‏ Job 22

Elifazi Anasema: Uovu Wa Ayubu Ni Mkubwa

1 ^aNdipo Elifazi Mtemani akajibu:

2 ^b“Je, mwanadamu aweza kuwa wa faida kwa Mungu?
Je, hata mtu mwenye hekima aweza kumfaidi?
3 ^cJe, Mwenyezi angefurahia nini
kama ungekuwa mwadilifu?
Au je, yeye angepata faida gani
kama njia zako zingekuwa kamilifu?

4 ^d“Je, ni kwa ajili ya utaua wako ndiyo maana anakukemea
na kuleta mashtaka dhidi yako?
5 ^eJe, uovu wako si mkuu?
Dhambi zako si hazina mwisho?
6 ^fUmedai dhamana kwa ndugu zako bila sababu;
umewavua watu nguo zao, ukawaacha uchi.
7 ^gHukumpa maji aliyechoka,
nawe ulimnyima chakula mwenye njaa,
8 ^hingawa ulikuwa mtu mwenye uwezo ukimiliki nchi:
mtu uliyeheshimiwa, ukiishi ndani yake.
9 ⁱUmewafukuza wajane mikono mitupu
na kuzivunja nguvu za yatima.
10 ^jNdiyo sababu mitego imekuzunguka pande zote,
hatari ya ghafula inakutia hofu,
11 ^kndiyo sababu ni giza sana huwezi kuona,
tena ndiyo sababu mafuriko ya maji yamekufunika.

12 ^l“Je, Mungu hayuko katika mbingu za juu?
Juu kuliko nyota zilizo juu sana!
13 ^mHivyo wewe wasema, ‘Mungu anajua nini?’
Je, yeye huhukumu katika giza kama hilo?
14 ⁿMawingu mazito ni pazia lake, hivyo hatuoni sisi
atembeapo juu ya anga la dunia.
15 ^oJe, utaifuata njia ya zamani,
ambayo watu waovu waliikanyaga?
16 ^pWaliondolewa kabla ya wakati wao,
misingi yao ikachukuliwa na mafuriko.
17 ^qWalimwambia Mungu, ‘Tuache sisi!
Huyo Mwenyezi aweza kutufanyia nini?’
18 ^rLakini ndiye alizijaza nyumba zao na vitu vizuri,
hivyo ninajitenga mbali na mashauri ya waovu.

19 ^s“Wenye haki wanaona maangamizi yao na kufurahi,
nao wasio na hatia huwadhihaki, wakisema,
20 ^t‘Hakika adui zetu wameangamizwa,
nao moto umeteketeza mali zao.’

21 ^u“Mjue sana Mungu ili uwe na amani,
ndipo mema yatakapokujia.
22 ^vUyapokee mafundisho toka kinywani mwake,
na maneno yake uyaweke moyoni mwako.
23 ^wKama ukimrudia Mwenyezi, utarudishwa upya:
Kama ukiuondoa uovu uwe mbali na hema lako,
24 ^xkama dhahabu yako ukiihesabu kama mavumbi,
dhahabu yako ya Ofiri kama miamba ya mabondeni,
25 ^yndipo Mwenyezi atakuwa dhahabu yako,
naye atakuwa fedha yako iliyo bora.
26 ^zHakika ndipo utakapojifurahisha kwa Mwenyezi,
nawe utamwinulia Mungu uso wako.
27 ^aaUtamwomba yeye, naye atakusikia,
nawe utazitimiza nadhiri zako.
28 ^abUtakusudia jambo nalo litatendeka,
nao mwanga utaangazia njia zako.
29 ^acWatu watakaposhushwa, nawe ukasema, ‘Wainue!’
ndipo atamwokoa aliyevunjika moyo.
30 ^adAtamwokoa hata yule ambaye ana hatia,
ataokolewa kwa sababu ya usafi wa mikono yako.”