Luk 13 | SwjSC | STEP | Gigumbi gye gyamosi bebatu beragesenu vane, bambile Yesu dyambu di Pilate abokile batu be Galilé ve bevegilange pagu, asobegene melungu mawu ne me bibulu bisaku.

Luke 13

Gukalule mutsageninu vo gufu

1 Gigumbi gye gyamosi bebatu beragesenu vane, bambile Yesu dyambu di Pilate abokile batu be Galilé ve bevegilange pagu, asobegene melungu mawu ne me bibulu bisaku. 2 Yesu abagule re: «Nwapikili re bitsimbu bi batu beboku bi vyagenu ne bitsimbu bi batu botsu. Redibandu bekengile nane? 3 Vyage, nyanwambili, pasi nusakalule mutsageninu wenu, yenu gwandi nugufu. 4 A digumi dibatu ne batu ginane bafu ve ndagu ndeki yi Siloe yitigile, nwapikili re bevage bitsimbu vyagenu ne batu bemosi be Serusaleme? 5 Vyage, nyanwambili, pasi nusakalule mutsageninu wenu, yenu gwandi nugufu.»

Kugu yi muri wanengure figi wusebure milunde

6 Yesu negukunde beverile kugu yiyi: «Gube mutu wubange ne figi yivaru gu gyambe gyandi. Akuruge gusekebe milunde tumbe wusebure. 7 Vane akwambile mubingitsi andi: “Labe, guke mipume mireru nyarugingi gusekebe milunde tumbe wusaburi. Mugwangi mbare wusa ne musumbu.” 8 Mudyanzitsi negumwagule re: “Fumu, wukikunde musile ne mupume wuwu. Nigubuke mumbare muri wotsu nikuvere biriri bi dibumbu ne mutambe boti. 9 Mandi mipume myarugi wugubure. Gere sanane, nigumugwange.”»

Yesu beluse mugetu wubange ne gyere wisi gukole

10 Wisi gukole, Yesu anenzange gu ndagu ndembu. 11 Gu ndagu ndembu yine, gube mugetu wubange ne girunge mu digumi di mipume ne mipume ginane, aserungulange gusimbuge dibandu dinyuni dibi. 12 Yesu negumwene, amurombe, negumwambile re: «Mugetu, wagobuge, wabeluge.» 13 Negumutsabige mekake, vane ne vane mugetu wubange ne girunge negusimbuge, negudumise dine di Nyambi. 14 Tumbe givunde gi ndagu ndembu negutibe kabu mba Yesu abeluse mugetu wisi gukole. Negwambile batu botsu babe gu gari ndagu ndembu re: «Gu tsufu yisyamenu tsi gudyanze. Ruganu gusebelusu mu tsufu tsine sa wisi gukole.» 15 Fumu negubagule re: «Bivyangi byeni, nusalabi re yenu gwandi nwadyanzi wisi gukole, ve nwanyanguli ne gubege bibule byenu gwegunu mambe? 16 Mugetu wune, mukoku wu Abrame, Sate amutungile veke digumi di mipume ne mipume ginane. Ka nzabenze mwobule wisi gukole?» 17 Yesu negubagule nane, batu botsu bemugelange bekugangu ne gisoni. Tumbe bumongu bwotsu bukube ne mugangu gu mambu motsu meboti me Yesu kinzange ve gari awu.

Dubenze gwetsige bundumbe bu Nyambi ne gye?

18 Yesu negukunde bivule re: «A bulongu bu Nyambi bubongene ne gye? A bwakubugili tsye mu bulongu? 19 Wubongene ne mulunde wugegi wu muri wanengure mutarde wu mutu abonge amuvare gu mufunde andi, wubende, wube muri wuneni. Nyoni tsirunge mubu mu birafi.» 20 Negukunde gwambile re: «Nibenze gwetsige bundumbe bu Nyambi ne gye? 21 Bubongene ne mugetu waveri levire gu dibodu di fwareni dikerande.»

Mune ndagu wugegi

22 Yesu ayendange mu yadi ne mimbu gwenenenzange musamu Nyambi, ve yendilange gu Serusaleme. 23 Mutu negumwivule re: «Fumu, ka mwe dibundu didi di batu di gobulu?» 24 Yesu negumwagule re: «Yibanu ne ngudu tsi gwingenine gu munendagu wugegi, nyanwambili re mbili begukebe gwingene tumbe besagurungule. 25 Ve mungwe ndagu gurambugile, negubandige, yenu nugu kane nugu pakile dukitse munendagu negwambilange re: “Fumu, dutsibuli ndagu.” Agunwagule re: “Nzayabi tsyelu yi yenu nuvu.” 26 Vane, nugupakile gwambile re: “Dutsiye, dutsinu mbure mosi nagu. Wusenenze mu mimbambe mi yadi tsyetu.” 27 Agukunde nwagule re: “Nzanuyabi, ragemanu nami yenu botsu bevagitsi be mabi.” 28 Vane reve nugulilile, nugusyege ngeku venugulabile Abrame, Isake, Sakobe ne bebigitsi botsu gu bulongu bu batu basinge bundumbe bu Nyambi, tumbe yenu nugubumu gu kane. 29 Batu begurambugile mu melongu motsu. Begutsambe ve tavuli ne Nyambi gu bulongu bwandi. 30 Vane, batu betsibe gu nzime, bavyoge gu wusu. Abetsibe gu wusu bavyoge gu nzime.»

Yesu agufilu gu Serusaleme

31 Wisyeni wa mosi, Farisi tsifimbe tsibambeme nandi tsimwambile re: «Yende, yusuge vave mbare Erode garondi gukuboke.» 32 Negubagule re: «Yendanu gwegwambile gibagu gine re: “Nyasanzi menyuni mabi, nyabelusi bibedu ne muni ne mugese. Muse mureru nigu mane gidyanzu gyami.” 33 Tumbe, nonge nyendi, nemuni, mugese ne wunemosi mbare disenonge re mubigitsi ayifu tage ne Serusaleme.»

34 «Batu batsageni gu Serusaleme, yenu nwaboki bebigitsi ne memani batu benwavegitsilu. Mbili nyongu ni ronde sobegene bane bagu gu mbeke ami nevu koku gagudemini bane bandi gutsye mepapi. Tumbe nusedironde. 35 Labanu, Nyambi agusise ndagu enu, tumbe, nyanwambili, nusakunde nyene kwangene gigumbi ginu gwambilile re: Didume gu mutu warugi gu dine di Fumu Nyambi.»