Luke 24

Yesu marambuge gu dufu

1Mekyele meneni me wisi rege tsonu, begetu bende gu pesi bebege matsi mene tsulu boti me yawu bekinze. 2Neguvuduge, beragesenu dimani diroge ditsibigange ngili dyasibigu tage. 3Begetu negwingene, tumbe beseragesenu gibindi gi Fumu Yesu gu gari ngili. 4Besekunde yabange dyambu ne pundu, pikile gutsyemuge. Vane, revarugile batu bebeyi beruge tsutsudu babe ne bedware bidwaru byavedemi. 5Begetu negugangu ne wome, betsokeme mbami vetsi. Tumbe batu bane bebambile re: «Agye nwakebili vegari batu bafu mutu wumonyu?» 6Yesu asegavave, amarambuge gudufu. Rangeminanu dyambu diyandi nwambile veyibange mbure mosi nenu gu Galilé. 7Anwambile re nonge Mwane mutu asaku mu mekake me batu babi, agominu mu kurusu, wisi mureru agurambuge gu dufu. 8Vane, begetu berangemine mambu me Yesu bambilange. 9Busuge gu pesi, bende gu dimbu gwegwambile motsu mesevyoge gu digumi di bebingitsi ne mubingitsi wumosi wu Yesu ne batu benzusu. 10Begetu bende gu ngili, gube Mari yi Magedala, Sane, Mari nguye Sake, ne begetu benzusu yawu botsu bambile mambu motsu mane gu bilumbi bi Yesu. 11Tumbe bebegitsi be musamu Nyambi bepikilange re mambu me begetu be bambilange mambu megufure besemesinge. 12Tumbe Pyere negurambuge, negwende mbangu gu pesi. Neguvuduge, abandeme negulabe gu ngili ka birendi bi tsande tsi lenge. Agabuge gumbu gyandi negumamange dyambu disevyoge.

Munzile Emayise

13Wusye wamosi, bebingitsi be Yesu bebeyi ve gari awu bendange gu dimbu dyanengure Emayise dibange gu megwere me beye me kole me mwendu ne Serusaleme. 14Ve bendilange, bambilange motsu mesevyoge. 15Ve bambilange, negusosange, Yesu yandi beni abambeme nawu, bendange konge. 16Bemwenange, tumbe gube givave gi betsibigange misu nonge betsatse muyabe. 17Yesu negubivule re: «A dyambu gye dinwagwene sosile munzile? Besikeme ne nyuru tsidede.» 18Wumosi vegari awu wanengure Klopas amwagule re: «Ndyayu wu gwaguvike watsageni gu Serusaleme wusayabi dyambu disevyoge ne tsufu tsitsi?» 19Yesu negukunde bivule re: «Dyambu gye?» Bemwambile re: «Disevyoge gukyelu Yesu yi Nasarete, yitsibange mubigitsi wune ndure gu mambu motsu me yandi se dyanzange ne me yandi segwambilange, ve wusu Nyambi ne ve wusu batu. 20Neve bivunde byetu bi bevegitsi be pagu ne bivunde bimosi besemusakile, nonge bekumugomine mu kurusu akufu. 21Dutsibange ne gitu re yandi reguse gobule Iserayele. Tumbe mambu motsu mane mevyogile guke tsufu yireru. 22Negungeze, tumbe dusemame nesi nane be begetu be dibundu dyetu. Besegwende mekyele meneni gu pesi. 23Besaragesenu gibindi gi Yesu gu gari ngili beruge gusedubegile tsangu re byanze bibeyi biseberugile bebambile re Yesu ayi monyu. 24Be batu be gilonge gyetu, besegwende gu pesi beragesenu motsu kanevu begetu besebambilile. Tumbe beselabe gibindi.» 25Vane, Yesu negubambile re: «Yenu nusagulu nusasingi mu mirime myenu di bebigitsi banwambili. 26Disenonge re Kriste akengi nane nesi agwingene gu bundumbe bwandi?» 27Vane, abambile dikengi motsu mambilu gukyelu Kriste mu bisangumu byotsu bi Nyambi pakile ve gisangumu gi Moyise kwange ne bisangumu bi bebigitsi. 28Ve bevudugile ve kodu gitsagu gi dimbu dibendange, Yesu akuvage gere mutu wagwendi tage. 29Tumbe bemusimbe, bemwambile re: «Sikeme bange netu vave wisi kagwidi.» Ayingene gu ndagu, atsagene nawu. 30Negutsambe ve tavuli nawu, abonge pembi, agabusile Nyambi diboti, ayitabule abegabile. 31Vane, misu mawu metsibuge, beyabe re Yesu ayinawu. Tumbe yandi atsyemuge ve misu mawu. 32Yawu ne yawu bambesenange re: «Ve Yesu dunenzilange musamu Nyambi mu nzile duseyulu gere ruvi dwaluli gu mirime myetu?»

33Vane ne vane berambuge, begabuge gu Serusaleme. Beragesenu digumi di bebingitsi ne mubingitsi wumosi, besobegene ne bebingitsi benzusu. 34Bambilange re: «Negungenze Fumu marambuge gu dufu. Simu asemwene.» 35Vane, bebingitsi babeyi yawu beni bambile motsu mevyoge mu nzile, neve beyabile Yesu gigumbi gi atabulile pembi.

Yesu kakwerigitsi ve wusu bebingitsi bandi

36Mbere bekyagwambili, Yesu yandi beni neguruge ve gari awu negubambile re: «Pembi ne polu yibi nenu.» 37Yawu botsu begangu ne mune wome, beregemange mbare beyabange re balabe ditengu. 38Tumbe Yesu negubambile re: «Gye nwaregemini? Gye nune page gu mirime myenu? 39Gengisanu mekake mami ne byeru byami. Negungenze menu mbembi anu. Labanu dinyuni asane misoni, asane bivisi, neve nwanyenini. Menu, nine byoni munongu mosi ne yenu.» 40Negubambile nane, aberigitse mekake mandi ne byeru byandi. 41Neve bebingitsi be Yesu babe be base ne mugangu, mbe besebetsi gube ne gitu. Bekumamange, Yesu negubambile re: «Nune mwe givave gi guye vave?» 42Bemuvege girini gi gisonzi gyangu. 43Agibonge akiye ve misu mawu. 44Vane, negubambile re: «Ve nibilange nenu labanu mambu me ninwambilange, motsu me rendu gukyelu ami mu mugage Moyise, mu bisangumu bi bebigitsi ne bisangumu bi nimbu motsu mane nonge melabeni.» 45Vane, abetsibule muru nonge bekulu dikengi motsu merendu mu musamu Nyambi. 46Abambile re: «Labanu, direndu re Kriste Mwobutsi agukenge, agurambuge gu dufu muse mureru. 47Nonge dulonzi gu dine dyandi musamu Nyambi, batu bekukaluse mutsageninu, bitsimbu byawu biku bunzulu. Dugupakile gu Serusaleme kwange ne mu melongu motsu. 48Yenu nu mbeyi tsi mambu motsu mane. 49Menu, nigunutindile di Taye ami anuvangenine. Tumbe yenu banganu gu yadi kwange ve nugubasile ne ndure yi yulu.»

Yesu mapande gu nzambi

50Vane, Yesu abevuduse gu Serusaleme abege bebeli ne Betani. Vane asimbule mekake gu yulu, abeve myule. 51Ve abevegilange mwyule apasuge nawu, apande gu nzambi. 52Tumbe yawu negumane mukutemine gu gumudumise, begabuge gu Serusaleme ne mugangu neni. 53Bevyosange gigumbi gyotsu gu gari ndagu Nyambi negwimbange, ne gugabusilange Nyambi diboti.