Luk 4 | SwjSC | STEP | Yesu negumanu batisu ne San batiste gu mwemambe wu Surdin, akubase ne dinyuni diboti. Dinyuni diboti dine dikumubege gu kumu.

Luke 4

Dumangu du Yesu

1 Yesu negumanu batisu ne San batiste gu mwemambe wu Surdin, akubase ne dinyuni diboti. Dinyuni diboti dine dikumubege gu kumu. 2 Mbeni negumane mange Yesu murime mu megumi mane metsufu nyangu ne dibeti, tsufu tsyotsu tsina asayange kepagere givave tsufu tsine ne guvu, akulu nzale. 3 Sige vane, Mbeni negumwambile re: «Gere negungenze wu mwane Nyambi yambile dimani didi dikalugi biguye nonge wukuye.» 4 Tumbe Yesu negubuse dyufi di Mbeni negumwagule re: «Direndu mu gisangumu gi Nyambi re: “Mutu sadili monyu kane biguye.”»

5 Vane, Mbeni negubege Yesu gu yulu mukongu. Ne gumurigitse ngalu ngalu melongu motsu me butambe. 6 Ne gumwambile re: «Nigukuvege didume ne bundumbe bu melongu motsu mame. Nibenze kuvege byotsu bine mbare byami, nyabivegi mutu wu mebeni nyarondi. 7 Kabe ndyawu, gere wusekutemine, byotsu bibi bigube byagu.» 8 Yesu negumwagule re: «Direndu mu gisangumu gi Nyambi re: “Wugukutemine ka Fumu Nyambi agu. Wukumu dyanzilange yandi vike.”»

9 Mbeni negukubege Yesu gu Serusaleme. Negu musunze gu yulu ndagu Nyambi. Negumwambile re: «Gere negungenze wu mwane Nyambi, kwe kubumi gutsi. 10 Mba direndu mugisangumu gi Nyambi re: “Nyambi aguvege yanze tsyandi dinyange di gukubandekene.” 11 Dikunde rendu re: “Yanze tsi Nyambi tsi gukwake mu mekake mawu, nonge gyeru gyagu gitsatse gurule dimani.”» 12 Yesu negumwagule re: «Dikunde rendu re: “Wuyamange Fumu Nyambi agu.”» 13 Negumane mange Yesu murime, ne mbili bivagitsi, Mbeni negurageme nandi kwangene gigumbi gi Nyambi yandi beni atsonzige.

Yesu mapakile gidyanzu gyandi gu Galilé

14 Yesu negusuge gu ginange gyumuge gi Sudé akugabuge gu Galilé. Dinyuni diboti dikumuvegange ngudu. Didume dyandi diku panzegene mu mimbu motsu ne yadi tsi Galilé. 15 Yesu anenzange gu ndagu ndembu nevu vagilange ne mbetsi. Batu botsu bekumudumisange.

Yesu ganenzi musamu boti gu Nazarete

16 Yesu negugabuge gu Nazareth yadi yi yandi bungugile. Wisi gukole akwingene gu ndagu ndembu nevu gavagile ne mbetsi. Negurambuge, ayende ve wusu batu botsu gwe tangune gisangumu gi Nyambi. 17 Vane mudyanzitsi wu gundagu ndembu ne gumusambule gisangumu gi mubigitsi Esayi. Negugipusule, akusupugile mbure yi yandi ronde gutangune. Negutangune mbure yirendu re:
18 «Dinyuni di Fumu dinami, Nyambi asenzale gugubege musamu boti gu bigayi. Asetinde gusegwambile batu begu nzugu beguvuduge, batu benepafu, misu mawu me gutsibuge begulabe dikengi, batu bakengi begobulu.
19 Nyambi asetinde gusegwambile batu re: Mupume wuwu, mupume wu nugulabile gyese gi Fumu.»

20 Yesu negupiete gisangumu gi Nyambi. Negugisambule mudyanzitsi wu ndagu ndembu, negutsagene. Batu botsu babe gu gari ndagu ndembu bekumugengisange. 21 Vane, Yesu akupakile belonze re: «Nemuni mambu motsu me nusegulu mu musamu Nyambi wu nyarugili negutangune me gulabene.» 22 Batu botsu bekwambesenange yawu ne yawu re: «Mambu mesegwambile Yesu memeboti. Tumbe, sa mwane Sosefe?» 23 Yesu negubambile re: «Mandi nuguperile kugu ya gwambili re: “Ndyayu wabugi batu, kwebugi ndyabeni.” Nugukunde nyambile re: “Dusegulu motsu me wuse vage gu Kapernaum, me dyanzi gwandi vave gu yadi agu.” 24 Yi, negungenze, nyanwambili bureti: Mubigitsi asa singu gu dimbu di yandi burilu. 25 Negungenze nyanwambili bureti: Gu gigumbi gi Elie, gube mbili bekwili gu bulongu bwandi bu Iserayele ve Nyambi avagile re mfule sagunoge gu mipume mireru ne migweli misyamenu. Gukube mundale mu bulongu bwotsu bu Iserayele. 26 Nyambi asetinde Elie nesi gu mukwili mosi wu Iserayele, tumbe amutinde kagu mukwili mugetu wu tsagenange gu Sarepta gu yadi beli ne Sidon 27 Gigumbi gi mubigitsi Elise, gubange gwandi mbili batu babange ne bwatsi gu Iserayele, Nyambi abeluse ka Naaman mwisi Syrie. Tumbe nesi gibedu gimosi gi Iserayele asebeluse.»

28 Ve batu botsu babe gu ndagu ndembu bulilu mambu mambilange Yesu, yawu botsu bekumutibile mune kabu. 29 Yawu botsu berambuge, bebege Yesu ne ngudu kwange gu yulu mukongu gu rungilu dimbu dyawu. Nonge beku mubonduse gu mfudu akufu. 30 Yesu akuvyoge vegaryawu akwene gwende.

Yesu abeluse mutu wube ne dinyuni dibi

31 Yesu asunde gu kapernaum, yadi yi Galilé. Anenzange batu wisi gukole. 32 Batu babe gu ndagu ndembu bekumamange ginenzitsi gyandi. Mbare anenzange ne ndure.

33 Gugari ndagu ndembu gube mutu wube ne dinyuni dibi. Dinyuni dibi negwamuge veveni: 34 «Ah! Yesu yi Nasarete, dusisi! Dwayabi re wutse ruge gutse du boka! Nyakuyabi veveni, wu rereri yitse vegitse Nyambi!» 35 Yesu negumukenine, negumwambile re: «Vole, vuduge mu mutu wune!»

Dinyuni dibi diberuse mutune vegari batu, dinyuni dibi negu vuduge dise mutsungule. 36 Batu botsu bekudimame. Bekwivusenange yawu ne yawu: «Agi gyambitsi gi mutu wune, are guvagere tsye? Agagwambili ne ndure ne ngudu, la menyuni mabi mekuvuduge!» 37 Kavane, didume di Yesu diku panzegene ne muposi wotsu.

Yesu gabelusi mbili bibedu

38 Yesu ne gumane vuduse menyuni mabi mu mutu wune, neguvuduge gu ndagu ndembu, akwende gu ndagu yi mutu wa nengure Simu. Gune, aragesenu boyi bu Simu gureme garegemi ne gyotsi. Batu babe gu ndagu be lembige Yesu nonge akumubeluse. 39 Yesu negubambeme ne gibedu, akubandeme, negukenine gyotsi. Gyotsi negumusuge negubeluge. Vane ne vane arambuge negupakile belambile biguye. 40 Tsisige, batu babange ne bibedu mu mbugitsyawu, kepagere mubelu, bekubebegange gu Yesu. Akubetsabigange mekake, akubebelusange. 41 Yesu avudusange gwandi menyuni mabi mu mbili batu. Menyuni mabi mekwamugange re: «Ndyayu wu mwane Nyambi.» Yesu negubekenine nonge betsatse kunde gwambile mbare beyabange re Kriste mukani wutindu ne Nyambi.

Yesu ganenzi gu Sudé

42 Wisi negutsamuge, Yesu neguvuduge gu ndagu, negwende gu kumu yisamunage. Mbili batu be Kapernaum bekumukebange, negumusupugile, beronde re atsageni nawu aya gwende. 43 Tumbe, Yesu abambile re: «Nonge nyendi gwandi gu yadi tsi nzusu gwene lage musamu boti wu bulongu bu Nyambi. Re dibandu Nyambi atindile mu butambe.» 44 Vane, akukunde nenzange musamu boti mu ndagu ndembu tsi Galilé.