‏ Psalms 71

Kuomba Ulinzi Na Msaada Siku Zote Za Maisha

1 ^aEe Bwana, nimekukimbilia wewe,
usiache nikaaibika kamwe.
2 ^{b c}Kwa haki yako uniponye na kuniokoa,
unitegee sikio lako uniokoe.
3 ^dUwe kwangu mwamba wa kimbilio,
mahali nitakapokimbilia kila wakati;
toa amri ya kuniokoa, kwa kuwa wewe
ni mwamba wangu na ngome yangu.
4 ^eEe Mungu wangu uniokoe kutoka kwenye mkono wa mwovu,
kutoka kwenye makucha ya watu wabaya na wakatili.

5 ^fKwa kuwa umekuwa tumaini langu, Ee Bwana Mwenyezi,
tegemeo langu tangu ujana wangu.
6 ^gTangu kuzaliwa nimekutegemea wewe,
ulinitoa tumboni mwa mama yangu.
Nitakusifu wewe daima.
7 ^hNimekuwa kama kioja kwa wengi,
lakini wewe ni kimbilio langu imara.
8 ⁱKinywa changu kimejazwa sifa zako,
nikitangaza utukufu wako mchana kutwa.

9 ^jUsinitupe wakati wa uzee,
wala usiniache nguvu zangu zinapopungua.
10 ^kKwa maana adui zangu wananisengenya,
wale wanaonivizia kuniua wafanya hila.
11 ^lWanasema, “Mungu amemwacha,
mkimbilieni mkamkamate,
kwani hakuna wa kumwokoa.”
12 ^mEe Mungu, usiwe mbali nami,
njoo haraka kunisaidia, Ee Mungu wangu.
13 ⁿWashtaki wangu na waangamie kwa aibu,
wale wanaotaka kunidhuru
na wafunikwe kwa dharau na fedheha.

14 ^oLakini mimi, nitatumaini siku zote,
nitakusifu zaidi na zaidi.
15 ^pKinywa changu kitasimulia haki yako,
wokovu wako mchana kutwa,
ingawa sifahamu kipimo chake.
16 ^qEe Bwana Mwenyezi, nitakuja
na kutangaza matendo yako makuu,
nitatangaza haki yako, yako peke yako.
17 ^rEe Mungu, umenifundisha tangu ujana wangu,
hadi leo ninatangaza matendo yako ya ajabu.
18 ^sEe Mungu, usiniache,
hata niwapo mzee wa mvi,
mpaka nitangaze uwezo wako kwa kizazi kijacho,
nguvu zako kwa wote watakaokuja baadaye.

19 ^tEe Mungu, haki yako imefika juu katika mbingu,
wewe ambaye umefanya mambo makuu.
Ee Mungu, ni nani aliye kama wewe?
20 ^uIngawa umenifanya nipate taabu, nyingi na chungu,
utanihuisha tena,
kutoka vilindi vya dunia
utaniinua tena.
21 ^vUtaongeza heshima yangu
na kunifariji tena.

22 ^wEe Mungu wangu, nitakusifu kwa kinubi
kwa ajili ya uaminifu wako;
Ee Uliye Mtakatifu wa Israeli,
nitakuimbia sifa kwa zeze.
23 ^xMidomo yangu itapaza sauti kwa furaha
ninapokuimbia sifa,
mimi, ambaye umenikomboa.
24 ^yUlimi wangu utasimulia matendo yako ya haki
mchana kutwa,
kwa maana wale waliotaka kunidhuru,
wameaibishwa na kufadhaishwa.