Luke 14

Yesu abeluse gibedu wisi gukole

1Wisi gukole, Yesu akurombu ne givunde gi Farisi gweguye gu ndagu andi. Batu babevane bekugengilange dyaguvage. 2Gu gari ndagu yine, gube mutu wubelange ngubi, nyuru tsyotsu tsi kurandegenange, wube meteli ve wusu andi. 3Yesu negwivule bivunde bi migage ne Farisi re: «Migage mi Moyise myagandisi gubeluse mutu wisi gukole?» 4Tumbe bebuse mwagule. Vane Yesu negumutsabige dikake, negumubeluse, negwambile re: «Wubenzegwende gu mbugyagu.» 5Vane, Yesu negubambile re: «Ve gari enu pasi mutu amalabe mwane andi, nesi pagese andi ya pudumuge gu gidune, asagwende gweyidobule mbangu mbangu, nesi nane wisi gukole?» 6Tumbe beserungule mwagule.

Sale mbure nzime.

7Yesu negulabe batu beserombu gu mumengu, bekasali ka bipu bi rege bi bundumbe. Negubeverile kugu yi guvage re: 8«Pasi warombu gu mumengu dyonge, wuyasale gipu gi bundumbe mbare ve gurugile mutu wusemurombe mandi aguruge ne mutu wudigobe wakukibi. 9La amagusekwambile re: “Musisili gipu gyagu.” Vane wugwende ne gisoni gwetsagene ve gipu gi nzime. 10Pasi warombu gu mumengu dyonge, tsagene gu gipu gi nzime. Varugili mutu wusenurombe lamakubonge gunzime amakubege guwusu, vewagwendi vewusu la wukene mugangu ne bundumbe bwotsu. 11Munongumosi, kepagere mutu wakwekunangusi Nyambi agamusunzi, wakwekusunzi Nyambi agamunangusi.»

Yesu gavegi ndongi yi gurombe bigayi

12Yesu negwambile mutu wusemurombe guseguye re: «Pasi warombi batu gu gilambu gi mumengu, wuyarombe mbatsi tsyagu, nesi bane be nguye tsyagu, nesi biburu byagu, nesi bikiti bi ve mbeke agu. Pasi wavage nane, yawu gwandi begukurombe wisi nzusu gukugabusile diwusebevage. 13Tumbe pasi wavegi mulambu mumengu, rombe bigayi, batu bene byere, membolegotu, batu bene pafu. 14Pasi wavage nane, wugube ne mugangu mba besagurungule kugabusile. Tumbe Nyambi agukugabusile byoni wisi wu batu bevage meboti begurambugile gu dufu.»

Kugu yi mulambu neni

15Batu berombu gu gilambu negulu nane, wumosi negwambile Yesu re: «Diboti gu wotsu wuguye gilambu ne Nyambi gu bulongu bwandi.» 16Yesu negumwagule ne kugu re: «Gube mutu wulambe mulambu neni, arombe mbili batu. 17Digwere di guye negukike, arume mudyanzitsi andi gwegwambile berombu re: “Ruganu gilambu gyakike.” 18Tumbe yawu botsu babe munu mosi, wurege ayambile mubingitsi wurumu re: “Yambile fumu: Nzesumbe gyambe, nyarondi gwekyene, nyamulembigi nzaguruge.” 19Wumosi gwandi negwambile re: “Nyarugili negusumbe digumi di pagese, nikyalabi neve tsyadyanzili, nyakulembigi nzaguruge nyesi.” 20Wumosi gwandi negwambile re: “Nyagonge, redibandu nzagurugile.” 21Mudyanzitsi wurumu negusegwambile fumu misamu. Fumu atibile batu be yandiserombe kabu. Negwambile mubingitsi andi re: “Yende mbangu gu dikase, ne munzile, mbegili gunu bigayi, batu bene byere, batu bene pafu, membolegotu.” 22Gigumbi ne guvyoge, mudyanzitsi negusegwambile fumu re: “Nzevage diwusenyambile, batu baruge, tumbe guki mbili bipu bisa ne batu.” 23Fumu negukunde gwambile mudyanzitsi re: “Yende mu nzile yagwendi gu mipindi, mu migogu mi mirumbe, bambili re besingi gwingene gu ndagu gilambu, nonge ndagu ami yikubase. 24Nyanwabili Gusagube mutu wusebuse mbile ami aguye mulambu ami.”»

Wotsu warondi binge Yesu, nonge asindili meguge

25Yesu ayendange gu muvevilu, negulabe re mbili batu bamubingi. Negugeluge gu yawu, negubambile re: 26«Wotsu warondi mbinge, pasi asatondi vyagenu ne taye andi, ne nguye andi, ne mugatsi andi, ne bane bandi, bane be nguye tsi andi, ketu tsi andi, nesi monyu andi, asagube mubingitsi ami.» 27Wotsu wusekike gusindile meguge kwange ne gudufu, negumbinge asagube mubingitsi ami. 28Pasi ve gari enu, mutu garondi runge ndagu ndiki, agarepikile, akuyabe durangu du doli tsi nandi gere dubenzemane runge ndagu yine. 29Pasi amapakile gidyanzu gi gubuke mevulu me mekutu kwange ne gudigunge, asamanisile gurunge ndagu yine, batu begumusyeve. 30Begwambile re: «Gengisanu mutu wune asepakile gidyanzu gi gurunge ndagu ndiki, tumbe asayimanisile.» 31Pasi kanangu garondi gwende gu ngube, ne digumi ditoseni di gori tsyandi, gwedimbene ne kanangu yi bulongu bunzusu, agurepikile, ne guyabe gere gori tsi nandi tsi benzerungule dimbene ne kanangu yarugi ne megumi mebeyi me toseni me gori. 32Pasi agapikili re asagurungule, neve kanangu yine yiki tage, agarumi gilumbi gwegwivule neve beguvagile, nonge ve tsatsegube ngube ve gari awu. 33«Munongu mosi, kepagere mutu ve gari enu wusagusise byotsu binandi, asabenzegube mubingitsi ami.»

Kebu yisa ne musumbu.

34«Kebu givave giboti, tumbe, pasi yisega ne ndume, gusa givave gi gukunde yigabuse. 35Yisega ne musumbu, mbare nesi yise kuku ve dibandu dibivaru, yisabenzekunde bibendise dikengi yigubumu kagubumu. Yulwanu dikengi dyambu di nyanwambili, dibandekenyanu mu mirime.»