Luk 12 | SwjSC | STEP | Gigumbi gine, mbili batu beruge gusetsyenge Yesu, befimbe betsaresenange mu metambi, Yesu negupakile gwambile bebingitsi bandi re: «Bandekenanu nuyabe ne buvyangi ne bune Farisi.

Luke 12

Yesu abelonze re nubandekene buvyangi bu Farisi

1 Gigumbi gine, mbili batu beruge gusetsyenge Yesu, befimbe betsaresenange mu metambi, Yesu negupakile gwambile bebingitsi bandi re: «Bandekenanu nuyabe ne buvyangi ne bune Farisi. 2 Gusandi dyambu disweme re disaguyabegenu, motsu mavagu gutsweminine me guyabegenu gwandi. 3 Re dibandu, motsu me batu begwambile gu diviseme me gulunu ve giyalele. Me begwambile gu fundu gu gari ndagu me gulunu ve piti.»

Nye wu nubenze dume

4 Nyanwambile, yenu mbatsi tsyami: Nuyadume batu baboki duyuru, mbare besa ne dinyange digunuvage ke pagere dyambu. 5 Nyanurigitsi mutu wu yenu nubenze dume, dumanu Nyambi mbare pasi mutu mafu a ne dinyange digumubume gu ruvi dusatsimi. Yi, nyanwambili, yandi nubenze dume. 6 Besasumbisi nzwengi yiranu fure beye? Tumbe Nyambi asalibegeni nesi yimosi. 7 Nesi durangu du nange tsi miru mi enu, Nyambi agayabi. Kabe nuyadume ke pagere dyambu. Yenu nune musumbu vyagenu ne mbili nzwengi.

Gusinge Yesu vo gumugale

8 «Nyanwambili kepagere mutu wugwambile ve misu me batu re: Ni mutu Yesu. Menu, Mwane mutu nigwambile gwandi ve wusu byanze bi Nyambi re: Wuwu mutu ami. 9 Tumbe mutu wugukale ve misu me batu, Mwane mutu agumugale gwandi ve wusu byanze bi Nyambi. 10 Kepagere mutu wugube ne tangulu yibi gukyelu Mwane mutu agumunyese, tumbe mutu wugusyenge Dinyuni diboti Nyambi asagumunyese. 11 Ve begunubegile gwetabule bumbanze gu ndagu tsi ndembu, ve wusu bivunde bi migage, nuyadume nevu nugukwekanine nesi nevu nugwambilile. 12 Mbare Dinyuni diboti agunulonge vane ne vane di yenu nugwambile.»

Kugu yi gikiti gisandi ne pikile tsi boti

13 Mutu mosi, ve gari bumongu negwambile Yesu re: «Mulonzi, yambile mwane tayi ami dugabeni meboti mese sise tayi etu.» 14 Yesu negumwagule re: «Mbatsi ami, nye senzunze nzonzi yi gutabule misosu myenu, negugabe meboti menu?» 15 Negukunde bambile re: «Nubandekene, yusulanu mugangu doli. Mbare monyu mutu sa menive, nesi ayi gikiti gineni.» 16 Negubeverile kugu: «Gube gikiti, byambe byandi byotsu bi bure veveni. 17 Yandi beni akupikilange re aniguvage tye? Nzane mbure yineni yi gubandekene biguye byotsu bibi. 18 Labe, nevu niguvagile: Nikapanzi bitale byotsu, nikurunge bineni nonge nikuvere biguye byotsu mune. 19 Nigukwe kwambile mebeni, nine mbili meboti me mipume ne mipume. Nikoli, niye, ninu, niyayi.» 20 Tumbe Nyambi negumwambile re: «Givulu gyeni, ne dibeti di ne muni wugafu. Abyotsu bi ndyawu wusegukige bine bigube bi nye?» 21 Munongu mosi ne mutu wagukigi mbili meboti me yandi beni. Tumbe asakinzi mambu meboti ve misu me Nyambi.

Guvagile Nyambi gitu

22 Yesu negukunde gwambile bebingitsi bandi re: «Dibandu dinyanwambili re, nuyadume gukyelu biguye ne bidwaru. 23 Mbare monyu, ayi vyagenu ne biguye. Duyuru, du vyagenu ne bidwaru. 24 Gengisanu vange besavari, besadoki, besa ne mbure yi guswegile biguye. Tumbe Nyambi agabevegi biguye. Yabanu re yenu nune musumbu vyagenu ne nyoni. 25 Nye benze negise gitsingu gi monyu andi muse mosi gukyelu medume? 26 A gere nusarungule tsonzige mambu megegi agye nwadumi gukyelu meneni? 27 Gengise neve bisinge byakubugili, bisadyanzi, bisarungi, nyanwambili nesi Salomon kanangu ne meboti mandi asedenge bidwaru bi boti, bi buvwandi, vyagenu ne bisinge bine. 28 Agye nusapagi gitu? Pasi Nyambi agadwarisi bisinge ne muni, mugese biku bumu gu ruvi, negwene gwinde re yenu asagu nudwarisa? 29 Yenu, nuyakebe binuguye ne binugunu, nuyadume. 30 Batu besamesinge Nyambi re bakebi byotsu bine. Tumbe yenu, nune Tayi enu yi gu nzambi yayabi byotsu binwarondi. 31 Kebanu mambu me Nyambi garondi kanangu enu. Nyambi gwandi agunuvege byotsu bi yenu nwarondi.» 32 Nuyadume, yenu nu munongu mosi ne mwe mugambe tabe, mbare Taye enu agarondi nukube bane be bulongu bu Nyambi. 33 Sumbisanu byotsu bi nenu, veganu doli tsine bigaye, basanu pengi ne meboti mesegavu gu nzambi, me mudagi sabembi, me meroge besabenze syege. 34 Mbare ve meboti magu, re ve murime agu.

Bedyanzitsi ba mogi

35 «Yesu negukunde benenze re: Banganu mu bidwaru bi gidyanzu banganu nu kike, nuyatsimise lambi. 36 Banganu munongu mosi ne bedyanzitsi bavingili Fumu awu yarugili gu mumengu dyonge. Akutsibulilu mune ndagu ve yandi gudukitsile.» 37 «Mule gu bedyanzitsi be Fumu beguragesenu bamogi ve yandi gurugile. Negungenze nyanwambili, agudware bidwaru bigidyanzu, agubetsagenise ve tavuli, agubegabile biguye.» 38 Nesi aseruge time dibeti, nesi ve koku tsi rege tsya gwambilili. Mule gu bedyanzitsi be yandi guragesenu ba mogi.

39 «Yabanu dikengi, mbere Fumu ndagu agayabi digwere dyarugili mudagi, mbere agumukale gwingene gu ndagu andi. 40 Yenu gwandi, banganu nukike mba nusayabi digwere di gurugile Mwane mutu.»

Mudyanzitsi wu sungeme ne wuse sungeme.

41 Pyere negumwambile re: «Fumu, kugu yine wayiverili gukyelu etu vo gukyelu batu botsu?» 42 Fumu negwambile re: «A muraritsi dimani di doli wusungeme, wulubuge, wu Fumu agubyatse pasi asandi, aguvegange bembatsi biguye pasi digwere dyaduke?» 43 Mule gu mudyanzitsi wu Fumu, ve yandi gurugile agusemuragesenu gudyanze gadyanzi dikengi. 44 «Nyanwambili, negungenze, fumu aguvege mubingitsi wusungeme dinyange digu rare meboti mandi motsu.» 45 Tumbe, pasi mudyanzitsi wune agakwekwambile re: «Fumu ami amatsinge. Pasi akakwani bembatsi be begetu ne be bebagele, akayi, akagolu ne gunu melamu. 46 Fumu mudyanzitsi wune aguruge wisi wu yandi asamuvingili, ne digwere di yandi asayabi. Agukengisu munongu mosi ne batu besesungeme. 47 Mudyanzitsi wayabi tondeni yi fumu andi, tumbe wusamugobisi, wusavingili tugu andi, agudimbu mbili migebi. 48 Tumbe, mutu wusayabi tondeni yi fumu, newuguvage mambu mesa meboti, asagudimbe veveni. Wotsu wavegu veveni, agwivulu veveni, begwivule vyagenu mutu wusevegu mbili.»

Yesu agavagi dupasu

49 «Di menu nzerugile gusebege gu butambe, di munongu mosi ne ruvi. Nyarondi re dubi dwabange. 50 Nigudubu gu meguge, neve mutu gadubu ve yandi gabatisilu gu mwemambe. Murime ami wusa kindi kindi pasi dyambu dine disebetsilabene. 51 Nwapikili re nzeruge gusenuvege polu mu butambe? Vyage, tumbe dupasu. 52 Mbare pakile ne kyawu, gifumbe gi batu beranu gigupasuge, bereru ve gari awu besagulusenu ne bebeyi. 53 Tayi asagulusenu ne mwane, mwane asagulusenu ne tayi. Nguye asagulusenu ne mwane andi mugetu, mwane mugetu asagulusenu ne nguye. Boyi bu mugetu asagulusenu ne mugatsi mwane andi, mugatsi mwane asagulusenu ne nguye mulumi.»

Guyabe mambu me gigumbi

54 Akukunde gwambile bumongu re: «Pasi nwalabi dimungi dya pinde, nwagwambili re: Mfule yi gunoge. 55 Pasi punge yarugili gu bande nwagwambili re: Gugube kagese. Kagese ne gube. 56 Bivyangi, pasi nwagengisi butambe ne nzambi, nwayabi gigumbi nevu gigubile, gye nusayabili mambu me Nyambi gavagi gigumbi gi nemuni?»

Gulusenu ne mutu wune dyambu nagu

57 «Dibandu gye yenu beni nusatabulili bumbanze dyambu disungeme? 58 Gere wagwendi konge ne mutu wune musosu nagu gumbu nzonzi, mu nzile yulusenwanu, mba atsatse kubege gumbu nzonzi, la amakusumbise gu gori amakuvere gu nzugu. 59 Nyakwambile, wusaguvuduge gu nzugu pasi wusebetsigabuse dinwane dyotsu.»