Luk 23 | SwjSC | STEP | Dibundu dyotsu dirambuge bebege Yesu vewusu Pilate.

Luke 23

Yesu ve wusu Pilate

1 Dibundu dyotsu dirambuge bebege Yesu vewusu Pilate. 2 Vane, befuriligange Yesu bambilange re: «Dwaragesenu mutu wuwu agabakigi batu betu nonge bekole nulilu. Agabusi re batu bevegi lepu gu Sesare. Akukuvagange re yandi re Kriste, kanangu.» 3 Pilate negumwivule: «Ndyawu re kanangu yi Sife?» Yesu negumwagule re: «Ndyabeni re wusedyambile.» 4 Pilate akwambile bivunde bi bevegitsi be pagu ne bumongu: «Nzalabi mbele yi mutu wuwu.» 5 Tumbe batu bane bekukugwambilange ne ngudu: «Agasibigi dibundu neginenzitsi gyandi bekole kugobise pakile gu Galilé bulongu bwotsu bu Sife kwangene gu Sudé, amaruge kwangene gugu.»

Yesu ve wusu Erode

6 Ve Pilate ayulilu mambu mane, akwivule gere mutu wune ayi mwisi Galilé? 7 Bekumwagule re Yesu ayi mwisi Galilé. Erode Antipas ayi mundumbe wu musyengi wune ne yandi gwandi ayibe gu Serusaleme gigumbi gine. Vane, Pilate negutinde Yesu gu Erode. 8 Ve Erode labile Yesu, akulu mugangu. Mbere amagulu tsangu tsyandi, arondange mwene mbetsi. Ayanbange re aguvage mwegilimbe. 9 Akumwivulange mbili ngoku, tumbe Yesu asemwagulange. 10 Bivunde bi bevegitsi be pagu ne bivunde bi migage mi Moyise babe vane, bekumusyembange ne ngudu tsyotsu. 11 Erode ne gori tsyandi bekumusyengange ne gumudokange, bekumuvege gidwaru gi bundumbe ne gumugabuse gu Pilate. 12 Erode ne Pilate beseyulusenungu, mwisi wune bekube mbatsi.

Yesu kabegu gweboku

13 Pilate akurombe bivunde bi bevegitsi be pagu, ne bene menyange ne bisi dibundu. 14 Akubambile re: «Nusembegile mutu wuwu mbare agabegi batu betu bekole gobise. La ve wusu enu nzemwivule nzalabe dyambu dibi diyandi gwendile gu nzugu. Nzalabi mambu menwamufurigili. 15 Ne Erode gwandi asalabe mambu megumuverile gu nzugu mba amamugabuse gu mbu gyetu. Gusala dyambu diyandi asevage di agubokilu. 16 Dibandu adimbu migebi, akugabusu.» [ 17 Ve mumengu wotsu wu Pake, Pilate ayobulange mutu wu gu nzugu ^{▼▼Girini gigi gisirendu bisangumu bi gulu bi Gereke}.] 18 Tumbe bekwamugange yawu botsu: «Bokise mutu wune. Dwobulile Barabase.» 19 Barabase averu gu nzugu mbare abe ne batu be yadi yine besegobisange migage, yandi gwandi aboke mutu. 20 Pilate arondange gobule Yesu, akukubambile. 21 Tumbe batu bane bekwamugange: «Mugomini anu mu kurusu, mugomini anu mu kurusu.» 22 Pilate akukubambile dimu reru: «A dibi gye asevage? Nzalabe dibi diyandi agubokililu. Nigumudimbise, nikumusise.» 23 Tumbe bekukunde gwamugange veveni re Yesu agominu mu kurusu. Myamu myawu re mikudile. 24 Pilate akusinge meyawu berombange. 25 Ayobule mutu yawu berondange, awu veru gu nzugu mbare ayibe mugilonge gi batu be yadi besegobisange migage, yandi gwandi aboke mutu. Pilate besake Yesu bekuvage me yawu berondange.

Yesu agominu mu kurusu

26 Ve bebegilange Yesu, bekubengune ne Simu mutu wu Sirene arugilange gu byambe. Gori bemugange, bemubakige nonge akunangule kurusu akubingange Yesu gu nzime. 27 Mbili batu be dibundu bemubingange ne begetu bekulilange, bekumamange gukyelu andi. 28 Yesu negugeluge gu yawu, negubambile re: «Begetu be Serusaleme, nuyalile gukyelu ami, lilanu gukyelu yenu beni ne bane benu. 29 Mbare mewisi marugi ve begunwambile re: “Diboti gukyelu begetu bebingume, besebetsibure, besanwisi.” 30 Vane batu begwambilange mikongu re: “Bonduganu mu yetu,” mikongu migegi “Midukubigi.” 31 Mbare gere bavanane gu gikoge gimonyu, a gikoge gwimuge giguvagu tsye?» 32 Bebege gwandi batu bebeyi, bikongu, nonge bekuboku konge ne Yesu. 33 Neguvuduge gu mbure yanengure givenzi, gori begomine Yesu mu kurusu, begomine gwandi bikongu bine mu kurusu, wumosi gu mebagele mandi wumosi gu megetu mandi. 34 Yesu akwambile re: «Taye, benyesi, mba besayabi mambu mebavagi.» Begabene bivave bibange nandi bekuvage gingane giguyabe mutu wugubivegu. 35 Batu be dibundu babange vane bekugengilange. Bivunde bi Sife bekumudokange, bekwambilange re: «Asegobule batu bemosi akwegobuli yandi beni. Gere ayi Kriste Mugobutsi wu Nyambi asale.» 36 Gori gwandi bemudokange bebambeme nandi bemuvege melamu mengani. 37 Bemwambile re: «Gere ndyayu wu kanangu yi Sife, kwegobuli ndyabeni.» 38 Vabe timbi ve yulu andi yirendu: «Awuwu kanangu yi Sife.» 39 Gikongu gimosi gigominu amusyengange, akumwambilange: «Ndyayu wusa Kriste Mugobutsi? Kwegobuli ndyabeni, ne yetu gwandi wukudwobule.» 40 Tumbe wumosi akwanunange, negwambile re: «Ndyayu wusadumi Nyambi, wuyagwambile nane ndya gwandi wugominu. 41 Yetu nesi dusegominu dusevage mabi. Tumbe wuwu asavage dibi.» 42 Vane akunde gwambile re: «Yesu wuyandibegene ve ndyayu wugurugile ne kanangu.» 43 Yesu negumwagule re: «Nyakwambili negungenze, nemuni wugube nami gu bulongu buboti bu Nyambi.»

Dufu du Yesu

44 Gigumbi gi dyumbi gabili ve yulu muru, nyangu neguvodeme, diviseme negusunde mu bulongu bwotsu kwangene megwere mereru me tsisige. 45 Tsande yibe yileligu ve dingeninu di mune ndagu yi rereri yi ndagu Nyambi yipasige vegari. 46 Yesu akwamuge: «Taye, nyakugangisi dinyuni dyami mume kake magu.» Negumane gwambile nane, negufu. 47 Givunde gi gori yi Rome negulabe mambu mane. Akudumise dine di Nyambi, negwambile re: «Dingenze mutu wuwu atsibe asungeme.» 48 Batu botsu beruge guselabe mambu mane. Bekugabuge ne mune busane. 49 Mbatsi tsyotsu tsi Yesu ne begetu bendange nandi pakile gu Galilé, babange gu tage negugengisange motsu me vyogange.

Yesu amaveru gu ngili

50 – 51 Gubange mutu wanengure Sosefe, mwisi yadi Sudé Arimate. Mutu wune ayibe mutu boti wusungeme, avingilange re bulongu bu Nyambi burugi. Ayibange givunde gimosi gi dibundu. Aseronde nevu bembatsi betsonzigile neguvage. 52 Akwende gweragene Pilate, negumwivule gibindi gi Yesu. 53 Vane, negusule gibindi mu kurusu, negugipyete ne muvelu fwaru, negugisunze gu gari pesi yibuku gu dimani, mbe yisebetsiveru gibindi. 54 Tsisige yatsonzigilu bivave mba wisi gukole wapakile. 55 Begetu bendange ne Yesu pakile Galilé bekuruge ne Sosefe, begengise pesi belabe nevu gibindi gi Yesu gibe gisunzu. 56 Vane, bekugabuge gu yadi bekinze matsi ne miyombu migwesinge gibindi. Wisi gukole, besadyanzi, nevu mugage wagwambili.