‏ Proverbs 4

Hekima Ni Bora Kupita Vitu Vyote

1 ^aSikilizeni wanangu, mafundisho ya baba yenu;
sikilizeni kwa makini na mpate ufahamu.
2Ninawapa mafundisho ya maana,
kwa hiyo msiyaache mafundisho yangu.
3 ^bNilipokuwa mvulana mdogo katika nyumba ya baba yangu,
ningali mchanga na mtoto pekee kwa mama yangu,
4 ^cbaba alinifundisha akisema,
“Yashike maneno yangu yote kwa moyo wako wote;
yashike maagizo yangu na wewe utaishi.
5 ^dPata hekima, pata ufahamu;
usiyasahau maneno yangu wala usiyaache.
6 ^eUsimwache hekima naye atakuweka salama;
mpende, naye atakulinda.
7 ^fHekima ni bora kuliko vitu vyote; kwa hiyo jipe hekima.
Hata ikikugharimu vyote ulivyo navyo, pata ufahamu.
8 ^gMstahi, naye atakukweza;
mkumbatie, naye atakuheshimu.
9 ^hAtakuvika shada la neema kichwani mwako
na kukupa taji ya utukufu.”

10 ⁱSikiliza mwanangu, kubali ninachokuambia,
nayo miaka ya maisha yako itakuwa mingi.
11 ^jNinakuongoza katika njia ya hekima
na kukuongoza katika mapito yaliyonyooka.
12 ^kUtembeapo, hatua zako hazitazuiliwa;
ukimbiapo, hutajikwaa.
13 ^lMkamate sana elimu, usimwache aende zake;
mshike, maana yeye ni uzima wako.
14 ^mUsiuweke mguu wako katika njia ya waovu
wala usitembee katika njia ya watu wabaya.
15Epukana nayo, usisafiri katika njia hiyo;
achana nayo, na uelekee njia yako.
16 ⁿKwa kuwa hawawezi kulala mpaka watende uovu;
wanashindwa hata kusinzia mpaka wamwangushe mtu.
17 ^oWanakula mkate wa uovu,
na kunywa mvinyo wa jeuri.

18 ^pNjia ya wenye haki ni kama nuru ya kwanza ya mapambazuko,
ambayo hungʼaa zaidi na zaidi mpaka mchana mkamilifu.
19 ^qLakini njia ya waovu ni kama giza nene;
hawajui kinachowafanya wajikwae.

20 ^rMwanangu, yasikilize kwa makini yale ninayokuambia;
sikiliza kwa makini maneno yangu.
21 ^sUsiruhusu yaondoke machoni pako,
yahifadhi ndani ya moyo wako;
22 ^tkwa sababu ni uzima kwa wale wanaoyapata
na afya kwa mwili wote wa mwanadamu.
23 ^uZaidi ya yote, linda moyo wako, kuliko yote uyalindayo,
maana ndiko zitokako chemchemi za uzima.
24Epusha kinywa chako na ukaidi;
weka mazungumzo machafu mbali na midomo yako.
25 ^vMacho yako na yatazame mbele,
kaza macho yako moja kwa moja mbele yako.
26 ^wSawazisha mapito ya miguu yako
na njia zako zote ziwe zimethibitika.
27 ^xUsigeuke kulia wala kushoto;
epusha mguu wako na ubaya.