Luke 16

Gilombi gi muraritsi lubuge

1Yesu negwambile bebingitsi bandi re: «Gube gikiti, gibange ne muraritsi wubandekenange meboti mandi motsu. Gukuruge mutu gusemwambile re: “Muraritsi wune agayunzi meboti magu.” 2Fumu meboti negurombe muraritsi meboti mandi negumwambile re: “Nyagulu tsangu tsibi gukyelu agu. Ndabisi neve wabandekenini meboti mami. Kabe nikakusuli. Wusakunde bandekene meboti mami.” 3Muraritsi negukwekwambile re: “A nivatsye, gere fumu akanyusuli mu gidyanzu? Nzandi ne ngudu tsi guvare byambe. Guvonde nigulu gisoni. 4Nesi fumu asenyusele mu gidyanzu, nyayabi neve niguvagile, nonge batu bekutare gumbu gyawu.” 5Muraritsi negurombe batu benwanange fumu andi wumosi ne wumosi. Mutu wurege neguruge, amwivule: “Wanwani fumu ami tangu tsye?” 6Amwagule re: “Nyanwani fumu agu kame mirege mi matsi.” Muraritsi negumwagule re: “Bonge mbangu mbangu gisangumu gyagu gi dinwane tsagene vane rende mu gisangumu gi dinwane megumi meranu me mirege mi matsi.” 7Negukunde gwambile wunzusu re: “Wanwani fumu ami tangu tsye?” “Nyanwani fumu agu kame puke tsi putu.” Negumwambile re: “Bonge gisangumu gyagu gi dinwane rende megumi ginane me puke.” 8Fumu negulu neve muraritsi wune asevagile amugabusile diboti, gukyelu dyele ditsibe nandi. Givagitsi gyawu gimambu yawu ne yawu gi vyagunu ne bane be giyalele. Munongu mosi ne bane be dilale didi bene dyele vyagenu ne bane be giyalele.» 9Yesu negukunde bambile re: «Nyanwambili ne meboti menenu, yamusanu batu nonge bekube mbatsi tsyenu, mba gigumbi gi meboti mane meguvilu. Nyambi agunusinge gu ndagu andi yi peke peke. 10Mutu wotsu wusungeme gu mambu megegi, asungeme gwandi gu mambu meneni. Mutu wotsu wusesungeme gu mambu megegi, asagube gwandi asungeme gu mambu meneni. 11Pasi nusabe nusungeme gu gubandekene meboti menu me bulongu, nye gunuvege meboti mengenze? 12Pasi nusabe nusungeme gu gubandekene meboti me mutu nzusu, nye gunuvege menu? 13Gusa mudyanzitsi wubenzedyanzile fumu beye. Aguvine wumosi, akuronde wufimbe. Vane agugobise wumosi, akulenze wufimbe. Munongumosi nusabenze dyanzile Nyambi negube muvige doli.»

Yesu agabigisi farisi

14Batu be dibundu di farisi negulu motsu me Yesu yambilange, bekumudokange mbare babange ne mugangu meboti me bulongu. 15Tumbe Yesu negubambile re: «Nesi yenu nwavagi mambu megukwekurigitse ve misu me batu re nusungeme, tumbe Nyambi agayabi pikile tsi mirime myenu mbare mambu me batu balabi re dyambu dineni, Nyambi gadyeni re dyambu disa ne musumbu. 16Nesi San batiste guruge, batu beyabange migage mi Moyise ne bisangumu bi bebigitsi berende. Bepakile nenze musamu boti ve gigumbi gi San batiste, mwane mwane kebe ngudu tsi gwingene gu bulongu bu Nyambi. 17Nzambi ne tsyengi begutsyemuge, tumbe nesi murendu mosi wu mugage Nyambi wusagubunzulu. 18Kepagere mutu wasanzi mugatsi andi, wagongi wunzusu, agatubi disongi. Wotsu wagongi mugetu wusesanzu gu dyonge, agatubi disongi.»

Gilombi gi gikiti ne gigaye gyanengure Lasare

19«Gube gikiti gi dwarange ka bidwaru biboti bi lenge bine disumbu dineni. Tsufu tsyotsu avagange mulambu neni. 20Gube gwandi gigayi gyanengure Lasare. Gibange gifidugilu ne pure melamine ve munendagu gikiti. 21Arondange guye nesi bigugufu bi bondugange gutsye tavuli gikiti. Tumbe mondi tsirugange gusevende pure tsyandi. 22Gigayi ne gufu, byanze bi Nyambi bemubege ve mbeke Abrame. Gikiti gwandi negufu bemutsige. 23Gu batu bafu, gu gikiti kengilange veveni, negugengile, akulabe gutage Lasare ve mbeke Abrame. 24Vane, gikiti negwamuge re: “Tate Abrame, nyulu ngebe. Nyakulembigi, rume Lasare nonge akweputige mulembu andi gu mambe, akubonduse diberi digusepotse mungunge, mbare nyakengi veveni gu gari ruvi dudu.” 25Tumbe Abrame negumwagule re: “Mwane ami, rangemine re gigumbi gi monyu agu gutsi, wudile mbili meboti. Tumbe Lasare ayibange kagu meguge. Ne kyawu gubonzu gabonzu. Ndyayu wugumukengu. 26Dibandu, ve dubile duneni dwadupasuli yetu nenu, nonge batu barondi ruge gu yetu besagurungule, yetu gwandi dusabenze ruge gu yenu.” 27Gikiti negwambile re: “Tate, nyakulembigi rume Lasare gu biburu byami. 28Mbare nine bane betaye beranu. Ayendi gwebelubuse nonge betsatse ruge yawu gwandi gu mbure yiyi yi mukengu.” 29Abrame negumwagule re: “Bane be taye tsyagu be ne migage mi Moyise ne bebigitsi, bebulilu dikengi.” 30Gikiti negwambile re: “Tate Abrame, besagusinge ka migage mi Moyise ne bebigitsi, pasi re gusarambuge mutu gu batu bafu, ayende gu yawu, mutsageninu awu wusagukaluge.” 31Tumbe Abrame negumwagule re: “Pasi besagulu migage mi Moyise ne bebigitsi, besagudibole re dyambu nesi mutu aserambuge gu dufu negwende gu yawu gwebambile besagukalule mutsageninu.”»