Luk 22 | SwjSC | STEP | Mumengu wu pembi tsisarandi, wanengu re «Pake» mbere wukebeli.

Luke 22

Suda kasaki Yesu gumbu bivunde bi migage

1 Mumengu wu pembi tsisarandi, wanengu re «Pake» mbere wukebeli. 2 Bivunde bi bevegitsi be pagu, bivunde bi migage mi Moyise bekebange dyele di guboke Yesu. Tumbe bedumange bumongu. 3 Gigumbi gine, Sate akwingene gu murime Suda Iskaryote mubingitsi wumosi wu Yesu, akumuvege pikile tsibi. 4 Suda negwende gwegulusenu ne bivunde bi bevegitsi be pagu, ne bivunde bi bandekenange ndagu Nyambi neve begusakile Yesu. 5 Bekube ne mune mugangu, bemuvangemine re begumuvege doli. 6 Suda negusinge, akukebange dyele, ne gigumbi giboti gi agusakile Yesu gutsweminine bumongu.

Yesu kalambisi biguye bi mumengu Pake

7 Gigumbi gi mumengu wu pembi tsisarandi negukike, wugutabule tabe ngori yibeguye ve mumengu Pake. 8 Yesu negurume Pyere ne San negubambile re: «Yendanu gwetsonzige neve dugulambile gilambu gi mumengu Pake.» 9 Pyere ne San bemwivule re: «Warondi re dweyilambile gu?» 10 Yesu negubagule re: «Yulu anu, ve nuguvudugile gu yadi, nugubengune ne mutu wunangule putise mambe. Mubingi anu kwange negu ndagu yi yandi agwingene. 11 Yambilanu mungwe ndagu re: “Mulonzi agakwivuli mbure yi yandi aguse guyile mumengu Pake ne bebingitsi bandi.” 12 Agunurigitse gu yulu girini gipambuge gine bivave byotsu gu gari aregune nugulambile mulambu Pake.» 13 Negwende, beragusenu byotsu kaneve Yesu bambilile. Belambe mulambu Pake.

Gilambu gi Fumu

14 Gigumbi gi guye negukike, atsambe ve tavuli ne bilumbi. 15 Negubambile re: «Nine mugangu wuneni wu guye gilambu gi mumengu Pake mbure mosi nenu nesi nigukenge. 16 Mbare, nyanwambile re nzakunde guye mulambu, kwange gigumbi gi Nyambi agurigitsile disumu di mumengu Pake, gu bulongu bu Nyambi.» 17 Negubonge dimogi, negugabusile Nyambi diboti. Ayambile re: «Bonganu dimogi didi nwanganu yenu botsu. 18 Mbare nyanwambili vave nzakundegunu melamu me milunde mi vigne, kwange ve bulongu bu Nyambi bugurugile.» 19 Sige abonge pembi, agabusile Nyambi diboti. Ayitabule, abegabile. Negwambile re: «Dudu dunyuru dwami du nyasaki gukyelu enu. Gabenanu nukutangeminange gigumbi gyotsu.» 20 Negubonge gwandi dimogi, negumane guye abevege dyoni. Negwambile re: «Melamu mame mabagenu ne pangeni yone yi melungu mami medeke gukyelu enu.» 21 Tumbe labanu, mutu wugunzake ayi ve tavuli mbure mosi nami. 22 Negungenze, Mwane mutu agufu neve Nyambi yandi beni atsonzigile. Tumbe milogu gu mutu wugunzake gu batu babi. 23 Bepakile gwivusene yawu ne yawu nye vegari etu benze vage dyambu dine.

Givunde nye vegari etu?

24 Digumi ne bebeyi be bebingitsi be Yesu, bekusosange yawu ne yawu nonge bekuyabe mutu wu givunde ve gari awu. 25 Yesu negwambile re: «Kanangu tsi bulongu tsyadyamisi batu babegobisi, banengure “Bevagitsi be meboti.” 26 Tumbe yenu, nuyavage ne yawu. Givunde vegari enu, ayibi munongumosi ne mugegi. Gidyeti vegari enu, ayibi munongumosi ne mutu wadyanzili bembatsi. 27 A wugaye ve tavuli ne watsambi tavuli givunde nye? Sa wugaye ve tavuli mba? Tumbe menu nzane batu bane, nivegari enu munongumosi ne mutu wanudyanzili. 28 Yenu, nusanzise. Nusenzindile ve nzibile mu meguge. 29 Redibandu, nyanuvegi dinyange digubegise batu, neve tayi ami apege dinyange digubegise batu. 30 Nuguye, nugunu mbure mosi ve tavuli ami yi bulongu bu ami ve nigubile Kanangu. Vane, nugube metsagene ve gipu gi bundumbe gu gutabule bumbanze bu digumi di bifumbe ne bifumbe bibeye bi bane be Iserayele.»

Yesu yambili Pyere re wugukale

31 Fumu Yesu negwambile Simu re: «Simu, wubandekene. Sate segwivule gubembe mirime myenu nonge gitu gyenu gikupupe. 32 Tumbe nzelembe Nyambi gukyelu agu, nonge gitu gyagu gukyelu ami gikoletsyemuge. Ndyayu gigumbi giwugukunde pagile gitu, yamuse bane betaye tsyagu.» 33 Pyere negumwambile re: «Fumu, nikike gugwende nagu gu nzugu, nesi gu dufu.» 34 Yesu negumwambile re: «Pyere, nyakwambili nemuni, nesi koku yirege yigwambile wugukale nyongu yireru re wusandyabi.»

Gusindile dikwanu

35 Yesu negukunde gwambile be bingitsi bandi re: «Ve ninurumine nusabe ne doli, nusabe ne pengi, nusabe ne pondu, nukambilu ne givave?» Bemwagule re «Vyage.» 36 Vane akunde bambile re: «Tumbe vave, mutu wune doli abongi. Wune pengi ayibongi. Wusa ne mbetsi dibambu, asumbisi ngoye andi kutu nonge akusumbe dibambu. 37 Nyanwambili nane, nonge dyambu direndu mu gisangumu gi Nyambi gukyelu ami digulabene: “Nirangu mu dibundu di batu babi.”» Kabe motsu merendu gukyelu ami megulabene. 38 Bemwambile re: «Fumu, labe dune mebambu mebeye netu.» Yesu bagule re: «Revotsu.»

Yesu galembi gu mukongu miri mi Olivi

39 Neve avagilange ne mbetsi, Yesu avuduge, ayende gu mukongu wu miri myanengure Olivi. Bebingitsi bandi bemubinge. 40 Neguvuduge gu mbure yine, abambile re: «Lembanu nonge ve Sate gunumangile mirime nutsatse beruge.» 41 Vane, negurageme mwepesu nawu, akuteme, alembange. 42 Ayambilange re: «Fumu, gere warondi, ragemise nami dimogi didi dimeguge.» Nesi nane nyakwivuli, diyabe di menu nyarondi tumbe di ndyabeni warondi. 43 Vane yanze yi Nyambi negumurugile guse mudyotse. 44 Negugangu ne busane, Yesu akulembange veveni. Meberi me gidwuku gyandi mekubange munongumosi ne meberi me melungu, mekudekange vetsi. 45 Negumane lembe, arambuge ayende gu bebingitsi bandi aberagesenu bebyelu ne busane. 46 Negubambile re: «Gye nwaningilili? Rambuganu, lembanu nonge mirime myenu mitsatse bembu ne Sate.»

Yesu magangu

47 Yesu mbere kyagwambili ne be bingitsi bandi. Suda mubingitsi wumosi wu Yesu aruge ne dibundu di batu, abambeme nandi gu gumugumberene. 48 Yesu negumwambile re: «Suda ve wakumbereni vane, reve wasakili Mwane mutu?» 49 Bebingitsi be Yesu negulabe neve dyambu dine diguvyogile, bemwivule re: «Fumu dubenze dimbe batu babe ne mebambu metu?» 50 Mubingitsi wumosi wu Yesu, atabule diru di mebagele di mudyanzitsi wu givunde gi muvegitsi pagu. 51 Tumbe Yesu negwambile re: «Sisanu revotsu, negubembe diru disetabulu adibeluse.» 52 Yesu negukunde gwambile bivunde bi bevegitsi be pagu, bivunde bya bandekeni ndagu Nyambi ne bivunde bimosi biruge gusemugange re: «Agye nwarugili ne mebambu, ne pengu gusekange mambu gere gikongu?» 53 Wisi wotsu nzibange nenu gu gari ndagu Nyambi nusakangange. Tumbe digwere didi dyenu di ndure diviseme.

Pyere magale Yesu

54 Bivunde bibandekenange ndagu Nyambi negumane gange Yesu, bemubege gu gari ndagu givunde gi muvegitsi pagu. Pyere akubingange Yesu dutsyesi ne dungowu. 55 Bebangise ruvi ve kane betsagene, Pyere atsagene nawu ve mbeke ruvi. 56 Mudyanzitsi mugetu wu bivunde bi bevegitsi be pagu negumwene ve mbeke ruvi negumugengile dikengi. Negumwambile re: «Mutu wuwu gwandi atsibe nandi.» 57 Tumbe Pyere negugale. Negwambile re: «Mugetu, nzamuyabi.» 58 Gigumbi kwe mutu mosi gwandi negumwene, amwambile re: «Ndyawu gwandi wu mutu Yesu.» Ayagule re: «Mutu, vyage nzamutu andi.» 59 Digwere dimosi neguvyoge, mutu wunzusu negutsigise re: «Mutu wuwu atsibe ne Yesu mba yandi gwandi mwisi Galilé.» 60 Tumbe Pyere negugale re: «Mutu, nzayabi di ndyayu warondi gwambile.» Vane ne vane ve yandi yambilange koku negwambile. 61 Fumu negugeluge, negugengise Pyere, vane ne vane Pyere negurangemine dyambu dimwambile Fumu re: «Nemuni nesi koku yirege yigwambile, wugukale nyongu yireru re wusandyabi.» 62 Pyere neguvuduge alile veveni.

Yesu masyengu ne gudimbu

63 Batu bebandekenage Yesu bekumusyevange bekumudimbange. 64 Bemukubige ginengu, bemwivule re: «Rese, nye sekudimbe?» 65 Bekumwambilange mbili mambu megumusyenge.

Yesu vewusu Bivunde bi dibundu

66 Wisi negutsamuge, dibundu di bivunde bi Sife, bivunde bi bevegitsi be pagu ne bivunde bi migage mi Moyise be bengune. Bebege Yesu vewusu bivunde bi dibundu dyatabuli misosu. 67 Bemwivule re: «Ndyayu re Kriste yi Nyambi rume? Dwambili.» Yesu negubagule re: «Nesi nzenwambile nusagusinge, 68 pasi nzenwivule ngoku, nusagunyagule. 69 Tumbe ne kyawu tsitsi Mwane mutu agube metsagene ve mebagele me Nyambi yine ndure. ^{▼▼Labanu mu Psaumes 110:1}» 70 Batu botsu bambile re: «Kabe ndyayu wu mwane Nyambi?» Abagule re: «Yenu beni nwamane gwambile ni mwane Nyambi.» 71 Vane bambile re: «Dusegandi ne mugangu mbeyi, yetu beni dwagulu mambu me yandi beni segwambile.»