Luke 18

Kugu yi mukwili ne nzonzi

1Yesu ne gubeverile kugu yi guberigitse re beyadede belembingi Nyambi gigumbi gyotsu. 2Negubambile re: «Gube gu yadi, nzonzi yise dumange Nyambi, yise gobisange kepagere mutu. 3Gu yadi yine yamosi, gube gwandi mugetu mukwili, wurugange gigumbi gyotsu gusegwambile nzonzi re: “Tabulili bumbanze ne mbeni ami.” 4Gigumbi gyotsu, nzonzi yine abusange gutabule musosu wune. Tumbe akekwekwambilange yandi beni re: “Ngenze nzadumi Nyambi, nzagobisi kepagere mutu, 5tumbe neve mukwili wuwu anegikanene nigumutabulile bumbanze nonge atsatse kurugange gusepage duvoguse gigumbi gyotsu.”» 6Yesu negukunde gwambile re: «Yulwanu dyagwambili nzonzi yibi yiyi. 7Tumbe Nyambi asagutabulile bumbanze batu bandi bamulembi nyangu ne dibeti? Agutsinge negubamuse? 8Nyanwabili re agubetabulile bumbanze mbangu mbangu. Tumbe ve gurugile Mwane Mutu, aguseragesenu batu bamuvingili ne gitu gutsi?»

Kugu yi Farisi ne mubolitsi lepu

9Negukunde beverile kugu gukyelu batu beyabange re besungeme ve wusu Nyambi, bekulenzange bembatsi botsu: 10«Batu bebeyi bende gu ndagu Nyambi gwelembe. Mutu wu dibundu di Farisi ne mubolitsi lepu. 11Mutu wu dibundu di Farisi neguretseme akulembange gutsye murime re: “Tate Nyambi, nyakugabusili diboti mbare nzane batu bemosi badagi, besesungeme, bavagi mesongi. Nzamunongu mosi ne mubolitsi lepu wuwu. 12Nyasindili nzale tsufu beye mu tsonu. Nyakuvegi gimosi gu digumi mu byotsu binyadili.” 13Mubolitsi lepu ayibange tage ne batu. Aserungulange gengise nesi misu gu yulu. Tumbe akukwedimbange ve tulu, akwambilange re: “Tate Nyambi, nimuvagitsi mabi. Nyulu ngebe.” 14Ngenze nyanwambili, mubolitsi lepu reyibe asungeme vewusu Nyambi, ve agabugile gu ndagu andi. Sabe mutu wu dibundu di Farisi. Mbare mutu wakwenanguli, Nyambi agamusunzi. Wakwesunzi, Nyambi agamupandisi.»

Yesu gavegi bane begegi mule

15Batu bekubege bane begegi gu Yesu nonge akubebembe. Bebingitsi be Yesu negulabe nane bekubekale. 16Tumbe Yesu negurombe bane, negwambile re: «Nuyakale bane begegi guruge gu menu. Nuyabegandise, mbare bulongu bu Nyambi bu munongu mosi ne bane begegi.» 17Negungenze, nyanwambili, kepagere mutu wusasingi bulongu bu Nyambi munongumosi ne mwane mugegi asagwingene.

Gikiti

18Givunde gi Sife akwivule Yesu re: «Mulonzi boti, a niva tsye nikudenge monyu yi peke ne peke?» 19Yesu negumwagule re: «Gye wanengili re Mulonzi boti? Gusa mutu wuboti, vengu ka Nyambi vike. 20Wayabi migage mi Nyambi: Wuyatube disongi. Wayaboke mutu. Wuyadage. Wuyafuregile mbatsi dyambu. Gobise taye ne nguye agu.» 21Givunde gi Sife negumwagule re: «Nyagobisi migage myotsu mine pakile ve bulengi bwami.» 22Yesu negulu mambu me mutu wune yambile, negumwagule re: «Wukyasali ne dimosi. Sumbise byotsu binagu. Gabile bigayi doli tsine, pasi wavage nane, Nyambi gukuvege meboti gu nzambi. Sige wukuruge, wukumbingi.» 23Mutu wune negulu nane, atsore. Mbare ayibange gikiti gineni. 24Yesu negulabe re amatsore, negwambile re: «Dirange di bikiti gwingene gu bulongu bu Nyambi.» 25Munongumosi, diserange di gibulu gineni ne pagese gwingene gu divulu di tsongi. Tumbe dirange veveni gikiti gwingene gu bulongu bu Nyambi. 26Batu bulungu mambu me Yesu yambilange, bambile re: «A vane, nye benze gobulu?» 27Yesu negubagule re: «Mambu motsu me batu besabenze vage, Nyambi gamevagi.» 28Pyere negwambile Yesu re: «Labe, yetu dwasise byotsu bitsibe netu gu gukubinge.» 29Yesu negubagule re: «Negungenze nyanwambile re mutu wugusise ndagu andi, mugatsi andi, bane be tayi tsyandi, biburu byandi, bane bandi, gukyelu bulongu bu Nyambi, 30agudenge meboti membili ne gigumbi gigi, kwange gigumbi gyarugi. Agudenge monyu yi peke ne peke.»

Yesu akakundi yabisi dufu ne durambugu dwandi

31Yesu negubonge digumi di bebingitsi bandi ne bebingitsi bebeyi, negubambile re: «Yulu, anu gwendi anu gu Serusaleme, gu gurigitsilu motsu me bebigitsi berende gukyelu Mwane mutu. 32Mbare agusaku mu mekake me batu be melongu mesusu, begumudoke, begumukwane, begumutule mati, 33begumudimbe migebi, begumuboke. Wisi wumureru agurambunge gu dufu.» 34Tumbe bebingitsi beseyulungu mambu motsu me Yesu yambilange, mba mabe me sweme gu yawu.

Yesu gabelusi mutu ne pafu

35Yesu mbeke beli ne yadi Seriko, gube mutu wube ne pafu ve mbeke nzile avondange. 36Negulu duvogusu du batu begogulange, akwivule: «A mune duvogusu dune gye?» 37Bemwambile re: «Yesu yi Nasarete gavyogi.» 38Negwamuge re: «Yesu, Mwane Davide, nyulu ngebe.» 39Batu babe ve wusu bekumuvotsange re: «Vole.» Tumbe akukunde gwamuge vyagunu «Mwane Davide, nyulu ngebe.» 40Yesu negusikeme. Neguvege bebingitsi bandi dinyange re: «Mumbegilyanu.» Negubambeme ne Yesu, Yesu mwivule re: 41«Warondi re nikuva gye?» Yandi negwagule re: «Fumu, nyarondi gulabe dikengi neve nibilange.» 42Yesu negumwagule re: «Labe, gitu gyagu gyakubeluse.» 43Vane ne vane negulabe dikengi. Negubinge Yesu negwene dumisange dine di Nyambi. Bumongu negulabe nane, yawu gwandi bekudumisange dine di Nyambi.