Luk 20 | SwjSC | STEP | Wisi mosi, ve Yesu nenzilange bumongu musamu boti gu gari ndagu Nyambi, bivunde bi bevegitsi be pagu ne bivunde bi migage mi Moyise ne bivunde bi dibundu beruge ve mbeke Yesu,

Luke 20

Nyevege Yesu dinyange diguvage mambu mane

1 Wisi mosi, ve Yesu nenzilange bumongu musamu boti gu gari ndagu Nyambi, bivunde bi bevegitsi be pagu ne bivunde bi migage mi Moyise ne bivunde bi dibundu beruge ve mbeke Yesu, 2 bemwivule re: «Dwambili: Nye sekuvege dinyange diguvage mambu mane?» 3 Yesu negubagule re: «Menu gwami nyanwivuli ngoku yiyi, 4 nyambili anu, nye sevege San dinyange di batise batu gu mambe, Nyambi vo batu?» 5 Bambilange yawu ne yawu re: «Pasi dwagwagule re: “Nyambi asemurume”, agudwambile re: “Agye nusasingile me San asenwambile?” 6 Pasi dwagwagule gwandi re: “Batu besemurume”, batu babe begudutinde mebume nonge dukufu. Mbare bayabi re San ayibange mubigitsi.» 7 Bagule re: «Dusayabi gere Nyambi vo mutu wuvege San dinyange.» 8 Yesu negubambile re: «Menu gwami nzagunwambile mutu wusepege dinyange.»

Kugu yi bedyanzitsi babi

9 Yesu negukunde verile bumongu kugu yiyi: «Mutu avare gyambe gi mfuge yaburi milunde myanengure vini, negugisise ne bedyanzitsi, ayende gu muvevilu gitsingu. 10 Gigumbi gi gudoke milunde neguruge, arume mudyanzitsi andi gu bedyanzitsi be gyambe nonge bekumutindile dyandi dikabu di milunde. Tumbe bedyanzitsi be gyambe bemudimbe, bemugabuse mekake ne mekake. 11 Fumu gyambe akunderume mudyanzitsi wumosi. Bedyanzitsi be gyambe bemugange gwandi, bemudimbe, bemusyenge, bemugabuse mekake ne mekake. 12 Akunderume mudyanzitsi wu mureru. Bedyanzitsi be gyambe bemutsungule, bemusanze. 13 Fumu gyambe negukwekwambile re: “A niva tsye? Nigurume mwane ami murime. Mandi begumugobise.” 14 Tumbe bedyanzitsi be gyambe negumwene, bambile yawu ne yawu re: “Wuwu re givinge gi fumu gyambe. Dumuboki anu, nonge gyambe gikube gyetu.” 15 Bedyanzitsi be gyambe bemubege tage ne gyambe, bemuboke.

Fumu gyambe aguvage tsye ve agurugile? 16 Aguseboke bedyanzitsi be gyambe, aguse vege gyambe gine bedyanzitsi benzusu.» Batu negulu nane, bambile re: «Disagube nane.» 17 Tumbe Yesu negubegengise, negubambile re: «Nyambili anu disumu di musamu wuberende mu musamu Nyambi, wagwambili re:
“Dimani dibume batu barungi, dyakaluge dimani dyadyotsi ndagu. ^{▼▼Gisangumu gi nimbu 118:22}”

18 Mutu wotsu wuberuge ve yulu dimani dine, agutsunguge. Wotsu wugubiku ne dimani dine, aguniguge.»

19 Bivunde bi bevegitsi be pagu ne bivunde bi migage mi Moyise bekebange gugange Yesu gigumbi gine. Mbare beyabange ayambile mambu mane dibandu yawu. Tumbe bekubange ne wome bu mongu.

Lepu yivegu Kanangu Sesare

20 Bivunde bi migage mi Moyise begengilange Yesu dikengi, re dibandu berumine bivyangi gwegulu me yandi gwambile, nonge gere asegwambile mambu mabi, bekemubege gwemusake gu bivunde bi migage negu ngowu. 21 Batu bane bemwivule ngoku yiyi: «Mulonzi, dwayabi re motsu me wagwambili negunenze me sungeme. Wusagengisi ginengu gi mutu. Tumbe wanenzi mambu me Nyambi agarondi re batu bevagi.» 22 Dwambili: «Mugage etu waduvegi dinyange diguvege lepu gu Sesare?» 23 Tumbe Yesu neguyabe dyele dyawu, abagule re: 24 «Tigitsi anu fure mwange. Ginengu gi mu fure yiyi ne dine bi nye?» Bagule: «Bi Sesare.» 25 Vane abambile: «Gabusilanu Sesare bivave bi Sesare. Bi Nyambi, veganu Nyambi.» 26 Mu gyambitsi gi Yesu ve wusu bumongu, beseyulu dyambu dibi dibe benze mufurigile. Tumbe bekumame gyambitsi gyandi, bekutsibige minu.

Ngoku yi gurambuge gu dufu

27 Batu be dibundu di Saduse besesingange re batu begafu bakurambuge bekwivule Yesu ngoku re: 28 «Mulonzi, Moyise aduvege mugage wagwambili re: “Pasi mutu wonge, amafu asabure bane ne mugetu andi, mwane taye andi agonge mukwili nonge akumuvege givinge.” 29 Tumbe, gube gifumbe gi bane be taye bane gubereru. Wurege wonge mugetu, afu asesise mwane. 30 Wumubeyi ayonge mukwili. Yandi gwandi afu asebure bane ne mugetu wune. 31 Wumureru gwandi ayonge mukwili asebure bane nandi. Yawu botsu bane gubereru bonge mugetu wune, bafu besebure bane nandi. 32 Vane mugetu gwandi ne gufu. 33 Wisi wu batu bafu begurambugile gu dufu, a mugetu wune wugube wu nye? Mbare bane be taye botsu ba bane gubereru bemwonge.» 34 Yesu negubagule re: «Batu be bulongu bubu bagongeni. 35 Tumbe, bebagele ne begetu be sugeme, be Nyambi agurambuse gu dufu begube ne monyu yi peke ne peke besakundegongene. 36 Besakunde gufu, mbare begube munongumosi ne yanze tsi Nyambi. Beke bane be Nyambi, mbare besegandi gu dufu beke gu monyu yi peke ne peke. 37 Moyise agagwambili re batu bafu begurambuge. Gu musamu wagwambili dyambu di ningi yaluli yisasyelegeni, Moyise aganengi Fumu: “Nyambi yi Abrame. Nyambi yi Isake. Nyambi yi Sakobe. ^{▼▼Exode 3:2,6}”» 38 Yesu negukunde re: «Nyambi ayi Nyambi yi batu be monyu. Sa Nyambi yi batu bafu. Mbare batu botsu bandi bemonyu.» 39 Bivunde bi migage mi Moyise bemosi bambile re: «Wusegwambile dikengi, Mulonzi.» 40 Mbare besekunde rungule mwivule ngoku tsi nzusu.

Davide ne Yesu

41 Yesu negwambile yawu botsu re: «A gye bagwambili re, Mutu Nyambi arume Kriste Mugobutsi ayi ve gitsapele gi kanangu Davide?» 42 Mbare Davide yandi beni agagwambili mu gisangumu gi nimbu re:
«Fumu Nyambi ayambile Fumu ami Kriste re: Ruge gusetsagene ve mebagele mami. 43 Nigusunze batu bakuvini gutsye byeru byagu ^{▼▼Psaume 110.1}.»

44 «Gere Davide gamunengili re Fumu. Mutu Nyambi rume, Kriste benze kugubile gitsapele gi Davide tsye?»

Nuyabe ne Bivunde bi migage

45 Ve bumongu bwotsu bemulilungu, Yesu akwambile bebingitsi bandi re: 46 «Bandekenanu bivunde bi migage, bene mugangu guvevilange ne bilinge biboti binege, bi mindumbe, barondi vegungu mbulu tsi bundumbe ve piti batu, basali gutsagene ka mubipu birege bi bundumbe gu gari ndagu ndembu, ne mbure tsi bundumbe ve gilambu. 47 Badumbi bekwili bivave byotsu binawu, vane bavagi ndembu tsi nege nonge bekulabene. Batu beboti, begukengisu veveni.»