Luke 19

Yesu gumbu Sasé

1– 2Yesu negwingene gu Seriko, ve adalilange yadi yine, abengune ne mutu wanengure Sasé, givunde gi bebolitsi be lepu ayibange gikiti. 3Akebange gulabe Yesu. Tumbe nevu ayibange mugufi, aserungule gumwene mbare gubange mbili batu. 4Ayende mbangu gu wusu mu nzile yi Yesu avyogilange, abare gu muri wuneni, nonge akumwene. 5Yesu neguvuduge gu dibandu di muri agengile gu yulu, negulabe Sasé gu yulu muri amwambile re: «Sasé, vuru negusunde, mba nemuni nigwingene gu ndagu agu.» 6Sasé negusunde mbangu mbangu, negumubege gu ndagu andi ne mugangu. 7Batu negulabe nane, bekwamugange, bekwambilange re: «A gye mutu wu amagwetsagenine gu mutu wusa ne monyu boti?» 8Sasé meteli ve wusu Yesu, amwambile re: «Fumu, nikapasi meboti mami ve gari, dikabu dimosi nikadivegi bigayi. Pasi nzefude mutu, nigumugabusile nyongu yine.» 9Yesu negumwambile re: «Nemuni Nyambi aseruge gugobule ndagu yiyi, mbare yandi gwandi mwane Abrame. 10Mbare Mwane Mutu aseruge gusekebe negusegobule batu batsyemugilu dibondu.»

Kugu yi memani me kunge

11Ve Yesu yibile beli neguvudege gu Serusaleme, akuverile batu barugili negulu musamu andi kugu, mbare batu bepikilange re bulongu bu Nyambi bu gulabene ne mepape. 12Yesu negwambile re: «Mutu gitsapele gi mindumbe akwende gu bulongu butage gu kanangu neni gwebyatsu kanangu yi gubange ve nzime andi, akukunde ruge. 13Nesi agwende, arombe digumi di bedyanzitsi bandi, abegabile mwane mwane yandi fure dimani di kunge dine disumbu dineni negubambile re: “Funisanu doli tsine kwangene ve nigurugile.” 14Tumbe batu be bulongu bune bemuvinange, bekurume batu gu bulongu bwende yandi, gwebambile re: “Mundumbe, dusarondi re mutu wune abi kanangu etu.” 15Tumbe negubyatsu kanangu, agabuge gu bulongu bwandi. Arombe bedyanzitsi beyandi vege fure doli, nonge akuyabe durangu du fure doli tsibesefune. 16Mudyanzitsi wurege neguruge amwambile re: “Fumu, fure doli agu yi kunge yisefune gwandi digumi di fure.” 17Fumu negumwambile re: “Diboti, wu mudyanzitsi wuboti, wutsibe wusungeme mu mambu megegi, nikakubyatsi Givunde gi digumi di yadi.” 18Wumubeyi neguruge negwambile re: “Fumu, fure yi wusepege yisefune fure yiranu gwandi.” 19Negumwambile re: “Ndyayu nyakubyatsi givunde gi yadi yiranu.” 20Mudyanzitsi wunzusu neguruge, negusemwambile re: “Fumu, labe fure agu yi kunge. Nzeyibandekene niyipyete ne tsande. 21Mbare nzekulu wome. Ndyayu wu mutu wurange. Wabongi gi ndyayu wusasunze, wabuki bi ndyayu wusevare.” 22Kanangu negumwambile re: “Mudyanzitsi wubi, nyakutabulili bumbanze mu mambu me ndyabeni wusegwambile. Wuseyabange re ni mutu wurange, nyabongi binzasunze, nyabuki binzevare, 23a dibandu gye wusagwesunzile fure ami gu dimani dyaswegili doli? Ve nzerugile mbenze tsiragesenu tsyafune.” 24Vane, negwambile babe vane, “Mudumbyanu fure yikunge yinandi. Yivegyanu mudianzitsi wune digumi.” 25Bemwambile re: “Fumu, akene digumi di fure.” 26Kanangu negubagule re: “Nyanwambile, wotsu wune givave begukunde muvege vyagunu. Tumbe wusa negivave begumusule nesi ginandi. 27Batu bapini, besaronde re nibi Kanangu, bebegyanu gunu, bebokyanu ve misu mami.”»

Yesu kagwendi gu Serusaleme

28Negumane gwambile nane, Yesu ne bumongu bende gu Serusaleme. 29Mbe bekebeli neguvuduge gu Betefage ne Betani, gu gyari gi mukongu wu miri myanengure Olivi. Yesu arume bebingitsi bandi bebeyi gu wusu, 30abambile re: «Yendanu gu dimbu digengesene. Ve nuguvudugile, nuguragesenu mwane gibulu gyanengure ane, gitungu, gisebetsitsageninu. Ginyangulyanu. Gimbegilyanu gunu. 31Pasi mutu asenwivule re: “Dibandu gye nwaginyangulili?” Mwambilyanu re: “Fumu agagirombi.”» 32Bebingitsi babeyi berumu bende, beragesenu motsu kanevu Yesu bambilile. 33Ve benyangulile mwane gibulu gyanengure ane, bengwe gyoni bebambile re: «Dibandu gye nwanyangulili mwane gibulu gine?» 34Bagule re: «Fumu agakirondi.» 35Bemubegile mwane gibule. Besunze ve yulu gibulu bidwaru byawu. Benangemise Yesu veyulu gibulu gyeni. 36Ve Yesu yendilange, batu bekwalange bidwaru byawu mu nzile. 37Beli guvuduge gu Serusaleme, mu nzile yasundi gu mukongu wu miri myanengure Olivi, gigondu gyotsu gi bebingitsi bandi, begangu ne mune mugangu. Bekwimbange gu yulu dine di Nyambi gukyelu bimage bi yawu belabe bi Yesu avage. 38Bambile re: «Nyambi avegi mule gu kanangu yarugi gu dine di Fumu. Polu gu yulu. Didume gu Nyambi.» 39Batu be dibundu di Farisi babe ve gari awu bambile Yesu re: «Mulonzi, votse bebingitsi bagu.» 40Yesu abagule re: «Nyanwambili, nesi besevole, memani megwamuge.»

Yesu galili gukyelu Serusaleme

41Yesu mbeke beli neguvuduge gu yadi Serusaleme, negulabe yadi yine, alile gukyelu andi. 42Negwambile re: «Serusaleme, wusayabe neve wubenze dengile polu. Re dibandu wusabenze kunde yene. 43Gugube tsufu batu bakuvini begurunge murumbe gusedimbene nagu. Begukutsyenge, begukubakige mutsyelu tsyotsu. 44Begukunige ne ndyayu ne batu bagu. Ve gari agu besakusisile nesi dimani. Mbare wusayabe gigumbi gi Nyambi aseruge gusekwamuse.»

Yesu gasanzi besumbitsi gu gari ndagu Nyambi

45Yesu negwingene gu gari ndagu Nyambi akusanze batu besumbisange. 46Akubambilange re: «Direndu mubisangumu gi musamu Nyambi re: “Ndagu ami yigube ndagu yi ndembu.” Tumbe yenu, nwayikaluse ndagu midagi ▼

▼Esaie 56.7; Jeremie 7.11

.» 47Anenzange wisi wotsu gu ndagu Nyambi. Bivunde bi bevegitsi be pagu, ne bivunde bi migage mi Moyise, bivunde bi dibundu bekebange guboke Yesu. 48Tumbe beseyabange neve beguvagile, mbare batu botsu berondange gulu mambu me yandi yambilange.