‏ Psalms 107

KITABU CHA TANO

(Zaburi 107–150)

Kumsifu Mungu Kwa Wema Wake

1 ^aMshukuruni Bwana, kwa kuwa yeye ni mwema,
upendo wake wadumu milele.
2 ^bWaliokombolewa wa Bwana na waseme hivi,
wale aliowaokoa kutoka mkono wa adui,
3 ^cwale aliowakusanya kutoka nchi mbalimbali,
kutoka mashariki na magharibi,
kutoka kaskazini na kusini.

4 ^dBaadhi yao walitangatanga jangwani,
hawakuona njia ya kuwafikisha mji ambao wangeweza kuishi.
5 ^eWalikuwa na njaa na kiu,
nafsi zao zikadhoofika.
6 ^fNdipo walipomlilia Bwana katika shida yao,
naye akawaokoa kutoka taabu yao.
7 ^gAkawaongoza kwa njia iliyo sawa
hadi mji ambao wangeweza kuishi.
8 ^hBasi na wamshukuru Bwana kwa upendo wake usiokoma,
na kwa matendo yake ya ajabu kwa wanadamu,
9 ⁱkwa maana yeye humtosheleza mwenye kiu,
na kumshibisha mwenye njaa kwa vitu vyema.

10 ^jWengine walikaa gizani na katika huzuni kuu,
wafungwa wakiteseka katika minyororo,
11 ^kkwa sababu walikuwa wameasi
dhidi ya maneno ya Mungu
na kudharau shauri
la Aliye Juu Sana.
12 ^lAliwatumikisha kwa kazi ngumu;
walijikwaa na hapakuwepo yeyote wa kuwasaidia.
13 ^mNdipo walipomlilia Bwana katika shida yao,
naye akawaokoa kutoka taabu yao.
14 ⁿAkawatoa katika giza na huzuni kuu
na akavunja minyororo yao.
15 ^oBasi na wamshukuru Bwana kwa upendo wake usiokoma,
na kwa matendo yake ya ajabu kwa wanadamu,
16 ^pkwa kuwa yeye huvunja malango ya shaba
na kukata mapingo ya chuma.

17 ^qWengine wakawa wapumbavu kutokana na uasi wao,
wakapata mateso kwa sababu ya uovu wao.
18 ^rWakachukia kabisa vyakula vyote,
wakakaribia malango ya mauti.
19 ^sNdipo walipomlilia Bwana katika shida yao,
naye akawaokoa kutoka taabu yao.
20 ^tAkalituma neno lake na kuwaponya,
akawaokoa kutoka maangamizo yao.
21 ^uBasi na wamshukuru Bwana kwa upendo wake usiokoma,
na kwa matendo yake ya ajabu kwa wanadamu.
22 ^vNa watoe dhabihu za kushukuru,
na wasimulie matendo yake kwa nyimbo za furaha.

23 ^wWengine walisafiri baharini kwa meli,
walikuwa wafanyabiashara kwenye maji makuu.
24 ^xWaliziona kazi za Bwana,
matendo yake ya ajabu kilindini.
25 ^yKwa maana alisema na kuamsha tufani
iliyoinua mawimbi juu.
26 ^zYakainuka juu mbinguni, yakashuka chini hadi vilindini,
katika hatari hii ujasiri wao uliyeyuka.
27 ^aaWalipepesuka na kuyumbayumba kama walevi,
ujanja wao ukafikia ukomo.
28 ^abNdipo walipomlilia Bwana katika shida yao,
naye akawatoa kwenye taabu yao.
29 ^acAkatuliza dhoruba kwa mnongʼono,
mawimbi ya bahari yakatulia.
30 ^adWalifurahi ilipokuwa shwari,
naye akawaongoza hadi bandari waliyoitamani.
31 ^aeBasi na wamshukuru Bwana kwa upendo wake usiokoma,
na kwa matendo yake ya ajabu kwa wanadamu.
32 ^afNa wamtukuze yeye katika kusanyiko la watu,
na wamsifu katika baraza la wazee.

33 ^agYeye aligeuza mito kuwa jangwa,
chemchemi za maji zitiririkazo kuwa ardhi yenye kiu,
34 ^ahnchi izaayo ikawa ya chumvi isiyofaa,
kwa sababu ya uovu wa wale walioishi humo.
35 ^aiAligeuza jangwa likawa madimbwi ya maji,
nayo ardhi kame kuwa chemchemi za maji zitiririkazo;
36 ^ajaliwaleta wenye njaa wakaishi humo,
nao wakajenga mji wangeweza kuishi.
37 ^akWalilima mashamba na kupanda mizabibu,
nayo ikazaa matunda mengi,
38 ^alMungu aliwabariki, hesabu yao ikaongezeka sana,
wala hakuruhusu mifugo yao kupungua.

39 ^amKisha hesabu yao ilipungua, na walinyenyekeshwa
kwa kuonewa, maafa na huzuni.
40 ^anYeye ambaye huwamwagia dharau wakuu,
aliwafanya watangetange nyikani isiyo na njia.
41 ^aoLakini yeye aliwainua wahitaji katika taabu zao,
na kuongeza jamaa zao kama makundi ya kondoo.
42 ^apWanyofu wataona na kufurahi,
lakini waovu wote watafunga vinywa vyao.

43 ^aqYeyote aliye na hekima, ayasikie mambo haya,
na atafakari upendo mkuu wa Bwana.