‏ Psalms 81

Wimbo Wa Sikukuu

Kwa mwimbishaji. Mtindo wa gitithi. Zaburi ya Asafu.

1 ^aMwimbieni kwa furaha, Mungu aliye nguvu yetu;
mpigieni kelele za shangwe Mungu wa Yakobo!
2 ^bAnzeni wimbo, pigeni matari,
pigeni kinubi na zeze kwa sauti nzuri.

3 ^cPigeni baragumu za pembe za kondoo dume
wakati wa Mwandamo wa Mwezi,
na wakati wa mwezi mpevu,
katika siku ya Sikukuu yetu;
4 ^dhii ni amri kwa Israeli,
agizo la Mungu wa Yakobo.
5 ^eAliiweka iwe kama sheria kwa Yosefu
alipotoka dhidi ya Misri,
huko tulikosikia lugha ambayo hatukuielewa.

6 ^fAsema, “Nimeondoa mzigo mabegani mwao;
mikono yao iliwekwa huru kutoka kwenye kikapu.
7 ^gKatika shida yako uliniita nami nikakuokoa,
nilikujibu katika mawingu yenye ngurumo;
nilikujaribu katika maji ya Meriba.

8 ^h“Enyi watu wangu, sikieni, nami nitawaonya:
laiti kama mngenisikiliza, ee Israeli!
9 ⁱHamtakuwa na mungu mgeni miongoni mwenu;
msimsujudie mungu wa kigeni.
10 ^jMimi ni Bwana Mungu wako,
niliyekutoa nchi ya Misri.
Panua sana kinywa chako
nami nitakijaza.

11 ^k“Lakini watu wangu hawakutaka kunisikiliza;
Israeli hakutaka kunitii.
12 ^lBasi niliwaacha katika ukaidi wa mioyo yao
wafuate mashauri yao wenyewe.

13 ^m“Laiti kama watu wangu wangalinisikiliza,
kama Israeli wangalifuata njia zangu,
14 ⁿningaliwatiisha adui zao kwa haraka,
na kuugeuza mkono wangu dhidi ya watesi wao!
15 ^oWale wanaomchukia Bwana wangalinyenyekea mbele zake,
na adhabu yao ingedumu milele.
16 ^pBali ninyi mngalilishwa ngano iliyo bora,
na kuwatosheleza kwa asali itokayo kwenye mwamba.”