Luk 21 | SwjSC | STEP | Yesu negunangule misu gu yulu alabange bikiti biverange pagu mu byevi gu ndagu Nyambi.

Luke 21

Pagu yi mukwili gigaye

1 Yesu negunangule misu gu yulu alabange bikiti biverange pagu mu byevi ^{▼▼Gumbu be Sife gubange digumi di birini bi miri ne mireru mibange ne pugulu tsiverilange yawu doli} gu ndagu Nyambi. 2 Alabe gwandi mukwili gigaye avere fure beye tsisane musumbu. 3 Yesu negwambile re: «Ngenze nyanwambili mukwili wuwu wu gigaye asevere vyagunu ne yawu botsu. 4 Mbare yawu botsu besevere mu byevi doli tsise vyogililange tsisabe nawu ne musumbu. Tumbe yandi asevere tsyotsu tsi tsibange nandi gu gudenge monyu.»

Tsangu yi gupanze ndagu Nyambi

5 Batu bemosi bambilange gukyelu ndagu Nyambi benyungilange memani meboti ne birungu bibevege Nyambi gugukembise ndagu Nyambi. Tumbe Yesu negwambile re: 6 «Guguruge gigumbi gi byotsu bi nwagengisi nwanyungili bigupanzu memani motsu meguniguge.»

Ndimbu tsyarigitsi disukisilu di bulongu

7 Bemwivule re: «Mulonzi, a motsu mane meguruge gigumbi gye? A ndimbu yi gube gye yi duguyabile re megulabene?» 8 Yesu negubagule re: «Nubandekene nuyatsimbisu. Mbare mbili batu beguruge mu dine dyami begusegwambilange re: “Menu Kriste Mwobutsi” ne “Gigumbi gyaruge.” Nuyabebinge. 9 Ve nugulilu tsangu tsi ngube ve batu begurangile, nuyadume. Mbare nonge re motsu mane me guregile guruge. Tumbe sagube disuke di bulongu nekyawu.» 10 Akundebambile re: «Batu be melongu memosi begubokene ne melongu mefimbe. Bulongu bune kanangu bugudimbene ne kanangu yifimbe. 11 Butambe buguregeme veveni mu mbili mbure, gugube bivunge ne mindale. Dugulabe bimage bineni byavegi wome gu nzambi ndimbu tsisamelabene ne mbetsi. 12 Tumbe nesi mambu motsu mane megulabene dyambu direge begunugange, begunukwane, begunusake mu mekake me bivunde bi migage gwetabule bumbanze gu ndagu tsi ndembu. Begunuvere gu nzugu gukyelu dine dyami, begunubege ve wusu kanangu ne ngowu. 13 Mambu mane megunurugile nonge nukube mbeye tsyami. 14 Nuyabe ne pikile tsigukebe dyele digukwe gobule. 15 Mbare nigunuvege gyambitsi gi ginami batu banuvini besagubuse. 16 Nugusaku nesi ne be taye tsyenu, ne nguyi, ne bane be taye tsyenu, ne biburu byenu, ne mbatsi tsyenu. Nuguboku mbili ve garyenu. 17 Nuguvinu ne batu botsu gukyelu dine dyami. 18 Tumbe nesi dunange dumosi du murwagu dusagutsyemuge. 19 Gikanene gyenu gi gunuvege monyu.»

Yesu gagwambili re Serusaleme gupanzige

20 Ve nugulabile Serusaleme gutsyengu ne gori, yabanu re digwere digupanzile Serusaleme dyaruge. 21 Vane begube gu Sudé berini gu mikongu, begube gu gari yadi Serusaleme bevudugi, begube gu byambe beyagwingene gu yadi. 22 Mbare gugube mewisi me gugabuse nyongu mbare motsu me rendu megulabene. 23 Milogu gu begetu begube ne mimi ne begetu begunwisange mewisi mane, mbare gugube nzuki neni gu bulongu bune. Nyambi agutibile batu bane kabu. 24 Beguboku ne dibambu, begubegu gu buvige mu melongu motsu. Batu besa Sife begutsarile Serusaleme kwange ve gigumbi gyawu giguvilu.

Tugu yi Mwane Mutu

25 Gugube ndimbu gu dyumbi, gu tsungi ne gu mbwelile. Mu mutambe melongu megube ne medume duvogusu du mungibe nzube dugubevege wome. 26 Batu begufu ne wome ve gupikilange yawu mambu me guruge mu butambe, ndure tsi nzambi tsi guregeme. 27 Vane begulabe Mwane mutu guruge atsyengu ne dimungi abase ne ngudu ne didume ^{▼▼Labanu Daniel 7:13-14}. 28 Ve mambu motsu mane megupakile guruge, simbuganu, nangulanu miru, mbare dukebeli negobulu.

Kugu yetsigu ne muri wanengure figyé

29 Vane Yesu negubeverile kugu: «Gengilanu muri wanengure figyé ne miri minzusu. 30 Ve nugulabile megaye mawu gupakile gufule nuguyabe re dimfule dikebeli. 31 Munongumosi ve nugulabile mambu mame guruge yabanu re gigumbi gikebeli gi Nyambi agure gusebegise batu bandi. 32 Nyanwambili ngenze, batu belabe mambu mane besagutsyemuge yawu botsu nesi mambu motsu mane meguruge. 33 Nzambi ne butambe begutsyemuge tumbe mambu motsu menzegwambile mesagutsyemuge.»

Diboti di gulubuge

34 «Bandekenanu nuyavyose monyenu mu meyaye, ne budyongi, ne pikile tsi monyu mbare wisi wune wugunusutisu gere mbuse. 35 Mbare wugudimbegene mu botsu bemu mutambe. 36 Tumbe lubuganu, lembanu gigumbi gyotsu nonge nukudenge ngudu yigobuge mu mambu motsu me guruge nukube meteli ve wusu Mwane mutu.»

Mewisi me disukisilu me Yesu gu ndagu Nyambi

37 Yesu avyosa wisi gu ndagu Nyambi negunenzange. Avudugange gwevyose dibeti gu mukongu wu miri myanengure Olivi. 38 Bumongu bwotsu burugange mekyele meneni gu ndagu Nyambi gusemulilu.