya na Tumu bere ibbayseiy agge. 11 Nɔng Tumu annaa bere dhugunɛsɛa zugo kumulɔng bhɛa chirbhisiyɛa na senno kibbaysɛɛ. 12 Na ngalɔkta kìchirbhisiyɛiyte, madhdhagiyɛ bhɛa kàmarɛa lɔga gɛrsa ko ga kìchirkanna ɛlla bay ngaya marra :Tumu. Na lammaniyɛ na kɛ̀bhɛgɛ rɛhi na kɛ̀tɛldi hurr. Na hunde ngani kàbhak baye, kèmesigi lɔga hinno :Tumu sɔng. 13 Na ko bhee ale wokkonɛ :Komoruya ^{▼▼Tuga Giriki se “Tumua na.”} na bo tuhinɛna lɔmma diram bere ibbayseiy kènno Yesus Kirisos, agge maya kɛ̀l kɔk na kère nɔng. 14 Nɔng anna bere rɛsɛiy agge na kibbayseiy lɔga gɛrsa kumulɔng na kète zuga gɛnyɛ ridhing ningginɛna na hinisiya ga kɔshɔya na kèmesigi lɔga challa hinno :nɛa. 15 Yɔk ngagiya a lɔkte maya madhɛsɛn zugo na iriyɛ na ibbayɛ gee ɛddɛɛye. Na kona ngakɛinyi ke ngaya inye lɔmɛ buyn bhɛa ngalɔktaye.