Luke 5

Yesu anenge bebingitsi berege

1Wisi mosi, Yesu ayibange ve mbeke gidibe gi Genesarete. Vane, mbili batu bekumubakigange mbare berondange gulu musamu Nyambi. 2Negulabe ve gisyeni matu mebeyi me belobitsi mba mbe basunde gu gugunge miviye myawu. 3Bwatu bumosi bubange bu Simu. Yesu negunangeme gu bwatu bune. Negwambile re: «Yusuge ve mbeke dute mwepesu gu time nonge batu botsu bekunyene, bekunyulu dikengi.» Negutsagene, akunenzange batu yandi gu gari bwatu bune.

4Negumane gwambile bumongu, akwambile Simu re: «Yendanu gu time gidibe ndyayu ne bembatsi bagu. Gimbanu miviye myenu nonge nukulobe bisonzi.» 5Simu negumwagule re: «Fumu, dusedyanze dibeti dyotsu dusadenge nesi gimosi. Nevu ndyabeni wa duvage re putiganu miviye dugugimbe miviye.» 6Negugimbe miviye, bekulobe mbili bisonzi miviye beli gupasige. 7Negusove bembatsi babange gu bwatu bubange ve gisyeni ne dikake, neguruge, yawu botsu be base matu motsu mabeyi ne bisonzi. Matu negubase veveni ne bisonzi beli gusyegeme. 8Simu Pyere negulabe di Yesu sevage, akuteme ve wusu andi. Negwambile re: «Fumu rageme nami mba ni muvagitsi mabi.» 9Simu ayambile nana mba mbe bagangu ne wome, yandi ne bembatsi bandi gukyelu mbili bisonzi bibeselobe. 10Simu ayibange ne mbatsi beyi Sake ne San tayawu Sebede. Yesu negwambile Simu re: «Wuyadume, wagwiku ka ne gulobe bisonzi, tumbe pakile ne kyawu, gidyanzu gyagu gundengile batu begumbinge.» 11Kavane, belobitsi beduke matu ve gisyeni besise byotsu bebinge Yesu.

Yesu abeluse mutu wubange ne bwatsi

12Yesu ayibange gu yadi yi mosi yi Galilé. Vane, gubange mutu wubelange bwatsi. Negulabe Yesu, ayise mukutemine mbami vetsi. Negwambile re: «Fumu, mbelusi. Nyayabi re wubenze mbeluse gere warondi.» 13Yesu negumutsabige dikake, negumwambile re: «Nyasinge, wabeluge.» Vane ne vane, mutu wune negubeluge. 14Vane, Yesu negumuvege mugage re: «Wuyagwambile mutu re wabeluge. Yende gwekwekurigitse gu bevegitsi be pagu sige wukuvege Nyambi pagu yi dubelusu dwagu nevu direndilu mu mugage Moyise, nonge batu botsu be kuyabange re wabeluge.» 15Didume dyandi dikwene lalegene, mbili batu bekurugange guse gulu me Yesu yambilange ne guse belusu. 16Tumbe Yesu ayende gumbure yi sane batu gwe lembe.

Yesu abeluse mutu wune membogelotu

17Gube wisi, Farisi ne benenzitsi be migage mi Moyise berambugile gu mimbu me misyengi mi Galilé ne Sudé, ne yadi yi Serusaleme. Betsagene ve mbeke Yesu ve yandi nenzange ne gubeluse bibedu ne ngudu Fumu.

18Kavane batu bekuruge ne gibedu gi membogelotu mu gipoyu mbeberonde mwingise gu gari ndagu ne guse musunze ve wusu Yesu. 19Beserungule mbare gube mbili batu, negubonge gibedu ne gipoyu gyotsu bepande gu yulumwanze wale, betobe divulu, besunze mutu wune ne gipoyu gyandi kwangene gubange Yesu, ve gari batu.

20Yesu negulabe gitu gyawu, akubambile re: «Mbatsi ami, bitsimbu byagu byotsu bi mabunzulu.» 21Bivunde bi migage mi Moyise ne Farisi bekubange ne pikile mu mirime myawu «Labanu mutu wa syengi Nyambi! Vesa mutu benzi bunzule bitsimbu ka Nyambi vike!» 22Yesu neguyabe pikile tsyawu akubambile re: «Agye nwapikilili nane? 23Agye givyagunu gi gwambile mutu “Bitsimbu byagu byabunzulu” avo “Rambuge yende?” 24Nonge nukuyabange re Mwane mutu ane dinyange di gubunzule bitsimbu mu butambe bwotsu.» Yesu negwambile membogelotu: «Rambuge, bonge gipoyu gyagu, yende gumbu gyagu!» 25Vane ne vane membogelotu negurambuge ve misu me batu botsu. Negubonge gipoyu gyandi negwende gu ndagu andi negwene dumisange dine di Nyambi. 26Batu besutu vane, negulabe, bekusutu minu mwasi, bekudume Nyambi. Bekudumisange Nyambi bekwambilange re: «Mambu me dwalabe nemuni, bimage.»

Yesu agarombi Levi

27Yesu negurambuge gu yadi, vekodu gitsagu gubange mutu wanengu re Levi metsagene ve mbure yandi dyanzilange vabolilu lepu. Yesu negumwene, akumwambile re: «Mbingi.» 28Levi negurambuge, asise byotsu amubinge. 29Vane Levi negulambe gu ndagu andi mulambu neni gukyelu Yesu. Gube mbili batu bebolitsi be lepu ne batu be nzusu bayange nawu ve tavuli. 30Tumbe Farisi ne bivunde bi migage bekugelange Yesu. Bekwambilange batu be bingange Yesu re: «Gye nugayilili ne gunu mbure mosi ne bebolitsi be lepu ne batu bene monyu yibi?» 31Yesu negubagule re: «Sa batu be polu bakebi mubugitsi tumbe bibedu re bakebi mubugitsi wugu bebeluse. 32Nzaruge gu bulongu guserombe batu be sungeme tumbe bevagitsi be mabi nonge bekusanze mutsageninu.»

Yesu gagwambile dyambu di gusindile nzale

33Batu be mosi bambile Yesu re: «Bebingitsi be San ne bebingitsi be Farisi basindili nzale ne gulembe gigumbi gyotsu. Tumbe bebingitsi bagu, gye besasindili nzale? Begaye, beganu.» 34Yesu negwagule re: «Wisi mumengu dyonge nubenze gandise bembatsi be mutu wagongi guya? Dwavage re vyage. 35Tumbe gu gube gigumbi gi mulumi agusise bembatsi tsi andi tsufu tsine begusindile nzale.» 36Dyambu dine neguvyoge, Yesu kubeverile kugu: «Pasi dwarondi londe gidwaru gigulu, dusabenze bonge girini gi tsande yone dukuginamige mu gidwaru gigulu. Mbare tsande yone yisagongene ne gigulu. 37Munongumosi, gusa mutu wa gwitili melamu mekaluge gu putise yigulu. Pasi dwasobegene melamu mone ne megulu ve me gupandile megubule putise, melamu motsu la memagwitige vetsi. 38Tumbe melamu mone maveru kagu putise tsyone. 39Negungenze gusandi mutu pasi amanu melamu me gi kumbi abenze kunde ronde gunu melamu mesekaluge. Mbare akwambile re: “Melamu megulu me meboti.”»