Luke 15

Kugu didombi di tsyemuge di kulabene

1Bebolitsi be lepu ne batu bene mutsageninu wubi. Beruge bebeli ne Yesu gusegulu me yandi gwambile. 2Farisi ne bivunde bi migage mi Moyise bekumugelange re: «A mutu wuwu agasobegeni neguye ne batu bavagi mambu mabi?» 3Yesu akubeverile kugu yi guvagere: 4«Ave gari enu, pasi mutu ane kame medombi, dimosi dyatsyemuge, agusisi motsu mane gugubinge disetsyemuge kwange neve agudyenine? 5Ve yandi gudyenine, agulu mugangu, agudisunze mu mesambeke. 6Akwende ne dyoni gu dimbu akurombe mbatsi tsyandi, ruganu duyayanu mbare didombi dyami ditsibe ditsyemuge nyadyene. 7Munongumosi, nyanwambili, gugube mugangu neni gu nzambi gukyelu muvagitsi mabi wumosi wanzinge, wakaluli mutsageninu, vyagunu ne megumi kambumosi me batu ne batu kambumosi bapikili re besungeme.»

Kugu doli yitsyemuge, yilabene

8«Kundanu gulu, pasi mugetu ane digumi difure, yimosi yatsyemuge, negungenze asagwende gwebangise lambi, akugombule ndagu, akukebe fure yine ne dikengi kwange neve aguyenine?» 9Ve aguyenini, agurombe mbatsi tsyandi ne botsu batsageni ve mbeke andi, akubambile re: «Dubyanu ne mugangu mbare fure yisetsyemuge nyayene. 10Munongumosi, nyanwambili gumugangu ve wusu yanze tsi Nyambi gukyelu muvagitsi mabi wumosi wanzinge, wafungule bitsimbu byandi.»

Kugu Mwane wutsyemuge alabene

11Yesu negukunde gwambile re: «Mutu ayibange ne bane bebeyi. 12Mugegi akwambile taye re pegi dyami dikabu di meboti, taye negugabe meboti mandi ne bane babeyi.» 13Tsufu neguvyoge, mugegi negusumbise meboti mandi motsu. Ayende ne doli tsine gu bulongu burageme. Gune akube ne mutsageninu wusa wuboti, akepakile yunze doli tsibe nandi. 14Vane, doli tsyotsu neguvu, mundale neguruge gu bulongu bweni, akupakile gukambilu ne meboti. 15Ayende gwedyanze gumbu mutu bulongu bune. Mutu wune amutinde gwedyanze, gwebandekene ngulu. 16Arondange guyi nesi biguye bi ngulu, tumbe gusabange mutu gumuvege byoni. 17Vane, yandi beni negupikile, negwekwambile re: «Gumbu taye ami bedyanzitsi bandi bene mbili biguye. Menu negufungu ne nenzale gugu. 18Nikagabugi gumbu taye ami, nigwemwambile re: Tate, nyatsimbu ve misu me Nyambi neve misu magu. 19Nzegandi ne dinyange digunengu re mwane agu, mbongi munongumosi ne bedyanzitsi bagu.» 20Agabuge gumbu taye andi. Mwane mbe kitage, taye negumwene akumulu ngebe, negwende mbangu gwemusambegene, negu mugumberene veveni. 21Vane, mwane negwambile taye andi: «Tate, nyatsimbu ve misu me Nyambi neve misu magu. Nzega ne dinyange digunengu re mwane agu.» 22Tumbe taye negwambile bedyanzitsi bandi re: «Beganu mbangu mbangu bidwaru biboti, mudwarisyanu, muveryanu moru mu mulembu ne pondu mu metambi. 23Bonganu pagese yavonge, yibokyanu, duyanu, dubyanu ne mugangu. 24Mbare mwane ami wuwu mbere amafu, amakunde rambuge. Mbere amatsyemuge, amakunde labene.» Vane, bepakile guyaye.

25«Gigumbi gine, mwane givunde ayibange gu byambe. Neguruge, nesi aguvuduge gu ndagu akulu nimbu ne muyangu wu batu beginange. 26Negurombe mudyanzitsi negumwivule: “Agye gike gu ndagu gune?” 27Mudyanzitsi negumwagule re: “Mwane taye agu amaruge, taye agu amaboke pagese yivonge, mbare aseruge pembi ne polu.” 28Mwane givunde negutibe kabu, negubuse gwengene gu ndagu. Taye andi aruge gusemulembige nonge akwingene. 29Tumbe negwagule taye andi: “Yulu, guke mbili mipume, nyakudyanzili, nyakudedugili nesi nane wusebetsipege nesi mwane tabe nikuyaye ne mbatsi tsyami. 30Mwane agu wuwu amaye doli tsyagu ne bane bebegetu. Amakuruge, wumaboke pagese yivonge gukyelu andi.” 31Vane, taye negumwagule re: “Mwane ami, gigumbi gyotsu wunami, byotsu binami byagu. 32Tumbe dinonge re dubyanu ne mugangu, duvagyanu mumengu, mbare mwane taye agu wuwu mbe amafu, amakunde gabuge monyu. Mbe amatsyemuge, amakunde labene.”»