‏ Psalms 109

Lalamiko La Mtu Aliyeko Kwenye Shida

Kwa mwimbishaji. Zaburi ya Daudi.

1 ^aEe Mungu, ambaye ninakusifu,
usiwe kimya,
2 ^bkwa maana watu waovu na wadanganyifu
wamefungua vinywa vyao dhidi yangu;
wasema dhidi yangu
kwa ndimi za udanganyifu.
3 ^cWamenizunguka kwa maneno ya chuki,
wananishambulia bila sababu.
4 ^dWanachonilipa badala ya urafiki wangu ni kunishtaki,
lakini mimi ninawaombea.
5 ^eWananilipiza mabaya kwa mema,
chuki badala ya urafiki wangu.

6 ^fAgiza mtu mwovu ampinge,
mshtaki ▼

▼Mshtaki hapa maana yake ni Shetani.

asimame mkono wake wa kuume.
7 ^hAnapohukumiwa, apatikane na hatia,
nayo maombi yake yamhukumu.
8 ⁱSiku zake za kuishi na ziwe chache,
nafasi yake ya uongozi ichukuliwe na mtu mwingine.
9 ^jWatoto wake na waachwe yatima,
mke wake na awe mjane.
10 ^kWatoto wake na watangetange wakiomba,
na wafukuzwe kwenye magofu ya nyumba zao.
11 ^lMtu anayemdai na ateke vyote alivyo navyo,
matunda ya kazi yake yatekwe nyara na wageni.
12 ^mAsiwepo mtu yeyote wa kumtendea mema
wala wa kuwahurumia yatima wake.
13 ⁿUzao wake na ukatiliwe mbali,
majina yao yafutike katika kizazi kifuatacho.
14 ^oMaovu ya baba zake na yakumbukwe
mbele za Bwana,
dhambi ya mama yake
isifutwe kamwe.
15 ^pDhambi zao na zibaki daima mbele za Bwana,
ili apate kukatilia mbali kumbukumbu lao duniani.

16 ^qKwa maana kamwe hakuweza kutenda wema,
bali alimfukuza mnyonge na mhitaji,
aliwafanyia jeuri wahitaji na waliovunjika moyo.
17 ^rAlipenda kulaani,
nayo laana ikampata;
hakupenda kubariki,
kwa hiyo baraka na ikae mbali naye.
18 ^sAlivaa kulaani kama vazi lake,
nayo laana ikamwingia mwilini mwake kama maji,
kwenye mifupa yake kama mafuta.
19 ^tNa iwe kama joho alilozungushiwa,
kama mshipi aliofungiwa daima.
20 ^uHaya na yawe malipo ya Bwana kwa washtaki wangu,
kwa wale wanaoninenea mabaya.

21 ^vLakini wewe, Ee Bwana Mwenyezi,
unitendee wema kwa ajili ya jina lako,
uniokoe kwa wema wa pendo lako.
22Maana mimi ni maskini na mhitaji,
moyo wangu umejeruhiwa ndani yangu.
23 ^wNinafifia kama kivuli cha jioni,
nimerushwa-rushwa kama nzige.
24 ^xMagoti yangu yamelegea kwa kufunga,
mwili wangu umedhoofika na kukonda.
25 ^yNimekuwa kitu cha kudharauliwa kwa washtaki wangu,
wanionapo, hutikisa vichwa vyao.

26 ^zEe Bwana, Mungu wangu nisaidie,
niokoe sawasawa na upendo wako.
27 ^aaWatu na wafahamu kuwa ni mkono wako,
kwamba wewe, Ee Bwana, umetenda hili.
28 ^abWanaweza kulaani, lakini wewe utabariki,
watakaposhambulia wataaibishwa,
lakini mtumishi wako atashangilia.
29 ^acWashtaki wangu watavikwa fedheha,
na kufunikwa na aibu kama joho.

30 ^adKwa kinywa changu nitamtukuza sana Bwana,
katika umati mkubwa nitamsifu.
31 ^aeKwa maana husimama mkono wa kuume wa mhitaji,
kuokoa maisha yake kutoka kwa wale wanaomhukumu.