‏ Job 23

Hotuba Ya Nane Ya Ayubu

Ayubu Anajibu: Kulalamika Kwangu Ni Uchungu

1Ndipo Ayubu akajibu:

2 ^a“Hata leo malalamiko yangu ni chungu;
mkono wake ni mzito juu yangu hata nikiugua.
3 ^bLaiti ningefahamu mahali pa kumwona;
laiti ningeweza kwenda mahali akaapo!
4 ^cNingeliweka shauri langu mbele zake,
na kukijaza kinywa changu na hoja.
5Ningejua kwamba angenijibu nini,
na kuelewa lile ambalo angelisema.
6 ^dJe, angenipinga kwa nguvu nyingi?
La, asingenigandamiza.
7 ^eHapo mtu mwadilifu angeweka shauri lake mbele zake,
nami ningeokolewa milele na mhukumu wangu.

8“Lakini nikienda mashariki, hayupo;
nikienda magharibi, simpati.
9 ^fAnapokuwa kazini pande za kaskazini, simwoni;
akigeukia kusini, nako simwoni hata kidogo.
10 ^gLakini anaijua njia niiendeayo;
akiisha kunijaribu, nitatoka kama dhahabu.
11 ^hNyayo zangu zimefuata hatua zake kwa karibu;
nimeishika njia yake bila kukengeuka.
12 ⁱSijaziacha amri zilizotoka midomoni mwake;
nimeyathamini maneno ya kinywa chake kuliko chakula changu cha kila siku.

13 ^j“Lakini yeye husimama peke yake; ni nani awezaye kumpinga?
Yeye hufanya lolote atakalo.
14 ^kHutimiliza maagizo yake dhidi yangu,
na bado anayo mipango mingi kama hiyo ambayo ameiweka akiba.
15 ^lHiyo ndiyo sababu ninaingiwa na hofu mbele zake;
nifikiriapo haya yote ninamwogopa.
16 ^{m n}Mungu ameufanya moyo wangu kuzimia;
yeye Mwenyezi amenitia hofu.
17 ^oHata hivyo sijanyamazishwa na giza,
wala kwa giza nene linalofunika uso wangu.