Luk 10 | SwjSC | STEP | Gigumbi ne guvyoge, Fumu akusale megumi mane gumereru me batu be nzusu. Akubetinde bebeyi ne bebeyi ve wuse andi mu yadi tsyotsu ne mbure tsi yandi beni pikilange gwende.

Luke 10

Gidyanzu gi megumi mane gumereru me bebingitsi be Yesu.

1 Gigumbi ne guvyoge, Fumu akusale megumi mane gumereru me batu be nzusu. Akubetinde bebeyi ne bebeyi ve wuse andi mu yadi tsyotsu ne mbure tsi yandi beni pikilange gwende. 2 Negwambile re: «Gibuge gi gineni gyabure mbili pinde tumbe gusa mbili batu begutsibuke. Lembanu fumu gibuge atindi bedyanzitsi beguse buke pinde.» Reguvage re gu batu be ne mugangu gulu musamu ami, tumbe gusandi mbili batu begumunenze. 3 Yendanu, nubandekene nyanutindi gere bane be medombi ve gari batu be munongu mosi ne minzi. 4 Nuyabege nesi doli, nesi pengi, nesi pondu tsinzusu. Nuyatsyemuse gigumbi mu nzile neguvege batu mbulu. 5 Pasi nwagwingeni gu ndagu, nuku re gwambile re: «Pembi ne polu yi Nyambi yibi nenu.» 6 Gu gari ndagu yine, gere gu mutu wu kindi kindi, dubonzu du Nyambi dugusale nandi. Gere sanane, dubonzu dwakundigabuge nenu. 7 Tsagenanu gu ndagu yine, yanganu, nwanganu byotsu bibe gunuvege, mbare mubingitsi agavegu doli tsi yandi se dyanze. Nuyabe tsatsake, tsagenanu gu ndagu yi nusesundile. 8 Ve nugwingenine gu yadi, gere betsige besenusinge, yanganu byotsu binuguvegu. 9 Belusanu bibedu bi yadi yine bambilyanu re: «Bulongu bu Nyambi bwabambeme nenu.» 10 Tumbe ve nugwingenine gu yadi yi batu besanurondi, yendanu mu mimbambe, bambilyanu re: 11 «Dwa nukukumuni difufundu di yadi yenu disename mu byeru byetu, gununweritse. Yabanu re, bulongu bu Nyambi bwabambeme nenu.» 12 Nyanwambili, wisi wu Nyambi gusetabulile bumbanze bu batu be yadi yiyi, begube ne mbele vyagenu ne batu be Sodome. 13 Milogu gu batu ba tsageni gu yadi Korazin. Milogu gwandi gu yenu batu ba tsageni gu Betsaida. Mbere bimage bivagu ve gari enu, bivagilu gu Tyr ne gu Sidon batu be yadi tsina mbere bedware dikwili, mbere besanze mbetsi mutsageninu. 14 Re dibandu wisi Nyambi agutabulile bumbanze, mbele yi Tire ne Sidon yisagube yineni vyagenu ne yenu. 15 A ndyayu Kapernawume wapikili re Nyambi agukugobise vyagenu ne bembatsi? Nesi ndyayu wugusunde kwange negu batu bafu. 16 Yesu nekunde gwambile bebingitsi bandi re: «Wotsu wanulilu aganyulilu. Wotsu wabusi gunulilu agabusi nyulilu gwandi. Wotsu wambusi agabusi wusetume.»

Kabugu yi megumi mane gumereru me batu be Yesu rume

17 Megumi mane gumereru me batu be yesu rume begabuge ne mune mugangu, negusemwambile re: «Fumu, nesi menyuni mabi mesedugobise gukyelu dine dyagu.» 18 Yesu negubambile re: «Nzelabange Sate agabondugi gu yulu gere dusyemu.» 19 Yulwanu, nzenuvege dinyange digunige nyoge, kuru ne ndure yotsu yi Sate, gusagube givave gi gunuvage nzuki. 20 Tumbe, nuyabe ne mugangu mba menyuni mabi manudedugili, yibanu ne mugangu mbare Nyambi amarende mine menu gu yulu mu gisangumu gi monyu. 21 Gigumbi gine, Yesu negubase ne mugangu wu dinyuni diboti, negwambile re: «Taye, Fumu yulu neyi butambe, nyakudumisi mbare wuseswege binami mambu mane. Tumbe wameyabise batu be munongu mosi ne bane begegi. Diboti tayi nyakudumisi mbare wuseronde re dibili nane.» 22 Tayi ami asepege bivave byotsu. Gusa mutu wayabi Mwane vengu ka Taye, gusa mutu gwandi wayabi Tayi ka Mwane. Ne batu be Mwane agarondi re beyabi Tayi. 23 Negugeluge gu bebingitsi bandi, negubambile kayawu vike re: «Diboti yenu nwalabi mambu mane. 24 Ne gungenze, nyanwabili, mbili bebigitsi ne kanangu be ronde labe me nwalabi tumbe besemene. Gulu me nwagulu tumbe besemulu.»

Gilombi gi mutu boti wu Samari

25 Givunde gi migage mi Moyise negurambuge, ayise gwambile Yesu gumumange murime: «Mulonzi, a Nyambi agarondi re niva tye nikudenge monyu yi peke ne peke?» 26 Yesu negumwambile re: «Agye girendu mu mugage Moyise? Wamulilu tsye?» 27 Negumwagule re: «Direndu re ronde Fumu Nyambi agu ne murime agu wotsu, ne dinyuni dyagu dyotsu, ne ngudu tsyagu tsyotsu, ne pikile tsyagu tsyotsu. Ronde mbatsi agu nevu wakwerondili.» 28 Yesu negumwagule re: «Wusegwagule dikengi, vagange ka nane gigumbi gyotsu nonge wukube mbure mosi ne Nyambi mwendu ne mwendu.» 29 Tumbe yandi guguronde kweswege, akwivule Yesu re: «A mbatsi ami yiniguronde nye?» 30 Yesu negumwagule re: «Gube wisi mutu wurambugile gu Serusaleme ayendange gu Seriko. Abengune ne bikongu, bemudumbe byotsu bibe nandi, bemudimbe beli gufu, benegwende.» 31 Mu nzile yine ya mosi muvegitsi pagu wuvyogilange vane. Negulabe mutu wu bikongu be dimbe amugonge. 32 Mwisi gifumbe gi Levi wuvyogilange gwandi vane, negulabe mutu wu bikongu bedimbe amugonge. 33 Tumbe mwisi Samari neguvuduge ve mutu wune wudimbu ne bikongu, negumulu ngebe. 34 Abambeme nandi, amubuge ne matsi ne melamu. Amunangule amusunze ve yulu gibulu gi yandi ayendilange amubege bekwende gu ndagu tsi beni akubugungu. 35 Mbongwali, mwisi Samari avuduse fure beyi a tsi sambule mutu wudenge ndagu beni negumwambile re: «Tarili gibedu gine pasi doli tsisa dugu niguse gundige ve ni gugabugile.» 36 Yesu negwivule mutu wune: «Batu bane ba reru anye yibe mbatsi yi mutu wu dimbu ne bikongu?» 37 Ayagule re: «Mutu wusemulu ngebe.» Yesu negumwambile re: «Yende, vage nevu mutu wune asevagile.»

Marte ne Mari

38 Ve Yesu ne bebingitsi bandi bendilange mu nzile, bevuduge ve dimbu. Ditsageninange mugetu wanengure Marte, abingise gu ndagu andi. 39 Ayibange ne ketu yanengure Mari, yi tsagene ve mbeke Fumu negulungu ndongi tsyandi. 40 Marte ayibange ne mbili bidyanzu bigulambile beni, ne gubambeme ne Yesu amwambile re: «Fumu, nyayabi re wusarondi re ketu ami anzili vike gudyanze bidyanzu byotsu vike. Kabe mwambile re arugi gusenyamuse.» 41 Fumu negumwagule re: «Marte, Marte, waregemi gukyelu mbili mambu. 42 Dyambu dimosi dine musumbu, Mari asesale dikabu diboti di mutu asabenzemudumbe.»