Luke 17

Ndongi tsi Yesu

1Yesu negwambile bebingitsi bandi re: «Mambu mabegisi batu gu mabi mesakambu. Tumbe milogu gu mutu wavagi re bembatsi bevagi mabi. 2Dinonge re bemutungi mungori andi dimani dineni, bekumubume gu nzube vyagenu negukubegise batu be nzusu mu mabi. 3Bandekenanu.»

«Gere mwane taye makuva dibi, musyembi. Pasi amasinge tsyembu tsine, munyesi. 4Gere asekuvage dibi nyongu yine guyireru mumuse, gere aseruge nyongu yine guyireru gu ndyayu gusekulembige. Munyesi.»

Gitu

5Bilumbi bi Yesu bemwambile re: «Fumu, duvegi gitu gineni.» 6Fumu negubagule re: «Pasi re gitu ginwapagili gi gigegi munongumosi ne mulunde gegi wu muri wanengure moutarde, nubenze gwambile muri wune re rubuge, yende kwevare gu nzube agumugobise.»

Gidyanzu gi mudyanzitsi

7«Mutu nye vegari enu pasi ane mudyanzitsi wafuli butambe, vo wabandekeni migambe mi bibulu, agamweni guruge agumwambile re: “Ruge, yange.” 8Disabenze vagu. Agumwambile re: “Ndambili biguye, sanze bidwaru, tsambe tavuli, wukuseperile biguye mu gipele, gigumbi gi nigayili ne gunu. Pasi nimamane ndyagwandi wukuyi, wukunu.” 9Asabenze gabusile mudyanzitsi andi diboti mbare asekinze dyambu di asemurume gudyanze. 10Yenu gwandi, pasi numavage dibe senurume, yambilanu re: “Dube dyanzitsi besane musumbu, dusevage ka gidyanzu gibesedurume guvage.”»

Yesu abeluse digumi dibatu bebelange bwatsi

11Ve Yesu yendile gu Serusaleme avyogile ve ndilu musyengi wu Samari ne Galilé. 12Neguvuduge ve kodu dimbu, digumi di batu bene bwatsi negusemubengusene. Besikeme tage nandi. 13Bamuge re: «Yesu, Fumu, dulu ngebe.» 14Negubene, abambile re: «Yendanu gwekwerigitse gu bevegitsi be pagu.» Vane, ve bendilange gumbu bevegitsi be pagu, yawu botsu negulabe re babeluge. 15Wumosi ve gari awu negulabe re amabeluge, negugabuge nzime, akwene dumisange dine di Nyambi ne mune mugangu. 16Negusekuteme ve byeru bi Yesu mbami vetsi, negumugabusile diboti. Mutu wune ayibange mwisi Samari. 17Vane Yesu negwambile re: «Sa digumi dyotsu di batu disebeluge. A kambemosi begu? 18Yawu botsu gusa mutu wusepikile gusegabusile Nyambi diboti ka mweni wuwu?» 19Vane, negumwambile re: «Rambuge, yende, gitu gyagu gyakwobule.»

Tugu bulongu bu Nyambi

20Batu be dibundu di Farisi negwivule Yesu: «Nyambi aguruge gigumbi gye gusegube kanangu etu?» Abagule re: «Nyambi asaguruge mambu gere givave gyalabeni. 21Besabenzegwambile re: “Gengisanu ayi vave.” “Ayi gune.” Yabanu re Nyambi ayi ve gari enu.»

Tugu yi Mwane Mutu

22Vane, Yesu negwambile bebingitsi bandi re: «Gugube gigumbi gi nuguronde gulabe Mwane Mutu, tumbe nusakundemwene. 23Batu begunwambile re: “Ayi gune.” “Ayi vave.” Tumbe nuyagwende, nuyagwende mbangu. 24Neve dusyemu dwavedemini gu nzambi, giyalele gyandi gigulabene gu tandu ne bande, digube munongumosi ne wisi Mwane Mutu agurugile. 25Tumbe nesi aguruge Mwane Mutu agurekenge veveni. Dilale dine muni digumugale. 26Wisi wu Mwane Mutu agukurugile, mambu megube munongumosi ne gigumbi gi Noe. 27Gigumbi gi Noe, batu bayange, banungu, bongenange, bonzange bane bawu, kwange ne wisi Noe yingenine gu watange. Giningu gineni negupande, gikuboke batu botsu. 28Mambu megube munongumosi ne gigumbi gi Lote. Gigumbi gi Lote, batu bayange, banungu, besumbange, besumbisange, bevarange, berungange. 29Tumbe wisi wu Lote yusugile gu Sodome, Nyambi abonduse ruvi ne fule gere mfule. Dibeboke yawu botsu. 30Wisi Mwane Mutu agulabenine, mambu megube munongumosi. 31Wisi wune, mutu wugube ve gilembi, asakudenge gigumbi gigwingene gwekebe mifune gu ndagu andi, munongumosi ne wugube gu gyambe, asakundegabuge gumbu gyandi. 32Rangeminanu dyambu di mugatsi Lote. 33Mutu wakebi gurare monyi andi aguyitsyemune. Awugutsyemuse monyu andi gukyelu ami aguyidenge. 34Nyanwambili, dibeti di wisi wune, batu bebeyi begube gu gitsige gimosi. Wumosi agubongu, wune agusisu. 35Begetu bebeyi begube banigi milunde mbure mosi. Wumosi agubongu, wune agusisu. 36[Bebagele bebeyi begube gu gyambe. Wumosi agubongu, wune agusisu. ▼

▼Girini gigi gisirendu bisangumu bi gulu bi Gereke

]» 37Bebingitsi negwivule Yesu re: «A diguvyogile gu mbure gye, Fumu?» Abagule re: «Ave gubile gibindi, reve gubile gwandi dibundu di nyunge.»